KOLOSAI 1

1Paulo laga a lososonyo lo Kristolo be naga ma Ŋun nyadrini ina, seku Timoteo laga a luŋase likalo, 2aroma ku ŋutu ti Ŋun laga a luŋaseri ku teiliko ti to’diri ku Kristo katani laga Kolosai yu kilo. ’Busa na’buna ku teili lo trotro lo ŋiyu ku Ŋun Monye likalo yulo ti gbo’dini ku ta. 3Yi tikindra Ŋun Monye lo Mata lika Yesu Kristolo iyete i naga ma yi magini ku ta mu luŋana‚ 4igbonaga yi ayinga kulia ti rugo nasu naga ma ta rugini Kristo Yesuna‚ ku ti nyadru nasu na ŋutu ti Ŋun kilona‚ 5ku yendru nasu na kulia naga a’delaki ta i ’diko yu kinena. Ta ayinga ina yendru de a kayo i naga ma kulia ti to’diri naga a kuu na’buna kine yengi kasu yu ina. 6Kuu na’bu ŋanina ayenga i kazi giri‚ arada konye‚ ’bo ariara itro. Kasu dridriŋini gbo de, ŋiyu i luŋa laga ma ta yingi kulia ti ’busa na’bu na Ŋun kine, laga ma ta dendri kulia kine a ’diri lu, 7be naga ma Epafura todinikindri tana. Lepe a upiye lo kita kasi yi kugele, laga lo nyanyaralo, a kalokoni laga ku teili lo to’diri lo Kristo ku kulia kaya kine. 8Lepe atrukokindro yi kulia ti nyadru nasu naga ma Yuka Nakiyena tikindri ta kine. 9Ku kine kulia de, ŋiyu i luŋa laga ma yi yingi kulia ŋani kine lu, yi aku ko’yu magu na Ŋun ku ta, i piza adi ti lepe tikindri ta i dendra na ŋo lo nyari lepelo koru ku tobodo koru ku rame lo’bu laga ma Yuka Nakiyena tikindrilo, 10ma ta ku sakani be naga ma zukini ku Matalonina, i tikindra na lepe nyola koru, ma ta ku rada konye ku konesi naga a na’bu koru kine, ma ta ku ’dudyo ku dendra nasu na Ŋun ina. 11Yi magu adi ma ta ku rumbi teriŋi koru be na teriŋi na lepe naga a druma koruna, ma ta ku gbo’da ku teiliko ti rile ku teiliko ti tumada i kuliata giri katani, ’ba kanya‚ ku nyola itro‚ 12ma ta ku tikindra Monyelo iyete, lepe laga atuzukindro ta i ŋarundra na ŋo laga ma lepe ritakindri ŋutu kanye kilo i tumata na pararana kata yulo. 13Lepe aninundra yi i teriŋi na mudena katani‚ ’bo alopugo yi i tumata na Ŋiro lonye laga lo nyanyaralo katani. 14Ku lepe katani yi adake, ’bo torozi kaya kine a’diya kaŋo. 15Lepe lo gbo’da drodrogele beti Ŋun laga ani metalo, a kuwe lo kapazi giri laga ma Ŋun gbekindri kilo. 16’Bo kapazi giri agbeki ku lepe i ’diko yu ku i kani, kapazi laga lo memeta kilo ku laga ani meta kilo, kugbo teriŋito ti mataki, ku tumataki, ku todrumala, ku teriŋito, kapazi giri agbeki ku lepe, ku kulia ti lepe kine itro. 17Kazu inga ti kapazi kilo giri ’bayi ina lepe kata, ’bo kapazi kilo giri tomorundra ’beri ku lepe. 18Lepe a kuwe na mugu naga a tomore na karuko kilo, laga a suluwe, lo ŋiyu a kayo i dridriŋi na ŋutulu laga atatuwa kilo yulo, adi ma lepe ku gbo’da a Mata lo kukukalo i kuliata kine giri i koŋoni. 19’Bo gbiyeri lo Ŋun ilo ilo ayeŋundra i saka ku Kristo katani zore, igbonaga kulia ŋani kine a na’bu ku Ŋun i konyenina, 20adi ma Ŋun ku tomodri kapazi giri kanyeni ku kiko lo Kristolo, kugbo i kani kilo, ku laga i ’diko yu kilo, i tikindra na teili lo trotro ku rima ti Kristo naga ma ’bukozi i kedini laga a larelo ki yu kine. 21Ta kazu atokora a mero‚ a monyazi ku kulia ti yoyolozu nasuna, ku ti konesi kasu naga a naro kine. 22’Bo tinade Ŋun atomodya ta a worisi kanye‚ ku tuwa na Kristo lepe na muguna‚ ma lepe ku toliriza ta a lokiye‚ ’ba meriko‚ ’ba kulia na sosoyi sosoyi kanye koŋoni ’busa. 23’Bo sakanita ’duu ku rugona‚ liranita tritri‚ ku yoyoŋuta yoyoŋu ’beri‚ ka’bi ta ku telazi kaŋo i yendru naga i kuu na’bu naga ma ta yingina katani. Kuu na’bu ŋanina atrukoki ŋutulu giri laga agbeki i kani kilo. Laga na Paulo ayeŋundra a kalokoni lo kuu na’bu ŋanina. 24Nyenaga na lo nyonyola ku luŋulio laga ma na rumbini ku kulia kasu kine kilo‚ ’bo kulia naga na koloki i sasanya na Kristona kine akondra ’beri kuwe muguni‚ ku kulia ti mugu na lepe naga a tomore na karuko kilona. 25Na ayeŋundra a kalokoni lo tomore ŋanina ku naga ma Ŋun tikindri na kita ku kulia kasu kinena‚ ma na ku tokuzo kulia ti Ŋun kine girigiri‚ 26naga a kulia naga na mumuyi mumuyi naga a’dandru ’beri i baŋesi a nazo kunu ku yuŋesi giri kunu‚ ’bo tinade akpeza ’beri ku ŋutu ti lepe kiloni. 27Ŋun anyadru todinikindro ŋutulu ŋani kilo kulia ti tokorine naga a na’bu koru ku Monyazi kilo i dridriŋini naga a kulia naga na mumuyi mumuyi kine de. kine kulia de a Kristo laga kasu katani‚ trugo adi ta yendru mo’yu na Ŋun naga na iŋaruta nu. 28Yi kilo trukodru kulia ti Kristo kine i naga ma yi tepizi ŋutulu giri‚ i naga ma yi togo’i ko itro‚ ku tobodo koru ina‚ ma yi ku toliriza ŋutulu giri a ŋutulu laga aguguli ku Kristo katani kilo. 29Na kondra kita koru ku kine kulia de ’bo na momodyu ku teili giri ku teriŋi na lepe na kita koru kuwe katani ina.

will be added

X\