KONESI 22

1“Luŋaseri ku monyezi kilo‚ yiŋeta bo na kulia naga ma na ’dodrini kasu koŋoni indikini kine.” 2’Bo ku ko laga ayinga lepe ikuliani ku kutu na Eberena, ko druga yiŋa ’du’du. Druga lepe kulia adi, 3“Na a Yahuditio laga ilo yuŋe Tarisea yu i ka na Kilikiana kata yu ilo. Na to’duro i ina kezi de katani, ku Gamalieli i moko, na atogolo soso ku kukuzu na merenyezi kaya kilona, ’bo na gbo ku puso ku kulia ti Ŋun kine be naga ta giri indikini ma gbo’dinina. 4Na kazu awowondru kilo ŋutu laga i ilo Kiko lo Matalo de kilo koru yeŋadru tozo i tatuza na ko. Na atotoroza lalia kilo ku wate kine i zonga na ko i drodrora. 5Ka’i’ilani laga a leŋgberelo ku temezi laga a kayolo ti kuliata kilo giri, ko lo romoki ’dodru bo nio na kuliana. Na kazu arumbi waragaki kasiko yu na ku zoŋa ku kulu luŋaseri ti Yahudi laga Damaseke yu kilo, nyena tuuni na yu de i momoga na kulu ŋutulu de, nyena ku zondri na ko ti atora Yerusalemani i tiki na ko i sasanya i ropani na toro. 6“Kuwade kuwe tu naga i kikonina‚ ku na gbo’di nyoga ku yenga Damaseke yu‚ ku kolona gbo’di nyoga be tupara kide, wuleŋa gele pararana druga molundro i ’diko yu koru druga mo’yu kuwe lagani. 7’Bo na druga ’duki kani druga yinga roro lo kulia ku na adi, ‘Saulo, Saulo do wowondru na gbandra ya?’ 8Na druga teyitokindro lepe adi, ‘Do a ŋa ya, Mata?’ Lepe druga teyitokindro na adi, ‘Na a Yesu lo Nazareta, laga mo do wowondrilo.’ 9’Bo ŋutulu laga lo gbo’da kasi na kugele kilo amedra parara ŋanina, ’bo ko aku yinga roro lo ŋutu lo kulia seku nalo tro. 10Na druga piza adi, ‘Na ikondra inyo, Mata?’ Matalo druga teyitokindro na adi, ‘Ŋine‚ uti Damaseke yu‚ ’bo kuliata giri naga anyumoki do i kona kine itataki do yu de.’ 11’Bo ku kulia ti parara na mo’yu koruna‚ na aku romoki i medra na kana tro‚ ’bo kilo ŋutu laga ma gbo’dini ku na kugele kilo‚ druga ’deba keni liolo i pikodru na na yeŋadru suu Damaseke yu. 12“ ’Bo le’de ŋutu nye laga Anania‚ a ŋutu laga lo ’delakindra mugu i teminizo na Ŋun be naga ma kukuzuna nyadrinina. Lepe akena a ŋutu lo’bu ku Yahudi laga lo saka yu kilo. 13Lepe apondra kuweni druga lira kuwe lagani‚ druga takindra na adi‚ ‘Luŋase Saulo‚ mete kana.’ ’Bo i lu luŋa de wuleŋa gele na druga memedra kana‚ druga na medra lepe. 14’Bo druga lepe kulia adi‚ ‘Ilo Ŋun laga lo merenyezi kayalo anyumundro do i dendra na kulia naga ma nye nyadri kine‚ i bonga na Ŋutu laga Mŋgba. Ilo‚ i yinga na roro lo lupundro ku lepe i kutuni ilo. 15’Bo do igbo’da a ka’dotoni lo bo na kulia ti lepe kine ku ŋutulu kilo giri i koŋo yu ku kulia naga mo do bongi kine‚ ku naga mo do yingi kine. 16’Bo tinade do lo mondru inyo? Ŋine ki‚ ’depe baputizilo, ’bo lalaara torozi konu kine kaŋo i naga mo do lungi kari ti lepe kine ina.’ 17“Kugbo na laga ayitozi Yerusalema yu, kuwe magu naga i kadi na Ŋun ina kata yuna‚ na druga poki i medra na le’de ŋo kuwe rambuni be na rudesina. 18Na amedra Matalo i takindra na na‚ adi‚ ‘Ŋine ki‚ lupodri Yerusalemani kaŋo wuleŋa gele‚ igbonaga ko aka yinga bo na kulia kuwe naga mo do ’dodrini kineni.’ 19Na druga kulia adi‚ ‘Mata‚ ko lepe adeni adi na kazu amomoga ŋutulu laga lo rugo do kilo i kadizi naga a momoreta kine kata yu i zonga na ko i drodrora kata yu i kpinya na ko. 20’Bo i ’buko na rima ti Setefano laga a ka’dotoni lo bo nonu na kulia kine‚ na lepe alira yu de i rugo na kulia ŋani kine i tizu na bongola ti karemo ti lepe kilo. 21Druga lepe takindra na adi‚ ‘Uti‚ igbonaga na isonyodru do pazo ku Monyazi kilo yu ina.’ ” 22Ko ayinga kulia na ta lepe kine yeŋadru tozo i kine kulia de‚ ’bo i bo ŋanina ko druga resa ku roroto laga gboŋa adi‚ “Ŋutu laga be ilo delo ku tukarakini kaŋo i kani‚ igbonaga ani romoki adi ti lepe gbo’dini zoru!” 23Ku ko laga aresa de, ko druga yiyingo bongola kase kine‚ ko druga troŋundra putru kine druga ratadru ki yu. 24Druga druma lo katiyulo takindra kukuzu adi ti lepe zoŋani i mari na katiyuna kata yu‚ druga takindra kukuzu adi ti lepe kpinyani kpinya ma nye dendrini kulia naga ma ko resani ku lepe kini kine. 25Ku ko laga atodya Paulo ku gerena‚ lepe druga piza druma lo katiyu kama gele lo lira nyoga ilo adi‚ “Ŋona kukuzuna arukokindro ta i kpindra na ŋutu lo Roma ti inga kulia kine aku ŋera ya?” 26Druma lo katiyu kama gelelo ku yingi kulia ŋani kine de‚ lepe druga tu ku takindra druma lo katiyu girilo adi, “Do ikondra inyo? Lo ŋutu de a ŋutu lo Roma.” 27Kuwade druma ŋanilo druga pondra ku Pauloni i piza na lepe adi, “Trukoki na, do a ŋutu lo Roma a ’diri ya?” Paulo druga teyitokindro lepe adi, “Iye.” 28Drumalo druga teyitokindro lepe adi‚ “Laga na‚ na gborundro gbo’da naga a Romana ku gbore naga ki.” ’Bo Paulo druga teyitokindro lepe adi, “ ’Bo laga na, na ayuŋe a ŋutu lo Roma.” 29Kuwade ŋutu laga kodro lo kpindra Paulo kilo druga kokoko lepe agbole. Druma lo katiyulo druga gbo ku kuze itro igbonaga lepe adeni Paulo a Romana‚ igbonaga lepe atodya lepe kedrina. 30’Bo ku gbo’dini imalu de‚ i naga ma druma lo katiyulo nyadri dendra bo na kulia naga ma Yahudi kilo sosozi ku Paulo kini kine ina‚ druga lakundra lepe‚ takindra ka’i’ila laga drumala kilo kukuzu ku ŋutulu laga a kayolo ti kuliata kilo adi ti ko tune ’beri giri kugele‚ lepe druga zondra Paulo ku tolirakindra lepe kasiko i koŋoni.

will be added

X\