EFESO 1

1Paulo laga a lososonyo lo Kristo Yesulo, be naga ma Ŋun nyadrini ina‚ aroma ku ŋutu ti Ŋun laga Efeso yu, laga ku teiliko ti to’diri ku Kristo katani kilo. 2’Busa na’buna ku teili lo trotro lo ŋiyu ku Ŋun Monye likalo yu, ku Mata laga Yesu Kristo yu itrolo ti gbo’dini ku ta. 3Ŋun laga a Monye lo Mata lika Yesu Kristolo ti purani pura. Lepe a’boriza yi ku Kristo katani ku koŋo na’bu na yukana giri naga i ’diko yu ina‚ 4be naga ma lepe nyumundri yi ku Kristo katani ti inga kana aku ’delaki ina, ma yi ku gbo’da a lokiye‚ ’ba merikozi ku lepe i koŋo yu. 5Lepe agelundra yi ’bero i gbo’da a ŋazi kanye ku Yesu Kristo ku nyadruna. kine de a na’bu ku lepe i konyeni be naga ma lepe pedrini i kondrana‚ 6ma yi ku pudyini lepe ku ’busa na’bu na lepe naga a na’bu koru naga ma lepe ’dogi yi kana‚ ku Ŋutu laga lo nyanyara ilo katani ina. 7Ku Kristo katani yi adake ku rima ti lepe naga a ’diyeta ti torozi kaya beti naga ma ’busa na’bu na lepena gbo’dini a druma koru ina. 8Lepe atoyilakindra yi ’busa na’bu ŋanina. 9Lepe atodinikindro yi kulia naga na mumuyi mumuyi naga a na’bu kanye konyeni naga ma lepe pedrini ’bero ku Kristo katani i kondra kine ku tobodona, ku rame lo’bulo itro. 10Ilo lopete de kpeza adi ku luŋalo ayeŋundra soso lepe itomodya kapazi giri a ŋo logele ku Kristo katani‚ kapazi ti ’diko kilo ku ti ka kilo itro. 11Ku Kristo katani yi agela ’bero i gbo’da a ŋutu ti lepe‚ yi lo yendru Kristo a kayo kilo‚ ku lopete lo Ŋun lo kondra kuliata giri be naga ma nye nyadrini pedrinina, 12ma yi ku tikindra todruma na lepena i pura. 13Ku lepe katani ta itro laga ayinga kulia ti to’diri naga a kuu na’bu na riteni tana kilo, ta arugo lepe‚ ’bo ta arapa ku Yuka Nakiye naga ma Ŋun sarakindri tana. 14Yuka Nakiye ŋanina a rape nika na kulia na irio yi ku Ŋun yu kine, ti inga yi aku ’deba kulia ŋani kine a kaya, ma yi ku tikindra todruma na lepena i pura. 15Ku kine kulia de, igbonaga na ayinga kulia ti rugo nasu ku Mata laga Yesu katanina, seku nyadru nasu na ŋutu ti Ŋun kilo girina ina, 16na ani ko’yu tikindra na iyete ku ta ma na rambini ta i magu niona katani. 17Na magu adi Ŋun lo Mata lika Yesu Kristo, laga a Monye todrumalo ti tikindri ta yuka na tobodo ku na kpiyani kuliatana ma ta dendrini lepe ’busa. 18Na magu ’do adi konye kasu ti teiliko kilo ti ŋazi ŋazu i medra na parara ma ta ku dendri kulia naga ma lepe lungi ta i yendru kine, ku koŋo na’bu naga a na’bu koru naga ma lepe sarakindri ŋutu kanye kilona, 19ku todruma na teriŋi na lepe na kita kaya katani ina, yi laga a karuko kilo‚ teriŋi ŋani naga ani romoki moro, be naga ma lepe kitani ku tobulo nanyena ina. 20Ŋun akita ku Kristo katani ku ina teriŋi de naga ma lepe toŋizi lepe i ŋutulu laga atatuwa kilo i dridriŋi yu‚ i togbi’dikindra na lepe i keni lonye lo lutatelo i ’diko yu ina. 21’Bo Kristo agbi’diki i ’dola na kuweto ti kapa kilo giri i koŋo yu ku todrumaki kine giri, teriŋito kine giri‚ ku tumataki kine giri‚ ku kari na ’di’dinya ’di’dinya kine giri, agbo’da i ina baŋe de katani ka’deloni, ’bo i baŋe naga na ipopondra nu kata yu itro. 22Ŋun a’delakindra kapazi giri ku lepe i mukuzini, druga ’delakindra lepe i kapazi giri i koŋo yu ku kulia ti tomore na karuko kilo. 23Tomore ŋanina a mugu na lepe, naga atozore ku lepe laga lo tozorodru kuliata kine giri mu piritolo.

will be added

X\