KONESI 27

1Kugbo ayuluki adi ti yi laŋadri Italia yu‚ ku Paulo ku ku’de ŋutulu laga a drodrora kilo atiki ku druma lo katiyu kama gelelo i kenini. Druma ŋanilo nye laga Yulio lo Tokore na Augusitonalo. 2Kugbo yi laga alubo i ki’bo ne’de na Adramutio naga na ilaŋadru i kezino naga i suburi kutu Asia yu kinena kata yu yi druga ŋiŋiyoro. ’Bo Aristariko lo Makedonia ŋiyu Tesalonike yulo autu ku yi kugele. 3Ku gbo’dini imalu de yi druga yeŋadru Sidona yu. Yulio gbo ku teili lo’bu ku Paulo‚ druga tikindra lepe kiko i utu ku worisi ti lepe kilo yu i rumbi na loko kasi ko yu. 4Ŋiyoro yu de yi druga laŋadru Kuporo i muko yu‚ igbonaga kobuŋena nu burundra yu de kaya koŋo yuna. 5Kugbo yi laga alaŋadru suburi laga ku Kilikia seku Pamfulia i koŋo yulo‚ yi druga yeŋadru Mura yu naga a kezi na Lukia. 6Yu de druma lo katiyu kama gelelo druga rumbi ki’bo na Alekezandria naga na ku laŋadru Italia yuna‚ druga tolubo yi kata yu. 7Kugbo yi laga aworo mada mada luŋazi ku’deŋa, yi druga yeŋadru nyoga ku Kinido yu‚ ’bo laŋadru nikana a nago. ’Bo ku naga ma kobuŋena gokindri yi kiko ina yi ayeŋadru Kurete i muko yu‚ ku Salimone nyoga yu. 8Kugbo utu nika naga nyoga suburi i kutuni naga a nago‚ yi druga yeŋadru i piri na luŋu a Kizito Na’bu ina yu‚ naga nyoga ku kezi na Laseana. 9Igbonaga baŋena arosodru a nazona‚ druga worona gbo a nago ti luŋa lo kukani nyosulo gbo’di arosodru, Paulo druga togo’yu ko‚ 10akulia adi‚ “Kilo ko dee‚ na medra adi worona ikokorozu kokorozu ku liki itro‚ agbo’da kokorozu na ki’bona ku kapazi laga katani kilo ka’deloni, ’bo yi ku ’beri itelikindro ru nikana itro.” 11’Bo druma lo katiyu kama gelelo ayinga kulia na ta drumalo seku monye ki’bolo alangu kulia na ta Paulo kine. 12Igbonaga kuti ŋanilo ani gbo’da a piri na’bu na sakani ŋutu i luŋa lo katirolona ŋutulu laga rodri kilo ayo’yu adi ti yi ŋiyoroni yu de i modyu laŋadru i kuti lo Kurete lo luŋu a Foinike, lo metadru ku go laga yeki lo ’doroni kololo seku lolowe lo ’doroni kololo ma se sakani yu de i luŋa lo katirolo ’busa. 13Kugbo kobuŋe na burundra na ŋiyu yeki lililina‚ ko druga rambu adi se romoki kondra be naga ma se yo’inina. Kuwade ko a’dukundro witi lo ki’bo laga a liretalo, ko druga laŋadru suburi kutu yu nyogoŋa ku Kurete. 14’Bo i bo na baŋe a naŋutru kobuŋe na luŋu a Eurakulona druga ŋiyu yu de‚ druga buradru yi. 15Kugbo kobuŋena naga adukundra ki’bona, yi aku romoki muwadru ’beri ku ki’bona i kobuŋe kata yu‚ yi druga kolokindro ’beri i ’dukuzi. 16Kugbo yi laga aworo i muko na sula na luŋu a Kauda ina‚ yi todya ki’bo natrina soso‚ ’bo tora ŋanina kodro a nago. 17Ku ko laga a’dokodru lepe ki yu‚ ko druga todya ki’bo naga a drumana ku lekerita. Igbonaga ko akuze adi se igupazi i Suriti ki ina‚ ko druga yokozu bongola naga ma kobuŋena buradri ki’bona kine kaŋo‚ ki’bona druga ’dukuzi ku kobuŋena kana. 18Kobuŋe ŋanina druga burundra yi koru, ’bo ku gbo’dini imalu de‚ ko druga poki i gumba na kapazi laga ma ko zongi kilo suburi kata yu. 19I luŋa laga togi musalalo ko druga gumba kapazi ti ki’bona kilo kaŋo ku kenisi kase kilo. 20I luŋa rodri kilo kolona ku kasiri kilo aku puru‚ kobuŋena druga burundra yi ’duu‚ kuwade i bo ŋanina yi adragu ’beri adi yi aka runi. 21Igbonaga ŋutulu kilo asaka ’ba nyosuto luŋa rodrina, Paulo druga lira kasiko i dridriŋini‚ druga kulia adi‚ “Kilo ko dee‚ kedri kodro ku ta laga ayinga kulia kuwe kine‚ ku ta aku laŋadru ŋiyu Kurete yu‚ kedri kodro yi aka rumbi ina drelia deni ku kokoroyi na kapazi kilonani. 