KONESI 9

1’Bo ti Saulo ilo i tokuzendru lotodiniki ti Matalo kilo i tatuza na ko‚ lepe druga tu ku ka’i’ilani laga a leŋgberelo yu, 2i magu na waragaki na kpiyani mugu ku Yahudi laga a ti kadizi naga a momoreta Damaseke yu kilo‚ adi ku nye laga arumbi nutulu laga i ilo kiko lo Matalo de katani kilo ma nye ku momogi ko ’busa‚ kugbo a lalia kugbo a wate‚ ma nye ku torundra ko Yerusalemani. 3Ku lepe i worozi Damaseke yu‚ lepe ku yeŋadri nyoga ku kezina‚ parara druga molundro wule i ’diko yu ku lepe i lagani. 4Lepe druga ’duki kani druga yinga roro lo piza nye adi‚ “Saulo‚ Saulo‚ do wowondru na gbandra ya?” 5Saulo druga piza adi‚ “Do a ŋa ya‚ Mata?” Lepe druga teyitokindro lepe adi‚ “Na a Yesu lo wowonyi do ilo. 6’Bo ŋine‚ lubi kezi yu‚ do iku trutrukoki ŋo laga mo do ku kondrilo.” 7Ŋutulu lo woro kasi lepe kilo aliliratu ’du’du tali i yinga na rorolo i woŋoni ’bo ko aku bo le’de ŋutu. 8Saulo ku ŋine kani, ’dibani kodro ku konye ti lepe kilo laga aŋayi kpe‚ lepe aku romoki i medra na le’de ŋo‚ ko druga pikodru lio ku keni Damaseke yu. 9Lepe druga saka luŋa musala ’ba konye, aku wangu nyosu, aku mozu ku’de ŋo. 10Ti lotodinikita le’de lu Damaseke yu, kari ti lepe kine se naga Anania, Matalo druga takindra lepe ku kpiye laga ma lepeŋa medrilo adi‚ “Anania.” Anania druga rugo adi‚ “Na malo de Mata.” 11Matalo druga takindra lepe adi‚ “Ŋine, uti i kiko lo luŋu a ‘Pirri’ lu, ku pine ku Yuda kadi yu ŋutu lo Tarisea laga Saulo, ’bo lepe lu mamagu yu de. 12Ti lepe amedra le’de ŋutu nye laga Anania i pondra i tanyakindra na kenisi kanye kini, ma nye ku medri kana ’do.” 13Anania druga teyitokindro lepe adi, “Mata‚ na ayinga kulia ti ilo ŋutu de ku ŋutulu rodri, naga ma lepe kondri a naro ku ŋutulu kolu laga Yerusalema yu kilo kini kine. 14Tinade lepe ilo ku teriŋi naga ma ka’i’ila laga drumala kilo tikindri lepena adi ma ku toradri ŋutulu giri lo lungu kari konu kine kilo.” 15Matalo druga teyitokindro Anania adi, “Uti, igbonaga na anyumundro lepe i konakindra na na kita, i zonga na kari kuwe kine ku Monyazi kilo yu, druga ku mataki ku ŋutu ti Isiraeli kilo yu itro ina. 16Na lepe itrutrukoki lepe sasanya na irumbini lepe ku kulia kuwe kine.” 17Kuwade Anania autu, druga lubo kadi yu druga tanyakindra kenisi kanye kilo ku Saulo kini, druga kulia adi‚ “Luŋase Saulo‚ Mata Yesu lepe laga mo do bongi konu pondra i kiko yulo, lo sunyundro na adi mo do ku rumbi ŋayi na konye, ku tozore naga ku Yuka Nakiyena.” 18Wuleŋa gele druga ku’de ŋo beti koko’bo ’du ku Saulo i konye yu kani, druga lepe medra kana ’do. Lepe druga ŋi, druga ’deba baputizilo. 19Ku lepe laga anyosu, lepe druga rumbi teriŋi. Saulo druga saka ku lotodiniki kilo a luŋa ku’de Damaseke yu, 20’bo wuleŋa gele lepe druga trukodru kulia ti Yesu kine i kadizi naga a momoreta kine kata yu adi, “Lepe a Ŋiro lo Ŋun.” 21Ŋutulu giri lo yinga lepe kilo kulia kine azu’yo ko a li’do, ’bo ko druga kulia adi, “Ilo de ani gbo’da a ŋutu laga lo sandru ŋutulu lo lungu kine kari de Yerusalema yulo ya? Lepe ani gbo’da a lo pondra inide ku kulia na momokani ŋutulu i tora‚ i zonga na ko ku ka’i’ila laga dru­mala kilo yulo ya?” 22’Bo Saulo druga yeŋundra ku teri.