KONESI 28

1Kugbo yi laga aritundro ’beri‚ yi druga dendra adi sula ŋanina nye naga Melita. 2Kulu ŋutulu de druga kpekindra yi ’busa naga na’bu koru‚ ani gbo’da be naga ma rieni ’duuna. Ko druga rukundro yi giri‚ druga lamakindra yi kima‚ igbonaga kudulo apoki i ziye‚ kuwade kana lili ina. 3Kugbo Paulo laga a’de’dengu ki’bili kine‚ druga ’delakindra i kima kini‚ munu le’de druga lupundro kaŋo ku ’udya na kimana‚ druga nundra mugu ku lepe i kenini‚ 4Kulu ŋutulu de ku amedra munulo i leleza na mugu ku Paulo i kenini‚ ko druga kulia kase dridriŋini adi‚ “Ilo ŋutu de ŋolo a karemoni. ’Dibani kodro ku lepe laga aritundro mugu suburi kata yu kpe‚ kulia na ŋeraki lepe kine aku nyadru adi ti lepe gbo’dini zoru.” 5’Bo Paulo druga gbatara munu ŋanilo i kima kata yu‚ munulo aku kondra lepe a loro tro. 6Ko druga mondru wela ŋanina kuwa ŋona lepe i’du’duki ka i tuwa ki wuleŋa gele‚ ’bo kugbo ko laga amondru baŋe a nazo‚ ko aku medra le’de ŋo lo kondra lepe a loro‚ ko druga lopugo ’beri druga kulia adi lepe a mulete. 7Druma lo sula ŋanilo nye laga Pubulio‚ ’bo ka na lepena nyogoŋa ku nu piri de. Lepe druga makundra yi‚ druga rugo yi a komo luŋa musala. 8Rumbi derengi monye lo Pubuliolo gbo ku tuwane‚ muguna kamaka‚ ’bo kile a rima itro. Paulo druga lubo ku lepe kadi yu‚ druga magu Ŋun. Kugbo lepe laga atanyakindra kenisi kanye kilo ku lepe kini‚ druga toruzo lepe. 9Kugbo kine kulia de naga akondra ’beri azo‚ ŋutulu kilo giri laga ku tatuwa i sula kata yu kilo druga pondra i toruwe. 10Ko druga sobu yi koru. Kugbo yi laga a’do’ya laŋadru‚ ko druga ’de’ya kapazi laga ’bayi kayani kilo i ki’bo kata yu. 11I bo na yapazi musala‚ yi druga pilara i ki’bo na saka i sula yu i luŋa lo katiro‚ na ŋiyu Alekezandria yuna. Kpiye lo ’delaki i ki’bo kuwelo a lo Muloko laga a kurudo. 12Kugbo yi laga ayenga Surakusa yu‚ yi druga ’duteki yu de luŋa musala. 13Ŋiyoro yu de kaya worozi yu‚ yi druga loŋadru suu Regio yu. I bo na luŋa gele kobuŋe na’buna druga ŋiyu ’beriko, druga i luŋa laga togi murelo‚ yi druga yeŋadru Puteoli yu. 14Yu de yi druga rumbi luŋaseri ku’de laga lo rukundro yi i saka kasi se luŋa burio kilo. Gbode yi druga yenga Roma yu. 15Kugbo luŋaseri laga Roma yu kilo laga ayinga kulia kaya kine‚ ko druga pondra i piri na togboreni kapazi na luŋu Apionani, i Kadizi ti Komo naga Musala kine‚ i momora ku yi. Kugbo Paulo laga amedra ko‚ lepe druga tikindra Ŋun iyete‚ ’bo teili lo lepelo druga gbigbi’diki. 16Kugbo yi laga alubo Roma yu‚ Paulo druga koloki saka ka’delo seku katiyuni laga lo tizu lepelo. 