KONESI 21

1Kugbo yi laga akolokindro ko, yi druga pilara i ki’bo kata yu druga yi laŋadru gbogbo yeŋadru Koo yu‚ imalu de yi druga laŋadru Rodo yu‚ ’bo ŋiyoro i nu ka de yi druga laŋadru Patara yu. 2’Bo kugbo yi laga ario ki’bo naga na laŋadru Foinike yuna‚ yi druga lubo kata yu, druga yi lalangu. 3’Bo ku yi laga amedra Kuporo‚ yi druga kolokindro ka ŋanina i keni lika lo kaduŋelo‚ druga yi laŋadru Suria yu‚ i lupoziniki Turo yu‚ kuti naga na tolupozini kapa laga lo zuwe i ki’bo katani kilo. 4Ku yi laga agaladru lotodiniki kilo‚ ku yi ario‚ yi druga ’duteki yu de luŋa burio. Ŋutu ŋani kulu atakindra Paulo ku teriŋi na Yuka Nakiyena adi ka’bi lepe ku ututu Yerusalema yu tro. 5Luŋa ŋani kilo ku alenga‚ yi druga pilara kaya kiko laga ma yi utunilo. Ko giri‚ wate ku ŋazi kilo itro‚ druga nyomodru yi suu i kezi kutu yu‚ ’bo suburi i kutu yu yi druga ruguŋo ka i magu na Ŋun‚ druga yi kolokindro ko. 6Yi druga lubo i ki’bo kata yu‚ ’bo ko druga yitozi bo kase ’beŋito yu. 7Ku yi laga alaŋadru i ŋiyoro nika naga Turo yuna‚ yi druga yenga Petolemai yu. Yi druga aroma ku luŋaseri kilo yu de‚ yi druga ’duteki kasiko yu luŋa gele. 8Ku gbo’dini imalu de yi druga pilara‚ yeŋadru Kaisaria yu‚ yi druga lubo ku Filipo kadi yu‚ lepe a katrukoni lo kuu na’buna laga a ŋutu gele i dridriŋi na ŋutulu burio kilo‚ druga yi ’duteki i saka kasi lepe. 9Lepe gbo ku ke’diti iŋmani naga inga aku lunya‚ naga na kezu kulia kine. 10’Bo i naga ma yi ’dutekini luŋa ku’de yuna‚ kakeyoni le’de‚ kari ti lepe kine se naga Agabo lu ŋiyu Yudaya yu. 11Ku apondra kayani‚ lepe druga lakundra kapa naga ku Paulo i mukonina‚ druga todya moko lonyelo, ku kenisi kanye kilo‚ druga kulia adi‚ “Yuka Nakiyena akulia de‚ ‘Yahudi laga Yerusalema yu kilo itotodya ŋutu laga a monye lo ina kapa delo deŋa, ko itikindra lepe ku Monyazi kilo i kenisi.’ ” 12Ku yi laga ayinga kine kulia de‚ yi kasi ŋutulu laga yu de kilo druga ma’yu ’beri ku Paulo adi ka’bi lepe ku ututu Yerusalema yu. 13’Bo lepe druga teyitokindro yi adi‚ “Ta kilo kondra de gbandra? Gbigbiyetu nasuna tikindra na luŋuli koru. ’Bo na agbo’da kukundra mugu i tora ka’deloni‚ ’bo i tuwa Yerusalema yu ku kari ti Mata Yesu kine.” 14Kugbo lepe laga a’biye ku ’bo’bora, yi druga koko‚ druga yi kulia adi, “Ti Matalo kondrini be naga ma lepe nyadrinina.” 15I bo na kilo luŋazi de‚ yi druga tundra kapazi kaya kilo‚ druga tu Yerusalema yu. 16Ku’de lotodiniki laga Kaisaria yu kilo druga utu kasi yi kugele i nyomodru na yi ku Manasona laga a Kuporotiolo kadi yu‚ lepe a lotodinikita lo ’berolo‚ yi druga ku toto ku lepe i ’ba yu a komo. 17Ku yi laga ayeŋadru Yerusalema yu‚ luŋaseri kilo druga rukodru yi ku nyola koru. 18Ku gbo’dini imalu de Paulo druga utu kasi yi kugele i medra na Yakobo, ku temezi ti tomore na karuko kilo giri ti kulu yu de itro. 19Ku lepe laga aroma ku ko, lepe druga trukokindro ko kulia gele gele naga ma Ŋun kondrini i dridriŋi na Monyazi kilo ku kita nanyena kine. 20’Bo ku ko laga ayinga de, ko druga pupudya Ŋun. Ko druga takindra lepe adi, “Luŋase, mete, Yahudi laga arugo kilo, ko alifuki mudaa, ’bo ko giri gbo ku puso koru i kondra na kukuzuki kine. 21’Bo ko ayi kulia konu kine adi do atogo’yu Yahudi lo gbo’da ku Monyazi kilo i dridriŋi yu kilo giri adi ti ko koloki kukuzuki ti Mose kine, ’bo do atakindra ko adi ka’bi ko ku tataaro ŋazi kase kilo tro, ka’bi ko ku ’de’de gbiyeri lo Yahudi kilo itro. 22Ma yi kondra inyo? Kilo ŋutu de aka zara yinga na kulia ti yeŋundra nonuna kineni. 