KONESI 26

1Agiripa druga takindra Paulo adi, “Do roromoki tazu kulia konu kine.” Druga Paulo riodru kenisi kanye kilo, druga ’dodru bo nanye na kuliana adi: 2“Mata Agiripa, na rambu koŋo niona a na’bu ku naga ma na ’dodri bo nio na kuliana‚ ku kulia giri naga ma Yahudi kilo sosozi kuwe muguni kine konu koŋoni ina. 3’Bo do adeni soso gbiyeri giri ku piyesi giri ti Yahudi kilo‚ kuwade na ma’yu mugu ku do‚ yiŋe na ku teili laga mada. 4“Yahudi kilo giri adeni gbiyeri liolo ŋiyu kuwe toŋiro yu‚ i suluza naga ma na sakani i dridriŋi na zuru liolo yu‚ ku Yerusalema yu itrona. 5Ko adeni ’bero‚ kugbo ko nyadru ’dodru bo na kulia kuwe kine‚ adi na a Farisayota laga lo kepodru kazu bo na tokore naga ku puso koru i teminizo na kukuzu na Ŋun likalo. 6Tinade na lira i ŋera na kulia kuwe kine igbonaga na gbo ku yendru i sare lo saraki Ŋun ku merenyezi kaya kilonilo. 7Ketimito kaya naga mere gele konye mure kine gbo ku yendru i mondru na ilo sare de itro‚ ti ko teminizo Ŋun tukaze ku tupara ku puso. Ku kulia ti ina yendru de Yahudi kilo asosozu na‚ Mata! 8Ta medra adi kulia naga ma Ŋun toŋizi ŋutulu laga atatuwa kilo a kulia naga a riŋiko i rukoni gbandra ya? 9“Laga na, na kazu arambu adi ti na kondri konesi rodri i moro ku kari ti Yesu lo Nazaretalo. 10’Bo na akondra de Yerusalema yu. Na adrodrodya ŋutu ti Ŋun kilo rodri ku teriŋi naga ma ka’i’ila drumala kilo tikindri nana‚ ’bo ku ko laga atatuwi na akpeza roro lio i tatuwi nasikona. 11Na asasandru ko luŋa rodri i kadizi naga a momoreta kine kata yu druga na amodyu i ri’dikindra na ko i redra na rugo nasena. ’Bo igbonaga teili liolo atroro koru ku ko ina‚ na awowondru ko yeŋadru suu i kezino ti monyazi kilo kata yu. 12“Nyena utuni na Damaseke yu ku teriŋi naga ma ka’i’ila drumala kilo tikindri nana ku kukuzu nasikona itro. 13I tupara kideni‚ Mata‚ na abonga i kiko yu parara naga na molundro i ’diko yu naga na rodru parara na kolona‚ naga na mo’yu kuwe lagani ku ŋutulu laga lo woro kasi na kilo i lagani itro. 14’Bo kugbo ko giri laga a’do’do ka‚ na druga yinga roro lo takindra na ku kutu na Eberena adi‚ ‘Saulo‚ Saulo do wowondru na gbandra ya? ’Bo igbo’da a nago konuni i gboza na kapatio lo tyegu dolo.’ 15Na druga piza adi‚ ‘Do a ŋa ya‚ Mata?’ Matalo druga teyitokindro na adi‚ ‘Na a Yesu laga mo do wowondrilo. 16’Bo ŋine‚ lirani ki‚ igbonaga na apuru konuni ku kine kulia de‚ i gelundra na do i konakindra na na kita‚ i ’dodru na bo na kulia ti ŋo laga mo do medri kuweni kilo ku laga ma na ku kpekindri do kilo. 17Na iriritundro do i ŋutu ti Yahudi kilo ku Monyazi laga ma na ku sonyodri do kasiko yu kilo. 18Do iŋaŋazu konye kasiko kilo ma ko lopugi ’beri i mude yu i medra na parara‚ ŋiyu i teriŋi na Satanina yu i utu ku Ŋun yu‚ ma ko ku rumbi ’diya na torozi ku piri i dridriŋi na ŋutulu laga atokela ku ruko na na kilo.’ 19“Kuwade‚ Mata Agiripa‚ na aku redra ŋo lo kpikpiya lo puru i ’diko yulo‚ 20’bo na druga trukokindro ŋutulu laga Damaseke yu kilo kulia kine a kayo‚ i bo ŋanina druga i ŋutulu laga Yeruslema yu kilo‚ ku laga i ka na Yudaya kilo giri‚ ku Monyazi kilo itro‚ ma ko ku lopugi teiliko kase kilo i lopugo na ’beri ku Ŋun yu‚ ma ko ku kondri konesi naga na zukini lopugo nasiko na teilina. 21Ku kine kulia de Yahudi kilo amoga na i kadi na Ŋun ina kata yu druga kodro modyu tatuza na na. 22Yeŋundra tozo indikini Ŋun alogu na‚ kuwade na alira inide i ’dodru na bo na kuliana ku ŋutulu laga kiloŋadroo ku laga drumala kilo itro. Bo nio na kuliana aku tokodya mugu ku kulia naga kazu ma kakeyo kilo seku Mose kuliani adi ko iyeyeŋundra kine‚ 23adi Kristolo ti sanyani, ti gbo’dini a ŋutu laga a kayo lo ŋiye i dridriŋi na ŋutulu laga atatuwa kilo‚ ma lepe ku trukokindri Yahudi kilo ku Monyazi kilo itro kulia ti parara kine.” 24I naga ma Paulo ’dodri bo nanye na kulia dena‚ Feseto druga takindra lepe ku roro laga gboŋa adi‚ “Paulo‚ do mamali. Dendra nonu naga a drumana atikindra do i mali.” 25’Bo Paulo druga teyitokindro lepe adi‚ “Feseto lo sopo korulo‚ na agbo’da mamalini po! Na tazu kulia ti to’diri ku ti tobodo itro. 26’Bo matalo adeni kine kulia de gbo de‚ nyena kuliani na ku lepe ’ba kuze. Na lidra mugu adi le’de ŋo ’bayi ku kine kulia de i dridriŋini laga aku kpeza mugu ku lepe i konyeni, igbonaga kulia ŋani kine akona ’ba mumuza. 27Mata Agiripa, do arugo kakeyo kilo? Na ade‚ do arugo.” 28Agiripa druga takindra Paulo adi‚ “Kodro ’do’do‚ do nyadru lopugo na a Kristayota!” 29Paulo druga teyitokindro lepe adi‚ “Kugbo kodro ’do’do kugbo ŋeroŋa kpe‚ na ma’yu mugu ku Ŋun adi do‚ ku ŋutulu giri laga lo yinga na indikini kilo ti gbo’di be na‚ ’bo ’ba kilo maaroki de.” 30Matalo druga ŋi ki‚ kasi lo’bizolo ku Berenike, ku ŋutulu laga lo gbi’diki kasi ko kugele kilo. 31Ku ko laga alupodru kaŋo yu‚ ko druga kulia kase dridriŋini adi‚ “Ilo ŋutu de aku kondra ŋo laga lo ŋerakini lepe tuwa kuwa drodrora.” 32Agiripa druga teyitokindro Feseto adi‚ “Ilo ŋutu de kedri kodro kugbo aku nyadru utu ŋero ku Kaisari yu‚ kedri kodro lepe lalaka.”

will be added

X\