KONESI 5

1’Bo le’de ŋutu kari ti lepe kine se naga Anania‚ seku noka na lepe naga Safira ku ko laga atogbodyu dridriŋi na ka nasena‚ 2ko druga pitikindro riye ku’de kine bo yu, ti noka na lepena adeni de itro, druga zonga limbito kine ku lososonyo kilo i mukuzi yu. 3Petero druga kulia adi‚ “Anania, Satani azore konu teilini i liŋikindro na Yuka Nakiyena ’bure i pitikindro na riye ku’de naga ma ta togbodri ka nasuna kine gbandra ya? 4Kedri kodro kugbo do aku togboru ka ŋanina ani gbo’da a nonu lepe ya? ’Bo ti atogboruna, do aku romoki kondra be naga mo do nyadrinina ya? Do yo’yu kondra de konu teilini gbandra ya? Do agbo’da liŋikindro ŋutu ’bureni, ’bo Ŋun.” 5Kugbo Anania laga ayinga kine kulia de, lepe druga ’duki kani, druga ’do’doro. Ŋutulu lo yinga kine kulia de kilo giri druga kukuze koru. 6’Bula kilo druga ŋiyoro i todya na opu lo lepelo druga ’dogu i nuka. 7I bo na baŋe naga beti arodru sawa musala de, noka na Ananiana druga yeyeŋundra‚ ’bo lepe aku deni kulia na kondra ’beri kine de. 8Petero druga takindra lepe adi, “Trukoki na ŋona ta atogbodyu kana mu kine de.” Nokana druga teyitokindro lepe adi, “Iye, mu kine de.” 9Petero druga teyitokindro lepe adi, “Ta atomodya kutuzi i modyu na Yuka na Matana gbandra ya? Mete, ŋutulu lo ’dogu opu lo lale lolulo i nuka kilo ma kilo i kaakutu kilo de‚ ’bo ko i’do’dokoro do kaŋo yu itro.” 10Wuleŋa gele lepe druga ’duki ku Petero i mukuzini‚ druga ’do’doro. ’Bula kilo ku alupundro‚ ku rumbi derengi lepe atuwa, ko druga ’dokodru opu lo lepelo kaŋo yu i nuka ku lale i laga yu. 11Tomore na karuko kilo giri ku ŋutulu giri lo yinga kine kulia de kilo druga kuze koru. 12Nyenga kpiyesi ku wonyesi rodri akondra ’beri ku kenisi ti lososonyo kilo i dridriŋi na ŋutulu kilo. Ko gbo giri kugele i bu naga na luŋu a Solomona ina kata yu. 13Ŋutulu laga kaŋo kilo akuze lubo naga kasiko i dridriŋi yuna, ’bo ŋutulu kilo giri apudya ko koru. 14Druga ŋutulu ku’de rodri laga lo rugo Matalo kilo ’dulukindra ’beri kasiko yu, lalia ku wate. 15Ko druga ’dukundro ŋutulu laga ku ’beri na mimiye kilo i kikolini druga topirikindra i gbolo ki ku i kodrazi ki itro, adi ku Petero laga rorosodru, ma kodudo na lepena kodro ’duki kasiko kini. 16Ŋutulu kilo druga tunundra ’beri kugele ŋiyu i kezino naga i Yerusalema nyoga yu kine. Ko azondra ŋutulu laga ku ’beri na mimiye, ku laga ku yukala naro, ko druga totoruwe giri. 17’Bo ka’i’ilani laga a leŋgberelo ku ŋutulu laga ku lepeni kilo giri druga ŋi‚ ko a tokore na Sadukayona, ’bo ko gbo ku yuma koru. 18Ko druga momoga lososonyo kilo druga zonga ko i kadi naga a drodrore na ŋutulu girina kata yu. 19Ku gbo’dini tukaze kide malaikata le’de lo Matalo druga ŋaŋa kaakutuzi ti kadi naga a drodrorena kine druga tolupundro ko kaŋoni druga takindra ko adi‚ 20“Utita ku liranita i kadi na Ŋun ina kata yu ku trukokita ŋutulu kilo kuliata giri ti ina ru naluduna de kine.” 21Ku ko laga ayinga de‚ ko druga lupodru i kadi na Ŋun ina kata yu i wara na ka i togo’yu. Nyenaga ka’i’ilani laga a leŋgberelo ku ŋutulu laga ku lepeni kilo apondra i luŋundra kayolo ti kuliata kilo kasi temezi ti Isiraeli kilo kugele‚ ko druga sonyodru kutu i kadi naga a drodrorena kata yu i doga na lososonyo kilo. 22’Bo ku drumala ti katiyu kilo laga ayenga‚ ko aku rio lososonyo kilo i kadi naga a drodrorena kata yu‚ ko druga yite i zondra na roro ŋanilo‚ 23adi‚ “Yi ku rumbi kadi naga a drodrorena atokuwa soso, ’bo katiyu kilo ti kulu alira i kaakutuzi yu, ’bo yi ku ŋazi yi aku rio le’de ŋutu kata yu.” 24Ku druma lo katiyu ti kadi na Ŋun kilo ku ka’i’ila drumala kilo laga ayinga kine kulia de, ko druga rambu ’beri adi kine kulia de igbo’da adinyo. 