KONESI 4

1I naga ma lososonyo kilo takindri ŋutulu kilo kuliana ka’i’ila kilo‚ ku druma lo katiyu ti kadi na Ŋun kilolo ku Sadukayo kilo druga yeŋundra kasikoni‚ 2ti teiliko kilo atrotrorotu igbonaga lososonyo kilo ti kulu i togo’yu, kulu i trugo kulia ti ŋiye na ŋutulu laga atatuwa kilo ku kulia ti ŋiye na Yesunana. 3Ko druga momoga lososonyo kilo druga zonga ko i drodrora yu yeŋadru suu i tumalu‚ igbonaga ti kana gbo’di a tokotria ina. 4’Bo ŋutulu rodri laga ayinga kulia kine kilo arugo. Kenesi ti lalia kilo ayeŋundra beti alifu mukana de. 5Ku gbo’dini kutumalu de, drumala kasiko kilo ku temezi kilo ku katogolo ti kukuzuna kilo druga tunundra ’beri Yerusalemani, 6kasi Ana, ka’i’ilani laga a leŋgberelo ku Kayafa ku Yoane ku Alekezanda ku maratezi ti ka’i’ilani laga a leŋgbere kilo giri. 7Kugbo ko laga atoliriza lososonyo kilo kase dridriŋini‚ ko druga piza ko adi‚ “Ku teriŋi naga ya‚ kugbo ku kari ti ŋa naga ma ta kondri de ya?” 8’Bo Petero laga azore ku Yuka Nakiyenalo, druga teyitokindro ko adi, “Drumala ti ŋutulu kilo ku temezi kilo, 9kugbo yi lo piya indikinina ku kulia ti kone lo’bu laga ma yi kondri ku ŋutu laga ku mukuzi a ’bele’beleloni, adi ŋutu ŋanilo toruwe adidinyo, 10deneta giri‚ ’bo Isiraeli kilo giri ti dene adi ku kari ti Yesu Kristo lo Nazareta‚ lo ’be ta i kedini mugu‚ lo toŋiyu Ŋun i dridriŋi na ŋutulu laga atatuwa kilolo‚ ku kulia ti lepe kine‚ nyena lirani ilo ŋutu de ku mugu na’bu kasu koŋoni ilo de. 11Lo Yesu de a ŋurupi laga ma ta pazilo‚ ta laga a ka’duko kilo‚ ’bo lo yeŋundra a ŋurupi laga a druma lo goŋe lo kadi ilo. 12Ritena ’bani rie ku le’de ŋutu tro‚ igbonaga kari ku’de naga i kani naga atiki ŋutu kilo adi ma yi riteni ku se ’bayi.” 13Ku ko laga amedra teiliko kasi Petero seku Yoane kilo laga a logo, ’bo ko atrimu adi ko a ŋutu laga a ti ’beŋi laga aku togolo kilo, ko arambu ’beri. Ko druga dendra adi ko asaka kasi Yesu kugele. 14’Bo ko ku medri ŋutu lo toruwelo ilo alira kasiko i lagani, ko gbo’di ’ba kutu naga a rerenyeta. 15Ku ko laga atakindra ko kukuzu adi ti ko inga lupodri kaŋo ku ’baŋe a naŋutru, ko druga poki i moŋa na kulia kase dridriŋini 16adi‚ “Ma yi kondra kilo ŋutulu de adinyo ya? Kpiye lo wonye lo konu ko ilo adena Yerusalemani giri, ’bo yi ani romoki renya lepe. 17’Bo kugbo nyara adi kulia ŋani ka’bi ku rereki ku ŋutu kiloni, ti yi ririŋe ko ka’bi ko ku trutrukoki le’de ŋutu ku kunu kari de tro.” 18Kuwade ko druga lungu ko, ko druga trukokindro ko adi ka’bi ko ku kukulia kugbo ku totogo’yu ku kari ti Yesu kine ’do. 19Petero seku Yoane druga teyitokindro ko adi, “Ŋona a na’bu ku Ŋun i konyeni ki yi yiŋe ta alangu Ŋun, lilineta ta lepe, 20’bo yi ani romoki kolokindro ŋo laga ma yi bongi ku laga ma yi yingi kilo ’ba kulia tro.” 21Ku ko laga atokuzendro ko ’do, ko druga kokoloro ko ku naga ma ko ga’ini kiko lo sasanyani ko kpe‚ ku kulia ti mongoyo kilona. ’Bo ŋutulu kilo giri druga pudya Ŋun ku kulia na kondra ’beri kine. 22’Bo ŋutu laga lo toruwe ku ilo kpiye de ilo kiŋazi ti lepe kilo ti gbo’di arodru meria iŋmani. 23Ku ko laga akolozi ko druga utu ku worisi kase kilo yu‚ i trukokindro na ko kulia naga ma ka’i’ila drumala ku temezi kilo takindri se kine. 24Ku ko laga ayinga kulia ŋani kine ko druga poki i magu na Ŋun ku roro logele i kulia adi‚ “Mata Kabuloni‚ lo gbekindra ’dikona ku kana ku suburilo ku kapa giri laga kasiko katani kilo‚ 25lo kulia ku kutu na merenye lika Dawidi laga a kalokoni lolulo ku Yuka Nakiyena adi‚ ‘Monyazi kilo ŋi ku ŋoma‚ ’bo zuro kilo akukundra lopete laga a ’busa ’busa kilo gbandra ya? 26Mataki ti ka kilo apedra ’beri, ’bo drumala kilo atunundra ’beri kugele, i moro ku Matalo ku Kristo lo lepe lo gelu lepe itro’ 27’bo a ’diri i ina kezi de katani ku Herode seku Pontio Pilato atunundra ’beri ku Monyazi kilo ku ŋutu ti Isiraeli kilo kugele i moro ku kalokoni lolu lokiye laga Yesu, lo gelu dolo, 28i kondra na kuliata giri naga mo do pedrini ’bero i kona ku keni lolulo kunu. 29Tinade Mata, mete kulia kasiko ti tokuzendru kine, ’bo tiki upi kolu kilo ti truke kulia konu kine ’ba kuze, 30konu ŋizu na keni lolulo i toruzoni, kpiyesi ku wonyesi ti kone ’beri ku kari ti kalokoni lolu lokiye laga Yesu.” 31Ku ko laga amagu de, piri naga ma ko tunundri ’beri kugele nu druga dodonga dodonga mugu, druga ko giri zore ku Yuka Nakiye druga trugo kulia ti Ŋun kine ku teiliko logo. 32Mongoyo na karuko kilo druga gbo ku yoyolozu nagele ku teili logele itro. Ŋutu le’de lo kulia adi kapa kanye kilo a kanye lepe de ’bayi. Kapa kasiko kilo giri a momori. 33’Bo lososonyo kilo a’dodru bo na kulia ti ŋiye na Mata Yesulo ku teriŋi koru, ko ’bo giri druga rumbi ’busa na’bu koru. 34Ŋutu laga ’ba kapa ’bayi kasiko i dridriŋini, igbonaga ŋutulu laga ku melesiŋo kugbo kadizi kine atogbodyu ko kaŋo, druga zondra gbore ŋanilo 35ku lososonyo kilo i mukuzini‚ ma koraki ŋutulu giri be naga ma telemera nasikona gbo’dinina. 36Kuwade Yosefa laga ma lososonyo kilo gbizini a Baranaba ilo, trugo adi‚ Karudani lo teiliko‚ a Levitio lo Kuporolo‚ 37ku atogbodyu melesi nanyena, lepe druga zondra riye ŋani kine ku tikindra ku lososonyo kilo i mukuzini.

will be added

X\