KONESI 20

1Kugbo reresatu ŋanina naga akolo‚ Paulo druga luŋundra lotodiniki kilo‚ druga ru’ya teiliko kasiko kilo‚ druga kolokindro ko‚ druga lepe pilara Makedonia yu. 2Kugbo lepe laga autu i kine kazi de kata yu‚ lepe druga ru’ya teiliko ti ŋutulu kilo koru, druga yeŋadru i ka na Girikina kata yu. 3Lepe druga ’duteki yapazi musala yu de, ’bo kugbo Yahudi kilo laga atomodya kutuzi i moga na lepe i naga ma lepe pilarani i laŋadru Suria yu ina‚ lepe druga yo’yu yitozi naga bo ku kiko lo Makedonialona. 4’Bo Sopatero laga lo Beroya, laga a ŋiro lo Purolo‚ autu seku lepe kugele‚ ku Aristariko seku Sekundo laga a ŋutu ti Tesalonike kilo‚ ku Gayo laga lo Derebelo ku Timoteo‚ ku Tukiko seku Trofimo laga a ŋutu ti Asia kilo. 5Kilo ŋutulu de druga utu ŋero yu i mondru na yi Troa yu‚ 6’bo yi druga ŋiyu Filipi yu ku ki’bo i bo na kolo druma naga na nyeini mugati naga ’ba kapena‚ druga i bo na luŋa mukana yi yeŋadru kasiko Troa yu i piri naga ma yi ’dutekini luŋa buriona. 7I luŋa laga a kayo i bo na sabatolo‚ kugbo yi laga atunundra ’beri kugele i gbegbenyeza na mugati, Paulo druga trukokindro ko kulia, igbonaga lepe ayo’yu adi imalu nye ilo ipipilarana‚ druga lepe trugo kulia kine yeŋadru tozo tukaze kide yu. 8I piri naga ma yi tundri ’beri kata yuna‚ kimazi rodri kata. 9Ti ’bulani le’de lu yu de‚ kari ti lepe kine se naga Eutiko‚ ti lu agbi’diki i derisa‚ atotoozi liyu liyu kaŋo igbonaga Paulo akuliazi ’derrina. Igbonaga totona aleŋ lepe ina, lepe druga ’duu ŋiyu ki yu i ŋere na kadi naga a togi musalana kata yu kani, druga ’duke ti a’doro. 10Paulo druga kiyundra ka ku lepeni, druga mutukundra lepe, druga kulia adi‚ “Ku luluzota luluzo‚ igbonaga lepe inga ilo zoruna.” 11Ku Paulo laga akiyadru ki yu, ku agbegbenyeza mugati kine druga nyosu, kugbo lepe laga akulia kasi ko baŋe a nazo yeŋadru tozo i wara na ka, lepe druga pipilara. 12Druga kara zonga ŋiro ŋanilo zoru‚ ti ko arumbi ruda na teiliko koru. 13’Bo yi druga utu ku ki’bo ŋero yu‚ yi druga laŋadru Aso yu i piri naga ma yi ku dodogi Paulo nu‚ igbonaga lepe apedra de‚ adi nye itu ku moko. 14Kugbo lepe laga arumbi yi Aso yu‚ yi druga tolubo lepe i ki’bo kata yu‚ druga yi yeŋadru Mitulena yu. 15Ku gbo’dini imalu de yi druga laŋadru yeŋadru Kio i koŋo yu. I luŋa lo murelo yi druga yeŋadru Samo yu‚ i luŋa lo musalalo yi druga yeŋadru Mileto yu. 16’Bo Paulo kodro nyadru rosodru Efeso gbogbo‚ ka’bi nye ku ’duteki Asia yu luŋa rodri‚ igbonaga lepe nyadru yenga Yerusalema yu wuleŋa ku roromoki, ti luŋa lo Pentekositolo inga aku yeŋundra ina. 17Ŋiyu Mileto yu lepe druga sonyodru ŋutu Efeso yu i lungu na temezi ti tomore na karuko kilo kanyeni. 