KONESI 3

1Nyenaga ku Petero seku Yoane kuwa autu i kadi na Ŋun ina kata yu i sawa buŋa lo makani Ŋun‚ 2ti le’de ŋutu laga ayuŋe a batralo, ŋutu ŋanilo ’do’dokoyi bita i topiriki mu luŋa i nu kaka na luŋa a ’Bu’busi koru ina i kutu yu i momo’yu na kapa ku ŋutulu lo lubo i kadi na Ŋun ina kata yu kilo. 3Ku lepe laga amedra ku Petero seku Yoane i pondra kadini‚ lepe druga mo’yu kapa. 4’Bo Petero seku Yoane druga gbuluzu lepe, druga takindra lepe adi‚ “Boŋe yi.” 5Lepe druga ’delakindra teili i medra na ko, i yo’yu adi ŋona ko i’do’doga nye. 6’Bo Petero druga takindra lepe adi‚ “Riye, ku drumo ’bayi kuweni, ’bo na tikindra do ŋo laga kuweni ilo. Ku kari ti Yesu lo Nazaretalo kine, woroni.” 7Petero druga ’dokodru lepe i keni lo lepe lo lutatelo druga ŋizu lepe ki. Wuleŋa gele mukuzi ti lepe kilo ku ludraki ti lepe kilo druga rumbi teriŋi. 8Lepe druga labara ki i lira druga poki i woworotu, druga lubo i kadi na Ŋun ina kata yu kasi ko kugele, i woworotu, i latu, i pudya na Ŋun. 9Mongoyona giri druga medra lepe iworoni ku i pudya na Ŋun. 10Ko adeni ŋutu ŋanilo adi lepe a ŋutu lo gbi’diki bita i kaka naga ’Bu’busi koru na kadi na Ŋun ina i kutu yu i momo’yu na kapalo. Ko druga rambu ’beri koru ’bo kulia na kondra ’beri ku ŋutulo i muguni kine druga zu’yo ko a li’do. 11Ku lepe laga a’depakindra mugu kasi Petero seku Yoane i boni‚ ŋutulu kilo giri druga wo kugele kasi ko yu i bu naga na luŋu a Solomona ina kata yu ti ko arambu ’beri koru. 12Ku Petero laga abonga de‚ lepe druga takindra ŋutulu kilo adi, “Ŋutu ti Isiraeli kilo, ta rambu ’beri de ku gbuluzu na yi gbandra ya? Adi ŋona ku teriŋi naga nika lepe, kugbo ku teminizo nika lepe naga ku Ŋun yu ina yi lo tikindra ilo ŋutu de i woroni ya? 13Ŋun lo Abarahama, ku lo Isaka ku lo Yakobo, Ŋun lo merenyezi kaya kilolo apudya kalokoni lonye laga Yesu. ’Bo laga ta atikindra lepe druga pazu lepe ku Pilato i koŋo yu‚ ti Pilato ŋanilo kodro arambu i lakundra na lepe. 14’Bo ta druga pazu Ŋutu laga a Lokiye lokiyelo ku Mŋgbalo‚ ta druga magu karemonilo adi ti lakakini ta ayu. 15Ta druga tatuza Monye lo ru‚ lo toŋiyu Ŋun i dridriŋi na ŋutulu laga atatuwa kilolo. Yi laga a ka’doto ti bo na kulia ti lepe kine. 16Ku ruko na kari ti Yesu kine‚ ŋutu laga ma ta medri‚ ma ta dendri ilo de gbo’di ku teriŋi ku kari ti lepe kine. Ruko na Yesu ina atikindra lepe mugu naga a na’bu koru kasu koŋoni giri. 17“ ’Bo luŋaseri, na adeni ta kasi drumala kasu kilo akondra kine kulia de ’ba dendra. 18’Bo kuliata na puputu Ŋun kazu ku kakeyo kiloni adi Kristo lonyelo ilo isasanya kine‚ lepe atorumokindro kuliata ŋani kine de. 19Kuwade lopuketa teiliko, lopuketa ’beri ’do ma torozi kasu kine ŋiŋinyazi kaŋo‚ ma Matalo ku tikindri baŋesi ti toyuka kine‚ 20ma lepe sunyundri Kristo laga Yesu lo gele ku talo. 21Nyadru ti ’dikona tine lepe yeŋadru tozo i luŋa lo torumokini kuliata giri na puputu Ŋun ku kakeyo lokiye kanye laga ti ’bero kiloni. 22’Bo Mose kazu akulia adi‚ ‘Mata Ŋun itoŋikindra ta kakeyoni ku luŋaseri kasu kilo i dridriŋini be naga ma lepe toŋizi nana. Ta iyiyi kuliata giri na ta lepe kine. 23’Bo ŋutulu giri laga a’biye ku yinga na kakeyoni ŋanilo kilo ikakaraki ku ŋutulu kilo i dridriŋini.’ 24Kakeyo giri lo kezu kulia ŋiyu ku Samueli ku lo ’duki ku lepe i boni kilo‚ ko atrugo kuliata ti kine baŋesi de itro. 25Ta laga a ŋazi ti kakeyo ku ti tomore naga ma Ŋun tikindri merenyezi kasu kilo‚ na taki Abarahama adi‚ ‘Ku nyomo kolu kilo ketimito ti ka kine giri iriondru koŋo na’bu.’ 26’Bo Ŋun atoŋizu kalokoni lonyelo druga sonyodru lepeŋa kasu yu a kayo‚ i tikindra na ta koŋo na’bu na lopukeni ta giri i kolokindro na kulia naro kine.”

will be added

X\