KOLOSAI 4

1Ta laga a drumala kilo konakita upi kasu kilo soso‚ a lo’bu igbonaga ta adeni adi ta gbo ku Mata lasu i ’diko yu ina. 2Maketa Ŋun ku teiliko ti rile. Gbo’dita ku konye i magu ŋanina ku iyete‚ 3Maketa ku yi itro, adi ma Ŋun ŋakindri yi kaakutu na kulia ti lepe kine ma yi ku trugo kulia naga na mumuyi mumuyi ti Kristo kine. ’Bo na drodrora ku kine kulia de. 4Maketa adi ti na kpezi kulia ŋani kine gboŋa beti naga adi ti na trugini ina. 5Koneta ku tobodo ku ŋutu laga kaŋo yu kilo. Ku kokorota kokoro luŋalo. 6Kulia na ta ta kine ti gbo’dini a ti ’busa na’bu mu luŋa, be naga ŋo laga lo kukuna ku ’bala na toto’bina ma gbo’dinina, ma ta ku dendri teyitokindro na ŋutulu giri gele gele kulia ’busa. 7Tukiko itrutrukokindro ta kulia kuwe kine giri. Lepe a luŋase laga lo nyanyaralo, a kalokoni laga ku teili lo to’dirilo, a upiye laga lo konakindra Matalo kita seku na kugelelo. 8Na asonyodru lepe ku kulia nagele kine de, ma ta ku dendri kulia kaya kine, ma lepe ku ru’ini teiliko kasu kilo itro. 9Onesimo autu seku lepe kugele. Lepe a luŋase laga ku teili lo to’diri laga lo nyanyaralo‚ lepe laga a ŋutu lasulo. Ko itrukokindro ta kuliata giri naga na kondra ’beri inide kine. 10Aristariko laga lo drodrora seku na kugelelo ku Marako laga a ŋeriŋi lo Baranabalo aroma ku ta. ’Bo ta arumbi kukuzuki ku kulia ti Marako kine‚ adi ku lepe laga ayeŋadru kasu yu‚ rukundrita lepe. 11Yesu lo luŋu a Yusito ilo aroma ku ta itro. Ko ka’delo i dridriŋi na Yahudi kilo laga a kakita kasi na kugele ku kulia ti tumata na Ŋun ina. Ko a karuda ti teili lio itro. 12Epafura laga a ŋutu lasu‚ laga a upiye lo Kristo Yesulo aroma ku ta. Lepe ma’yu mugu ku Ŋun mu luŋa ku teili giri ku ta‚ ma ta ku romoki lirani tritri be ŋutulu laga aguguli ku dendra naga soso i teili kata yu i kondra na kuliata giri naga ma Ŋun nyadrini kine kilo. 13Na lo ’dodru bo na kulia ti lepe kine adi lepe akonakindra ta, ku ŋutu ti Laodokia kilo ku ti Hieropoli kilo itro kita ku teili giri. 14Luka‚ ’buni laga lo nyanyaralo seku Dema aroma ku ta. 15Rometa roma ku luŋaseri laga ti Laodokia kilo seku Numupa ku karuko laga lo tomodya ’beri ku lepe kadi yu kilo. 16Kugbo ina waraga de naga akena kasu dridriŋini‚ tikita lepe ti kenakini i tomore na karuko ti Laodokia kilo itro. Laga ta‚ keneta waraga na ŋiyu Laodokia yuna itro. 17Takita Arikipo adi, “Gbo’di go i tutuzo na kita naga atiki do ku Matalo katanina.” 18Na laga Paulo awudyo ilo rome de ku keni lio lepe. Rameta maaroki kuwe kilo po! ’Busa na’buna ti gbo’dini ku ta.

will be added

X\