22’Bo tinade‚ na takindra ta adi‚ gbo’dita ku teiliko logo‚ igbonaga le’de ŋutu ’bayi kasu dridriŋini lo itelikindro ru nanyena, ki’bona ka’delo nyena igbalaka. 23’Bo i ina mude de‚ malaikata lo Ŋun laga ma na gbo’dini a lo lepelo‚ laga ma na teminizi itrolo alira kuwe lagani. 24Lepe akulia ku na adi‚ ‘Paulo‚ ku kukuze‚ do ililira ku Kaisari i koŋo yu. Mete, Ŋun atikindra do ŋutulu giri laga lo woro kasi do kugele kilo.’ 25Kuwade‚ kilo ko dee‚ gbo’dita ku teiliko logo‚ igbonaga na arugo Ŋun‚ adi kulia kine iyeyeŋundra be naga ma lepe trukokindri nana. 26’Bo yi igupazi i sula ne’de ki yu.” 27Kugbo luŋa lo mude laga mere gele konye iŋmanilo laga ayeŋundra, i naga ma kobuŋena yegi yi we yu weni i suburi lo Adrialo kata yuna‚ beti tukaze kide de kakita ti ki’bo kilo druga rambu adi se iyeyeŋundra nyoga ku kana. 28Kuwade ko amodyu togulu na karelona druga rumbi adi mitazi meria iŋmani. Ŋero yu ’baziŋa ko amodyu ’do‚ arumbi mitazi meria musala. 29Ko akuze adi ŋona kobuŋena igupakindra yi i ŋoropo kine kini‚ kuwade ko druga biriŋodru witiko iŋmani laga a lireta kilo ka yu i ki’bo muko yu‚ druga magu Ŋun adi ti kana warini. 30Kakita ti ki’bo kilo druga ga’yu woke kaŋo i ki’bo katani‚ ko druga temizundro ki’bo natrina ka suburi kata yu‚ be naga ma se kodro nyadri biriŋodru witiko laga a lireta kilo i ki’bo kuwe yuna. 31Paulo druga takindra druma lo katiyu kama gelelo adi‚ “Kugbo kilo ŋutulu de ani saka i ki’bo katani‚ ta lepe aka romoki ritundro ’berini.” 32Katiyu kilo druga ŋedya pata ti ki’bo natrina kine druga kolodru lepe i ’duki. 33Ku gbo’dini i trari na ka‚ Paulo druga ma’yu mugu ku ko adi, ti ko nyosuni kapa, akulia adi, “Indikini a luŋa laga mere gele konye iŋmani laga ma ta mondrini ’ba nyosuto, ’bo ta aku wangu le’de kapatio tro. 34Kuwade na ma’yu mugu ku ta adi trotro ki’do nyosunita‚ i logu na ’beri kasu kine‚ igbonaga le’de kupita gele lasu lo kuwe aka liki kasunini.” 35Kugbo lepe laga atazu de‚ Paulo druga ’dumundra ’dilona, atikindra Ŋun iyetelo kasiko giri i koŋo yu‚ druga ŋoŋowuzu lepe‚ druga poki i nyosu. 36Ko druga yeŋundra ku teiliko logo‚ ko giri druga nyosu itro. 37’Bo yi giri agbo’da a ŋutulu kamazi mure ku meria burio konye bukiye i ki’bona katani. 38Kugbo ko laga ayiyimotu, ko druga biriŋodru kinyo kilo suburi kata yu i tikindra na ki’bona i gbo’da pa’de’de. 39Nyenaga kana kuwa awara‚ ko aku tritrimi ka ŋanina ’bo ko amedra kuti lo suburi lo gombu mugu ku sinyakilo, kuwade ko druga yo’yu adi ku roromoki ku se ri’diara ki’bona yu de. 40Ku ko laga alagu witiko laga a lireta kilo‚ ko druga kolokindro ko suburi kata yu. I bo ŋanina ko druga lakundra pata ti kade na pipirisani ki’bona kine. Ko druga redra bongo naga i koŋo na ki’bona ’do‚ adi ma kobuŋena buradri ki’bona ŋero yu suu i kuti yu. 41’Bo kugbo ko laga ayeŋadru i piri naga ma suburio mure kilo tomodyi ’berina, ki’bona druga riŋadru mugu i kuti yu. Kuwe na ki’bona druga ’bikindra mugu tritri ’bo muko na ki’bona apoki i ’be’belengu na mugu igbonaga pio kine agbongu lepe ku teriŋina. 42Katiyu kilo druga yoyolozu adi ti ko reme ŋutulu laga a drodrora kilo giri kaŋo‚ ka’bi le’de ŋutu ku muwadru kaŋo i woke. 43’Bo druma lo katiyu kama gelelo anyadru ritundro na Paulo druga gokindra ko i kondra na ŋo laga ma ko nyadrinilo. Lepe druga takindra kukuzu adi ŋutulu giri laga lo dendra muwadru kilo ti gupara ’beri a kayo suburi kata yu i yenga kaŋo yu. 44Ŋutulu ku’de kilo ti kepodri ko kaŋo yu i mbau kini, ku ku’de kapazi ti ki’bona kilo kini. Gbode ŋutulu giri druga ritundro ’beri yeŋadru suu kaŋo yu.

will be added

X\