25Le’de ŋutu druga pondra kasikoni druga trukokindro ko adi, “Ŋutulu laga ma ta zongi i kadi naga a drodrorena kata yu kilo kulu alira i kadi na Ŋun ina kata yu de i togo’yu na ŋutulu.” 26Druga druma ŋanilo ku katiyu kilo tu i doga na ko druga zondra ko, ’bo madaa igbonaga ko akuze ŋutulu kilo ka’bi ko ku bibiringo se ku ŋoropo ina. 27Ku ko laga azondra de, ko druga tolirakindra ko ku kayolo ti kuliata kilo i koŋoni. Ka’i’ilani laga a leŋgberelo druga pipiza ko, 28adi, “Yi agokindra ta adi ku totogota ŋutulu ku kine kari de, ’bo kpe, ta atozodru Yerusalema ku togole lasulo, ta kilo nyadru zondra rima ti ilo ŋutu de kine kaya kini itro.” 29’Bo Petero ku lososonyo kilo druga teyitokindro ko adi, “Angu yi sobu kulia ti Ŋun alangu kulia ti ŋutulu kine. 30Ŋun lo merenyezi kaya kilolo atoŋizu Yesu laga ma ta rembi ’begi i kedini mugulo. 31Ŋun atogbi’dikindra lepe kanye keni lo lutatelo a Ka’dolani lo kuwe ku a Kariteni, ma tikindra Isiraeli kilo ti lopuke teiliko kase, ma torozi kasiko kine ’di’diyani. 32’Bo yi a ka’doto ti bo na kine kulia de ku Yuka Nakiye naga ma Ŋun tikindri ŋutulu giri lo sobu kulia kanye kine kilo.” 33Ko ku yingi katazi kasiko kilo druga trotrori trotrori, ko druga nyadru ga’yu tatuza na ko. 34’Bo le’de Farisayota laga a kayoloni lo kuliata, kari ti lepe kine se naga Gamalieli, a katogoloni lo kukuzuna, lo pura ku ŋutulu giri korulo, druga ŋi ki druga takindra kukuzu adi ti ŋutu kilo zoŋani kaŋo ku baŋe a naŋutru. 35Lepe druga takindra ko adi, “Ŋutu ti Isiraeli kilo, gbo’dita go ku kulia naga ma ta kondri ku kilo ŋutulu de kine. 36Kazuluŋa inide Teuda aŋiye, adi nye laga a ŋutu druma‚ ku’de ŋutulu rodri beti kamazi iŋmani de lo kepodru bo na lepena, lepe druga reremo‚ kakepo ti lepe kilo druga rereki‚ kulia ŋani kine druga yeŋundra a ’busa. 37Ku lepe i boni‚ Yuda lo Galililo druga lo ŋi i luŋa ti kena na ŋutuluna druga lulukadru ku’de ŋutulu kanye bo yu. ’Bo kugbo lepe laga akaraki‚ kakepo ti lepe kilo giri druga rereki. 38Kuwade tinade‚ na takindra ta‚ yoŋeta yo ’beri ku kilo ŋutulu de‚ kolokita ko, igbonaga kugbo ilo lopete de, kuwa kine kulia na ’dumazi kine de a ti ŋutulu‚ ko ilelenga. 39’Bo kugbo a ti Ŋun‚ ta aka romoki tukarakindra koni. Ka’bi ta ku rie a ŋutulu lo moro ku Ŋun!” 40Ko druga sobu tretrele lo lepe lo kulialo‚ druga luŋundra lososonyo kilo ’do‚ druga tikindra ko i kpinya‚ druga takindra ko kukuzu adi ka’bi ko ku ’di’dinyi kari ti Yesu kine ’do‚ druga kolodru ko i utu. 41Lososonyo kilo druga kolokindro kayolo ti kuliata kilo druga nyonyola i naga ma Ŋun rambini adi se romoki riondru yukuwe ku kari ti Yesu kine ina. 42Mu luŋa i kadi na Ŋun ina kata yu‚ kase ’beŋi yu itro‚ ko aku ko’yu togo’yuna ku trugona adi Yesu a Kristolo.

will be added

X\