ŋi koru arodru, lepe druga tikindra Yahudi laga lo saka Damaseke yu kilo i bayi ku naga ma lepe kpekindri ko adi Yesu ŋolo a Kristolo ina. 23I bo na luŋa rodri, Yahudi kilo atomodya kutuzi i tatuza na lepe kaŋo, 24’bo Saulo druga dedeni kulia kasiko kine. Ti ko kulu i tizu kaakutuzi kine tupara ku tukaze itro, i tatuza na lepe. 25’Bo lotodiniki ti lepe kilo druga zozoŋu lepe kuwazena druga putudru lepe i goro ki kaŋo yu i nyakale kata. 26Ku Saulo laga ayenga Yerusalema yu, lepe druga kodro modyu mora ku lotodiniki kilo. ’Bo ko giri akuze lepe, igbonaga ko aku rugo adi lepe a lotodinikita ina. 27’Bo Baranaba druga ’depundra lepe, zonga ku lososonyo kilo yu, i trukokindro na ko kulia na bongi Saulo Matalo i kiko yu kine‚ adi Matalo akulia seku lepe‚ ’bo lepe atrukokindro ŋutulu kulia ti Yesu kine ’ba kuze Damaseke yu. 28Saulo druga saka kasi ko Yerusalema yu‚ druga longa pirito kine giri naga Yerusalema yu kine‚ 29i trugo na kulia ti Matalo kine ’ba kuze. ’Bo lepe akulia druga rerenya ku Yahudi lo kulia ku kutu na Giriki kilo, ti ko lepe kulu i ga’yu kiko lo tatuwini lepe kaŋo ilo. 30’Bo kugbo luŋaseri kilo laga adeni kulia ŋani kine ko druga zonga lepe Kaisaria yu druga sonyodru lepe Tarisea yu. 31Kuwade tomore na karuko laga Yudaya yu ku Galili yu ku Samaria yu kilo giri druga rumbi teili lo trotro druga ’durodru koru. Ko druga woro ku kuka na Matalona ku ruda na teili naga ku Yuka Nakiyena druga ’i’yo ’beri rodri. 32Nyenaga ku Petero ilo i woro kasiko i dridriŋini giri lepe druga utu i ŋutu ti Ŋun lo saka Luda yu kilo yu itro. 33Lepe druga rumbi le’de ŋutu nye laga Aenea, ku tuwane laga lo drodropozu lepe, ti asaka ka yu kiŋazi budro, a liwa. 34Petero druga takindra lepe adi, “Aenea, Yesu Kristo atoruzo do. Ŋine, ku pete gbolo konu kine.” Lepe druga ŋiŋiye agbole. 35Ŋutulu giri lo saka Luda yu ku Sarona yu kilo druga medra lepe, druga lopugo ’beri ku Matalo yu. 36Nyenaga ne’de noka nu Yopa yu, kari ti lepe kine se naga Tabita, lepe a natodinikita. Kari ti lepe kine ku kutu na Girikina se naga Doruka, trugo adi, Nyamata. Lepe bita kondra kitazi na’bu ’duu ’duu ku loko na lemerika itro. 37I nu baŋe de lepe amoka ku tuwane druga tutuwa. Gpu lo lepelo alalayi druga ’dukuzi i kadi naga ki nu. 38Igbonaga Luda ani gbo’da pazo ku Yopana, ku lotodiniki kilo laga ayinga adi Petero lu yu de‚ ko druga sonyodru ŋutulu mure i ma’yu na ’beri ku lepe adi, “Trotro ki’do nyoŋu mugu wule‚ pondri i logu na yi po.” 39Petero druga ŋi i utu kasi ko kugele. Kugbo lepe laga ayenga ko druga zonga lepe i kadi naga ki yuna kata yu. Rumbi derengi ti awuzio kine giri aliliratru i opu laga yu i gbiye‚ ku i kpeza na kotilo ku bongola na ri Doruka ti inga lepe nu zoru kasi ko kine. 40Petero druga sonyodru ko giri kaŋo druga ruguŋo i magu. Ku lepe laga alopukodru mugu ku opulo yu‚ lepe druga kulia adi, “Tabita, ŋine.” Tabita druga ŋazu konye kanye kilo, ku lepe amedra Petero druga gbigbi’diki. 41Petero druga ’deba lepe ku keni druga toŋizu lepe ki. Lepe druga lungu ŋutu ti Ŋun kilo ku awuzio kine druga tikindra Doruka kasikoni zoru. 42Kulia ŋani kine druga denazi Yopa yu giri, ŋutulu rodri druga rurugo Matalo. 43Petero druga ’duteki Yopa yu luŋa rodri kasi Simona laga a kaŋinyani lo lo’bualo.

will be added

X\