KONESI 25

1Kugbo Feseto laga ayeŋundra kanye kani, i bo na luŋa musala, lepe druga ŋiyoro Kaisaria yu i utu Yerusalema yu. 2Ka’i’ila drumala kilo ku Yahudi laga a ka’dola ti kuweto kilo druga sosozu kulia ti Paulo kine ku lepeni, druga ma’yu ’beri ku lepe ku teili lo trotro lo lepelo, 3adi ti lepe sonyoro Paulo Yerusalema yu, ti ko derengi atomodya kutuzi i telikindro na lepe i kiko. 4Feseto druga teyitokindro ko adi Paulo lu titiyu Kaisaria yu, ’bo nye kodro i utu yu de i bo na baŋe a naŋutru. 5Lepe druga kulia adi, “Drumala kasu kilo ti utini kasi na kugele, kuwade kugbo ŋutu ŋanilo gbo ku toro, ti ko sosozi lepe.” 6Kugbo lepe laga a’duteki kasiko i dridriŋini luŋa budro kuwa mere gele‚ lepe druga utu Kaisaria yu. Ku gbo’dini imalu de lepe druga gbi’diki i si’de na ŋerani kuliana kini‚ druga takindra kukuzu adi ti Paulo zuweni. 7Kugbo Paulo laga ayeŋundra‚ Yahudi laga lo ŋiyu Yerusalema yu kilo druga poki i sosozu na lepe ku kuliata na tomoni rodri‚ ’bo ko aku romoki kpekindra kuliata ŋani kine a kulia naga mŋgba. 8’Bo Paulo druga ’dodru bo nanye na kuliana adi‚ “Na aku kondra toro ku kulia ti kukuzu na Yahudi kilona‚ kuwa ku kulia ti kadi na Ŋun ina, kuwa ku kulia ti Kaisari.” 9’Bo Feseto kodro nyadru tikindra Yahudi kilo nyola, kuwade lepe druga piza Paulo adi, “Do nyadru utu Yerusalema ma kine kulia konu de ku ŋera yu de kuwe koŋo yu ya?” 10Paulo druga kulia adi, “Na alira i si’de na Kaisari na ŋerani kuliana i koŋoni. Nyadru ti ko ŋere kulia kuwe kine i ina piri de. Na aku kondra toro ku Yahudi kilo tro‚ be naga mo do dendrini koruna. 11Kuwade ku na laga a katoronyani‚ kuwa akondra le’de ŋo lo ŋerakini na tuwa‚ na ani ma’yu mugu adi ka’bi na ku tutuwa tro‚ ’bo kugbo kuliata naga ma ko sosozi na kine a ’busa‚ le’de ŋutu ’bayi lo romoki tikindra na kasikoni. Na lu tu ŋero ku Kaisari yu.” 12Feseto druga kulia ku kayolo kanye ti kuliata kilo kugele‚ druga teyitokindro Paulo adi‚ “Do nyadru utu ŋero ku Kaisari yu‚ ’bo do itutu ku Kaisari yu.” 13Nyenaga kugbo ku’de luŋa laga arodru‚ Agiripa laga a matalo druga yeŋundra Kaisariani seku Berenike i roma ku Feseto. 14Kugbo ko laga a’duteki yu de luŋa rodriŋa, Feseto druga trukokindro matalo kulia ti Paulo kine adi, “Le’de ŋutu ilo ini laga ma Felike kolokindri i drodrorenilo. 15Ma na gbo’dini Yerusalema yuna, ka’i’ila drumala kilo ku temezi ti Yahudi kilo asosozu kulia ku lepe kini i piza adi ti lepe ŋerakini kulia kine a naro. 16Na druga teyitokindro ko adi ani gbo’da a gbiyeri lo ŋutu ti Roma kilo i tikindra na le’de ŋutu ti inga ŋutu laga lo sosoyilo aku lira ku kasosoyi ti lepe kilo i koŋo yu tro, ti inga lepe aku rumbi koŋo gboŋa na ’dodrini lepe bo na kulia na soyini lepe kine. 17Kuwade ku ko laga atunudra ’beri kugele inide, na aku mondru, ’bo imalu de, na druga gbi’diki i si’de na ŋerani kuliana kini, druga takindra kukuzu adi ti ŋutu ŋanilo zuweni. 18Kugbo kasosoyi kilo laga aŋiye ki, ko aku sosozu lepe ku kuliata naro beti naga ma na rambinina. 19’Bo ko apipiza lepe ku kuliata ku’de naga ma ko teminizi mulete laselo‚ ku ti le’de ŋutu laga Yesu‚ laga atuwalo, ’bo laga ma Paulo kukuliani adi ilo zorulo. 20Igbonaga bo na kuliata ŋani kine atiga nana‚ na druga piza Paulo ku lepe nyadru utu Yerusalema yu ma kine kulia de ku ŋera yu de. 21’Bo ku Paulo laga anyadru utu ŋero yu druga piza adi ti nye tine i drodroreni i mondru na yoyolozu na Kaisarina, na druga takindra kukuzu adi ti lepe tine inga ku na iroromoki sonyodru lepe ku Kaisari yu.” 22Agiripa druga takindra Feseto adi‚ “Na lepe kodro nyadru yinga ilo marate de.” Feseto adi‚ “Do iyinga lepe imalu.” 23Ku gbo’dini imalu de Agiripa seku Berenike ku apondra ku sopo koru ko druga lubo i kadi na yiŋani kuliana kasi drumala ti katiyu kilo ku drumala ti kezi kilo itro. I bo ŋanina Feseto druga takindra kukuzu adi ti Paulo zuweni. 24Feseto druga kulia adi‚ “Mata Agiripa ku ŋutulu giri laga lo gbo’da inide ku yi kugele kilo‚ ta bonga ilo ŋutu de laga ma zuru lo Yahudi kilo giri Yerusalema yu ku inide itro ma’i ’beri kuweni ku kulia ti lepe kine‚ i resa adi ka’bi lepe ku gbogbo’da zorulo. 25Laga na aku rumbi adi lepe akondra le’de ŋo lo ŋerakini lepe tuwa. ’Bo ku naga lepe ku mugu ma nyadri utu ŋero ku Kaisari yu ina‚ na arugo i sonyodru na lepe. 26’Bo na ani gbo’da ku kulia naga mŋgba na wuroki mata liolo ku kulia ti lepe‚ kuwade na azondra lepe kasu koŋoni‚ alanguna konuni Mata Agiripa, adi i bo na pipiya na lepena‚ ma na gbo’da ku ku’de kulia na iwuwuro. 27’Bo kuwenina, na medra a kulia ti mali na sonyuzini ŋutu laga a drodroralo ’ba kulia na turani lepe kine.”

will be added

X\