KOLOSAI 3

1Kuwade kugbo ta laga atoŋiye kasi Kristo kugele‚ galeta kuliata naga ki yu kine, i piri naga ma Kristo gbo’dini nu‚ naga ma lepe gbi’dikini ku Ŋun i keni lo lutate nu. 2Yoleta kuliata naga ki yu kine‚ agbo’da kuliata naga i kani kineni. 3’Bo ta atatuwa azo‚ ’bo ru nasuna a’dana ku Kristo kugele ku Ŋun katani. 4Kugbo Kristo laga a ru nikana laga apuru‚ ta itro ipupuru kasi lepe kugele i mo’yuna kata yu. 5Kuwade tatuneta ŋo laga kasu katani laga a lo kalo‚ konye lopi‚ kulia naga ’ba kekeli kine‚ nyara na kulia ti mugu‚ ki’beŋa naga naro kine, ku roŋgbo naga be teminizo na muloko laga a ’busa ’busa kilona. 6Ku kine kuliata de ŋoma na Ŋun ina iyeyeŋundra ku ŋutulu laga aku sobu kulia ti lepe kilo kini. 7Laga ta kazu aworo ku kilo ŋutulu de i dridriŋi yu, i naga ma ta sakani i kunu kuliata de kata yu nu. 8Kolokita ko giri‚ ŋoma‚ trotrori na teiliko‚ teiliko loro‚ momorozu, ku kuliesi naga a ti yukuwe naga na lupundro kasu kutuzini kine. 9Ku leleŋita ’bure kasu dridriŋini, ku naga ma ta kolokindri gbiyeri laga a lo ’berolo ku konesi ŋani kinena‚ 10ku naga ma ta ’debini gbiyeri loludu ina. Ilo gbiyeri de nyelo totowusa a loludo ma lepe ku gbo’dini be gbetita na Ŋun laga agbeza lepe ilo‚ ma ta ku dendra Ŋun. 11I kine kulia naga a naluduko kine de katani, Monyazi kilo ’bayi‚ kuwa Yahudi kilo‚ ŋutulu laga ataaro kilo kuwa ŋutulu laga aku taaro kilo, Monyazi kilo kuwa Sekutia kilo‚ upi kilo kuwa monyezi ti ka kilo‚ ko giri ’bayi‚ ’bo Kristo a kuwe lo kuliata giri‚ lepe lo gbo i kuliata giri katani itro. 12Kuwade ta laga a ŋutu ti Ŋun lo nyumu lepe a kanye‚ lo nyanyara kilo‚ soneta ’beri ku ediyo‚ ku teili lo’bu‚ teili laga ’ba pura na mugu‚ teili lo mada ku teili lo rile beti bongola. 13Gbo’dita ku pele na’bu kasu dridriŋini‚ ’bo ku ta laga gbo ku kulia kasu dridriŋini ’dineta torozi ŋani kine. Be naga ma Matalo ’dizini torozi kasu kinena‚ koneta de itro. 14I kine kuliata de giri kini ’yalakita nyadru naga na tomodya kuliata kine giri kugele ku ’bu’busina. 15Ti teili lo trotro lo Kristolo sakani a kaliliani kasu teiliko yu‚ igbonaga ta aluŋu i mugu nagele i rumbi na ilo teili lo trotro de ina. Gbo’dita ku iyete. 16Ti kulia ti Kristo kine sakani kasuni koru. Togoleta ’beri kasu dridriŋini, tepineta ’beri ku tobodo koru. Welonita sauma ku wirito‚ ku wirito laga a ti yuka kilo‚ i naga ma ta tikindri Ŋun iyete kasu teiliko yu ina. 17Kuliata giri naga ma ta kondri kine‚ ’dia gbo adinyo kpe‚ ku kuliesi kugbo ku konesi‚ koneta kuliata ŋani kine giri ku kari ti Mata Yesu kine‚ i naga ma ta tikindri Ŋun Monyelo iyetelo ku lepe ina. 18Wate kine ta‚ gbo’dita ku sobu na lalia kasu kilo, be naga ma zukini ku Matalonina. 19Ta laga lalia kilo nyareta nya wate kasu kine, ’bo ku gbogbo’data ku teili lo potroru kasi koni. 20Ŋazi kilo ta, yiŋeta kulia ti kayuŋo kasu kilo ku kuliata giri, igbonaga kine kulia de tikindra Matalo nyolana. 21Ta laga monyezi kilo ku totobiruta ŋazi kasu kilo, teiliko kasiko kilo ka’bi ku ’do’do. 22Ta laga a upi kilo yiŋeta kulia ti ŋutulu laga a drumala kasu kini i na ka de katani kilo ku kuliata giri‚ agbo’da adi ma ta memeta i tikindra na ŋutulu kilo nyolani‚ ’bo ku teili gele ku naga ma ta kugini Matalo ina. 23Kuliata giri naga ma ta kondrini kine‚ koneta kitana ku teili giri be naga ku Matalonina, agbo’da ku ŋutuluni. 24’Bo ta adeni adi Matalo itikindra ta ŋo laga ma nye ritakindri ŋutu kanye kilo a ropeta kasu. Kristo lepe a Mata laga ma ta konakindri kitalo. 25Ŋutu laga lo kondra kulia narolo irurumbi rope na kulia naro naga ma lepe kondrini kine. ’Bo gela na loŋutu ’bayi.

will be added

X\