23Kuwade kone kulia naga ma yi takindri do kine. Ŋutulu kilo inide iŋmani laga asarakindra Ŋun le’de ŋo kilo. 24Zoŋe kilo ŋutu de, tokele mugu kasi ko kugele, ’bo rope riye na ŋeraki ko kine, ma ko ’barandri kupi kilo ’busa. Gbode ŋutulu giri idendra a ’diri adi kulia naga ma se yingi konu mugu kine a kulia naga a ti ’bure, a ’busa, ’bo do lepe a ŋutu laga lo woro soso be naga ma kukuzuna nyadrinina. 25’Bo ku kulia ti ŋutulu laga a karuko ku Monyazi kilo i dridriŋi yu kilo, yi kazu asunyukindro ko waraga na kpeza kulia naga ma yi ŋedyini kine‚ adi ti ko pane kapa laga a ’i’ileta ti muloko laga a ’busa ’busa kilo kaŋo‚ ku rima kine‚ ku kapa laga lo dridriro kilo‚ ku konye lopi.” 26Paulo druga zonga ŋutu ŋani kilo. Ku gbo’dini imalu de lepe druga toke’ya mugu kasi ko kugele, druga lubo i kadi na Ŋun ina kata yu i trugo adi luŋa lo tokelani ’beri kilo ilenga nanu ti inga ko aku tikindra kapa laga a ’i’ileta kilo ku kulia kase kine gele gele. 27Luŋazi burio kilo ku gbo’di nyoga ku lenga‚ Yahudi laga lo ŋiyu Asia yu‚ lo medra Paulo i kadi na Ŋun ina kata yu kilo‚ ko druga toŋizu teiliko ti ŋutulu kilo i moga na lepe. 28Ko druga resa adi‚ “Ta laga a ŋutu ti Isiraeli kilo‚ loketa yi po! Ilo ŋutu de lo togo’yu ŋutulu i piritoni giri i moro ku ŋutulu kaya kilo‚ ku kukuzuna, ku ina kadi de itro. Agbo’da kilo ŋo de ka’deloni, ’bo lepe azondra Monyazi ku’de kilo i kadi na Ŋun ina katani itro, akokorozu ina piri naruruwana de.” 29Igbonaga ko amedra Trofimo laga lo Efesolo i kezi ŋanina kata yu seku Paulo kugele ina, ko druga yo’yu kase teilikoni ŋona Paulo azonga lepe i kadi na Ŋun ina kata yu itro. 30Ŋutulu laga kezini kilo druga toŋiyu giri‚ druga wo kugele‚ ko druga moga Paulo druga pikodru lepe kaŋo i kadi na Ŋun ina katani druga ko kikini kaakutuzi kine agbole. 31I naga kodro ma ko ga’ini kiko lo tatuwini lepelona‚ kulia naga ma ŋutu ti Yerusalema kilo giri kokorozi ’beri ku resa kine druga kuworo ku druma lo tokore na katiyu kilo yu. 32Lepe druga zonga katiyu‚ ku drumala ti katiyu kama gele kilo kugele‚ druga wo kasiko yu. Ku ko laga amedra druma ŋanilo ku katiyu kilo‚ ko druga koko gbudro na Paulo. 33Druma lo katiyulo druga pondra i moga na Paulo druga takindra kukuzu adi ti lepe torani tora ku maaroki mure. Lepe druga piza adi Paulo a ŋa, ’bo akondra inyo. 34Ti ku’de kilo ŋutulu i mongoyo katani kulu iresa ku kulia nagele‚ ku’de kilo ku kulia ku’de‚ kuwade ku kulia ti reresatu ŋanina lepe aku romoki i dendra na bo na kulia kine‚ lepe druga takindra kukuzu adi ti lepe zoŋani i mari na katiyu kilona kata yu. 35Kugbo Paulo laga ayeŋundra i piri na kiyaziniki ki kadi yuna‚ katiyu kilo druga ’dokodru lepe‚ ku kulia ti teriŋi na ŋoma na mongoyo na ŋutulu kilona. 36’Bo mongoyo kilo druga kepodru lepe‚ ti kilo iresa adi‚ “Ti lepe tukarakini kaŋo!” 37Kugbo ko laga nyoga ku tolubo Paulo i mari na katiyu kilona kata yu‚ lepe druga piza druma lo katiyu kilo adi‚ “Na ŋona roromoki kulia seku do ya?” Lepe druga teyitokindro lepe adi‚ “Do adeni kutu na Girikina ya? 38Do ani gbo’da a Ezipetotio laga lo suluza kazu moro i luŋa lo rosodrulo, laga lo ’dolakindra karemo laga alifu iŋmani kilo kuwe i diŋo kata yu ilo ya?” 39Paulo druga teyitokindro lepe adi, “Na a Yahuditio, lo ŋiyu Tarisea i ka na Kilikiana kata yulo, kezi ŋanina a kezi naga a kukaki, ’bo na ma’yu mugu ku do adi koloki na ku na kuliani ku kilo ŋutulu de ki’do.” 40Ku drumalo laga arukokindro lepe, Paulo druga lira i piri na kiyaziniki kadi yuna kini, druga goza ŋutulu kilo ku keni. Ku ko laga ayiŋa tali‚ lepe druga takindra ko ku kutu na Eberena adi:

will be added

X\