17I bo na luŋa musala‚ Paulo aluŋundra ka’dola ti kuwe ti Yahudi laga i nu piri de kilo. Kugbo ko laga atunundra ’beri‚ lepe druga takindra ko adi‚ “Luŋaseri, ’dibani kodro ku na kazu aku kondra le’de ŋo a loro ku ŋutulu kilo‚ kuwa ku gbiyeri lo merenyezi kaya kilo kpe‚ na atiki a ŋutu lo drodrora ŋiyu Yerusalema yu ku ŋutu ti Roma kilo i kenisi. 18Kugbo ko laga apipiza na‚ ko druga nyadru lakundra na‚ igbonaga ko aku rumbi adi na akondra le’de ŋo lo ŋerakini na tuwa ina. 19’Bo kugbo Yahudi kilo laga aredra kine kulia de‚ nyena nyadri na i utu ŋero ku Kaisari yu‚ ’dibani kodro ku na ’ba kulia na sosoyi sosoyi ku zuru liolo i muguni kpe. 20Kuwade ku kine kulia de na ama’yu mugu i medra na ta‚ i kulia ku ta‚ igbonaga na atora ku ilo maaro de ku kulia ti lepe laga ma Isiraeli kilo yendrinilo ina.” 21Ko druga teyitokindro lepe adi‚ “Laga yi aku rumbi waragaki na ŋiyu Yudaya yu ku kulia konu kine tro. Luŋaseri laga lo pondra nide kilo aku trukokindro yi kulia konu kine‚ ’bo ko aku tazu kulia naro konu muguni tro. 22’Bo yi kodro nyadru yinga konu kutuni kulia naga mo do rambi kine‚ igbonaga yi adeni adi ina tokore de a’da’datayi mu pirito ina.” 23Ku ko laga agelakindra lepe luŋalo‚ ko druga pondra rodri ku lepeni i kadi naga ma lepe sakanina. Lepe druga kpekindra ko kulia kine ŋiyu kutumalu yeŋadru tozo i tokotria, druga ’dodru bo na kulia ti tumata na Ŋun kine‚ kodro nyadru ’bo’bodya ko i rugo na kulia ti Yesu kine‚ ŋiyu i kukuzu na Mosena ku kulia na wuwuro ti kakeyo kine itro. 24Ku’de ŋutulu kilo druga ’bo’bore i rugoni ku kulia na ta lepe kine‚ ku’de kilo aku rugo. 25Ku ko laga arerenya kase dridriŋini, kasiko i pilarani, Paulo druga takindra ko kulie le’de gele adi‚ “Yuka Nakiyena atakindra merenyezi kasu kilo soso ku kutu na kakeyoni laga Isaya adi: 26‘Utini ku ilo zuru de yu‚ ku taki ko adi‚ Yingana ta iyiyinga, ’bo ta aka yo’yuni, boŋadruna ta ibobonga, ’bo ta aka medrani. 27’Bo teili lo ilo zuru delo ayeŋundra a logo. ko yinga kulia kine pori pori ku suwo kase kilo‚ ko a’diza konye kase kilo‚ ka’bi ko ku medra ku konye kase kilo‚ ka’bi ko ku yinga ku suwo kase kilo‚ ka’bi ko ku yo’yu ku teiliko kase kilo‚ ka’bi ko ku lopugo ’beri ma na ku toruzo ko.’ 28Kuwade deneta de adi ina ritundro na Ŋun de asunyuzi ku Monyazi kilo yu. Ko iyiyinga!” [ 29Kugbo lepe laga atazu kine kulia de‚ Yahudi kilo druga pilara ti ko kilo i pipiza na ’beri kase dridriŋini ku teriŋi.] 30I kiŋazi mure katani giri ku lepe i sakani, Paulo yakiza kapa kanye lepe lepe kilo‚ ’bo lepe arukundro ŋutulu giri laga lo pondra kanyeni kilo. 31’Bo lepe atrugo kulia ti tumata na Ŋun ina‚ druga togo’yu kulia ti Mata Yesu Kristo kine ’ba kuze‚ ti le’de ŋutu lo gokindra lepe ’bayi.

will be added

X\