KOLOSAI 2

1Na nyadru deneta adi na momodyu ku teriŋi koru ku kulia kasu kine‚ ku kulia ti ŋutu ti Laodokia kilo‚ ku kulia ti ŋutulu giri laga aku meri na ku konye kilo itro. 2Na kondra de ma na ru’i teiliko kasu kilo‚ ti ta atomora kugele ku nyadruna, ma ta ku rumbini tokorine na ŋiyu ku dena na kuliata girina‚ ma ta ku dendri kulia ti Ŋun naga na mumuyi mumuyi kine. Kulia ŋani kine a Kristo lepe. 3Tobodona ku de ndrana a’dandru ’beri ku lepe katani koru. 4Na tazu de le’de ŋutu ka’bi ku ’bo’boliza ta ku kuliesi ti to’bure na lulukani ŋutulu kilo. 5’Dia kodro ku na laga ’bayi kasuni ku muguna kpe‚ teili liolo ilo kasu ki yu. Na nyola ku gbiyeri lasu laga sosolo‚ ku rugo nasu naga tritri na rugi ta Kristo ina. 6Kuwade be naga ma ta rugi Kristo Yesu Matalo ina‚ sakanita de ku lepe katani‚ 7liranita, ti kukuri kasu kine alubo ku lepe katani‚ ti ta ato’durodru ’beri ku lepe katani itro‚ liranita tritri ku rugo, be naga ma ta todinikini ina‚ zorenita zore ku iyetelo. 8Gbo’dita go ka’bi le’de ŋutu ku momokara yoyolozu nasuna ku toŋulupa naga a ’busa ’busana‚ be na togoleto naga ma ŋutulu puputundri kinena, be na dreria ti kapazi ti ina ka de kilona‚ agbo’da be Kristoni. 9’Bo gbiyeri lo Ŋun ilo, ilo saka i mugu na Kristo naga a na ŋutuna katani zore. 10Ta ayeŋundra i gbo’da naga ku ru naga mŋgbana ku lepe katani‚ lepe lo gbo’da i ’dola na kuweto giri ku todrumaki kine giri i koŋo yu. 11Ku lepe katani ta ataaro‚ agbo’da taaro naga na mugunani‚ ’bo ku taaro naga a na Kristo lepe naga na gupadru kulia ti mugu kine kaŋo ina. 12Ta anuka kasi lepe i baputizilo kata yu‚ ’bo ta atoŋiye kasi lepe kugele i baputizilo kata yu ’do‚ ku naga ma ta rugini kita na Ŋun naga na toŋizu lepe i dridriŋi na ŋutulu laga atatuwa kilo yuna. 13Ta kazu a opuo ku kulia naro kasu kine‚ ku naga ma taaro nasuna gbo’dini ’bayi ina itro. ’Bo Ŋun atoruzo ta kasi lepe kugele‚ ti lepe a’diza kulia naro kaya kine giri kaŋo. 14Lepe aŋeri kulia naga na wuro a mori nikana kine kaŋo‚ ku kukuzuki naga na todya yi kine‚ ’bo lepe a’dumadru ko kaŋo, a’begu ko i kedini laga a larelo i mugu yu. 15Lepe a’dutundro teriŋi na tumatakina ku na teriŋitona‚ i kpeza na ko gboŋa‚ druga ’dolakindra ko kuweto be ŋutulu laga amomoka kilo i luŋa lo teminieni nye lu. 16Kuwade le’de ŋutu ka’bi ku ŋeŋeri kulia kasu kine ku kulia ti nyosuto kuwa ti ŋo lo mamata‚ ku kolo drumala ku luŋa lo sabatolo kine. 17kine kulia de a kodudozi ti ŋo laga lo popondralo, ’bo ŋo laga mŋgbalo ŋolo a Kristo. 18Le’de ŋutu ka’bi ku babaŋi babaŋi ta kaŋo i rumbi na rezema kasu kilo‚ derengi lepe nyadru zuzuza ta i sasandru na ’beri kasu kine‚ ku i teminizo na malaika kilo, derengi lepe lira i ŋo lo meri nye i rudesi katalo ti lepe lu pudya mugu a ’busa‚ ku yoyolozu na lepe na ramani kulia ti mugu kine. 19Ŋutu ŋanilo ani ’deba Kristo laga a Kuwelo tritri. Kuwe ŋanina nyena wowoza muguna giri‚ druga tomodya lepe kugele ku putua ku tomoresi ti mugu kine itro‚ ma lepe ku ’durodri ku ’dudyo naga na ŋiyu ku Ŋun yuna. 20Kugbo ta laga atatuwa kasi Kristo kugele i dreria ti kapazi ti ina ka de kilo‚ ta saka be na ŋutulu ti ina ka de kilo gbandra ya? Ta tora ku kukuzuki kine de adi‚ 21“Ku ’de’depita‚ Ku wawaŋita‚ Ku ’bo’bota” gbandra ya? 22Kilo kapazi de ilelenga i yakiyani. Ko gbo be kukuzuki ti ŋutulu kuwa togoleto ti ŋutulu. 23A ’diri kine kulia de puru be totore ku kulia ti teminio na Ŋun naga ku muguna‚ ku sasandru na mugu‚ ku redra na mugu ku teriŋi‚ ’bo ko ani gbo’da a ti logu i goza na ki’beŋa ti mugu tro.

will be added

X\