KONESI 6

1I kulu luŋa de kugbo lotodiniki kilo gbo’di ayeŋundra rodri‚ Yahudi laga lo kulia ku kutu na Giriki kilo apoki i ngunguruto ku Yahudi laga lo kulia ku kutu na Eberena kilo igbonaga awuzio kasiko kine titiaŋa titiaŋa i kora na kapazi naga mu luŋana. 2Ŋutulu laga mere gele konye mure kilo druga luŋundra mongoyo na lotodiniki kilo adi‚ “Ka’bi yi ku koko trugo na kulia ti Ŋun kine adi ma yi ku korakindra ŋutulu kilo nyosuto. 3Kuwade luŋaseri, gelundrita kasu dridriŋini ŋutulu burio laga adena a ŋutulu laga azore ku Yuka Nakiyena ku totore itro‚ ma yi ku ’delakindra ko i ina kita de. 4’Bo laga yi‚ ma yi ku tikindra ’beri i magu na Ŋun ku i trugo na kulia.” 5’Bo kulia na ta ko kine atikindra mongoyona giri nyola‚ ko druga gelundra Setefano, laga a ŋutu laga azore ku rugona, ku Yuka Nakiyena itro‚ ku Filipo‚ ku Porokoro‚ ku Nikanora, ku Timona, ku Paramena‚ ku Nikolayo lo Antiokia lo lopugo mugu a Yahuditio ku rugo ilo. 6Ko druga ’de­laki ku lososonyo kilo i koŋoni‚ ’bo lososonyo kilo druga makakindra ko Ŋun‚ druga tanyakindra kenisi kase kilo kasiko kini. 7Kulia ti Ŋun kine druga kukuworo, ’bo lotodiniki kilo druga ’i’yo ’beri rodri Yerusalema yu‚ ’bo ka’i’ila kilo rodri druga yeyeŋundra a kasopo ti rugo ŋanina. 8Nyenaga Setefano laga azore ku ’busa na’bu ku teriŋina itro ilo druga kondra wonyesi ku kpiyesi naga a drumala ku ŋutulu kilo i dridriŋini. 9’Bo ku’de kilo ŋutulu kilo druga ŋi i rerenya ku Setefano. Ko a ŋutulu laga lo luŋu a Libertino, trugo adi‚ Ŋutulu laga alake kilo‚ ku Yahudi ti Kurene kilo‚ ku ti Alekezandria kilo‚ ku ti Kilikia kilo‚ ku ti Asia kilo‚ ’bo ko giri aŋiyu i rerenya ku Setefano. 10’Bo ko aku romoki goza totore naga ma Yuka Nakiyena tikindri lepe i kulianina. 11Ko druga kokolakindra ’doke tali i ŋutulu lo sosozu kulia ku lepe i muguni‚ adi‚ “Yi ayinga ti lepe lu tazu kulia na momorieni Mose seku Ŋun.” 12Ko druga toŋizu mongoyona ku temezi kilo ku katogolo ti kukuzuna kilo‚ druga ’bunyekindro lepe i moga na lepe druga zonga lepe ku kayolo ti kuliata kilo i koŋo yu. 13Ko druga ’delakindra ka’doto ti bo na kulia ti to’bure kilo i kulia adi‚ “Ilo ŋutu de ani ko’yu tazu na kulia naro ku ina piri naruruwana de ku kukuzuna kini. 14’Bo yi ayinga lepe i tazu naga adi Yesu lo Nazaretalo irandru ina piri de ’bo ilolopugo gbiyeri laga ma Mose tikindri yi ilo itro.” 15Ŋutulu laga lo gbi’diki a kayolo ti kuliata kilo druga gbuluzu lepe‚ ’bo ko amedra koŋo na lepena be koŋo na malaikata.

will be added

X\