EFESO 2

1Ta kazu a opuo i kulia naro kasu kine ku kulia ti torozi kasu kine. 2Kazu ’bero ta akondra torozi ŋani kine i naga ma ta woworotuni i gbiyeri lo ina ka delo katani ina, i sobu na kulia ti druma lo teriŋi na ’diko naga kidenalo kine, nye laga a yuka na kita tinade ku ŋutulu laga ani sobu kulia kilo katani ina. 3Laga yi giri asaka kazu kasiko i dridriŋi yu‚ i ki’beŋa ti ’beri kaya kine be naga yoyolozu nikana ma nyadrinina. Ku gbiyeri likalo yi kazu asaka i ŋoma na Ŋun ina i moko‚ be ŋutulu ku’de kilo. 4’Bo Ŋun laga ku ediyo korulo‚ igbonaga lepe anyadru yi koru ina‚ 5atikindra yi i gbo’da zoru ku Kristo kugele‚ ’dibani kodro kazu ku yi laga a opuo i kulia naro kaya kine katani kpe‚ ’bo ’busa na’bu na Ŋun ina nyena ritundro ta. 6’Bo lepe atoŋizu yi ku Kristo kugele‚ druga togbi’dikindra yi i ’diko yu kasi lepe kugele‚ 7adi i baŋe naga na popondra nu ma lepe ku kpekindra yi ’busa na’bu nanye naga koru‚ naga ani romoki moro naga kayani i nyadru na Kristo Yesu katani ina. 8’Bo ’busa na’bu na Ŋun ina nyena ritundro ta ku naga ma ta rugi lepe ina. Agbo’da ŋiyu kasunini, ’bo a ’doke lo Ŋun. 9Agbo’da ku kulia ti konesini, ka’bi le’de ŋutu ku pudya mugu. 10’Bo yi a kone lo Ŋun‚ lepe agbekindra yi ku Kristo katani i kondra na konesi naga a na’bu naga ma lepe kukundri ’bero ma yi ku kondrini ko kine. 11Ku kine kulia de‚ yoleta adi kazu ta laga a Monyazi ku kulia ti yuŋeto kine‚ ta laga ma Yahudi laga ataaro kilo lungi a ŋutulu laga aku taaro kilo‚ ’bo taaro ŋanina na kona i mugu katani ku kenisi ti ŋutulu ’duna‚ 12yoleta adi i ilu luŋa de ta kazu asaka kaŋo ku Kristo‚ ti ta atokorazi a mero kaŋo i tomore na Isiraelina, ŋutulu laga a monyazi ti tomoresi lo saraki kilo‚ ti yendru nasuna ’bayi‚ ti ta ’ba Ŋun i ina ka de. 13’Bo tinade‚ ku Kristo Yesu katani‚ ta laga kazu pazo kilo atomore kugele ku kulia ti rima ti Kristo kine. 14Lepe a katomorani lika‚ laga atomodya yi mure katru a mugu gelelo. Lepe a’belengu goro na tumero na tokodya yina ku mugu nanyena. 15Lepe atikindra kukuzuna ku kukuzuki ka’de ka’de kine ku togolesi ŋani kine i lenga kaŋo‚ ma lepe ku gbekindri kanye katani zuru gele loludu i piri na zuro mure. Kuwade lepe atikindra teili lo trotro‚ 16adi ma lepe ku tomodyi yi mure katru a worisi ti Ŋun i ŋo logele katani ku kedini laga a lare laga ma lepe tatuzi tumerekona ku kulia ti kedini ŋanilo kinelo. 17Lepe apondra i trukokindro na ta laga pazo kilo kuu na’bu na teili lo trotrolo, ’bo i trukokindro na ŋutulu laga nyoga kilo teili lo trotrolo itro. 18Ku kulia ti Kristo kine, yi mure katru gbo ku kiko lo toluponi yi ku Monye yulo ku Yuka Nakiye nagelena katani. 19Kuwade ta ani gbo’da tinade a monyazi tro‚ kuwa a kaworo‚ ’bo ta gbo’di a maratezi ti ŋutu ti Ŋun kilo‚ ta gbo’di a ŋutu ti ’ba lo Ŋun. 20Ta gbo’di a’du’duluki i muko na kadi naga na ’delaki lososonyo kilo ku kakeyo kilo kini ina. Kristo Yesu lepe nye laga a ŋurupi laga a druma lo goŋe na kadina ina. 21Ku kulia ti lepe kine ina kadi de giri na tomodya mugu kugelena nyena yeŋundri a kadi nakiye na Ŋun ku Matalo katani. 22Ta lepe itro ato’durozi ki i piri nagele i gbo’da a piri na sakani Ŋun ku Yuka Nakiyena.

will be added

X\