18Druga ku ko laga apondra ku lepeni‚ lepe druga takindra ko adi‚ “Ta ku ’beri adeni gbiyeri lio laga kasu dridriŋi yulo mu luŋa ŋiyu i luŋa laga a kayo ma na yengi Asia lu. 19Na akondra kita na Matalona ’ba pudya na mugu ku ŋolita‚ ku sasanya naga na pondra kuwe kini ku naga ma Yahudi kilo tomodyi kutuzi kine kuwe mugunina. 20Na aku kolokindro kulia ku’de naga na romoki i logu na ta kine tro‚ ’bo na atogo’yu ku ŋutulu i koŋo yu gboŋa‚ ku mu kadizi kine itro. 21Na a’dodru bo na kulia ti lopuko na teili ku Ŋun yu kine‚ ku ti ruko na Mata lika Yesu Kristo kine‚ ku Yahudi kiloni‚ ku Monyazi kiloni itro. 22Tinade meteta‚ na lu tu Yerusalema yu‚ ku kukuzu na Yuka Nakiyena. Na aku de adi inyo lo iyeŋundra kuwe kini yu de‚ 23’bo Yuka Nakiyena ’dutukindro na bo na kulia adi i kezino giri kata yu drodrorena ku sasanyana nu momondru na. 24’Bo kuwe konyeni ru niona ani gbo’da a ŋo laga mŋgba‚ ’bo na ani kendra lepe a kulia naga a drumala kuweni uye‚ kugbo na roromoki tutuzo woro niona ku kita naga ma na rumbini ku Mata Yesu i’dodru na bo na kulia ti kuu na’bu na ’busa na’bu na Ŋun kine. 25Tinade na adeni adi ta laga ma na trukokindri kulia ti tumata kine kilo aka bonga koŋo niona ’doni. 26Kuwade, na ’dutukindro ta bo na kuliana i ilo luŋa de adi kugbo le’de ŋutu kasu dridriŋini laga akaraki, na gbo’di ’ba toro. 27’Bo na aku kolokindro trukokindro na ta kulia giri naga ma Ŋun kpezi kine. 28Gbo’dita go‚ ta ku ’beri ku kebilizi naga Yuka Nakiyena ma tikindri ta i gbo’da a kayuku ŋani kilo‚ a katiyu ti tomore na karuko ti Ŋun kilo‚ ’bo lepe agbodru tomore ŋanina ku rima kanye kine. 29Na adeni adi ku na laga autu‚ rarawuki loro ipopondra kasu dridriŋini, laga lo igbo’da ’ba ediyo ku kebilizi ŋani kine. 30Kasu dridriŋini ŋutulu ku’de iŋiŋiye i togo’yu na kulia naga a birigo kine‚ i luluga na lotodiniki kilo i pikodru na ko kase bo yu. 31Kuwade gbo’dita ku konye‚ i yo’ini adi i kiŋazi musala katani na aku kolokindro i toyulukindro na ta ku ŋolita‚ tukaze ku tupara. 32Tinade na lo kolokindro ta ku Ŋun ni ku kulia ti ’busa na’bu na lepe naga na romoki i to’durodru na ta ku i tikindra na ta koŋo na’bu ku ŋutulu laga ma lepe ’delakindri a kanye kilo kugelena. 33Na aku sukindro konye i riye ti le’de ŋutu kuwa drumo kuwa bongola kini. 34Ta ku ’beri adeni adi ku kilo kenisi de na akonakindra mugu kita‚ ku ŋutulu laga lo gbo’da kasi na kugele kilo. 35I kuliata giri katani na akpekindra ta adi ku yi kondra kita de‚ yi roromoki logu ŋutulu laga ’ba teriŋi kilo. Kuwade yoleta kulia na ta Mata Yesu kine adi‚ ‘Koŋo na’buna ina ku ka’dokanilo alangu ŋutu laga lo ’do’dokalo.’” 36’Bo kugbo Paulo laga akulia de‚ lepeŋa druga ruguŋo ku kuŋusi ka i magu na Ŋun kasi ko giri kugele. 37Ko giri druga gbigbiye druga mutuga Paulo‚ druga nyu’ya gbangiria ti lepe kilo. 38Ko druga gbo ku luŋuli ku kulia naga ma lepe tazi kine, adi ko aka bonga koŋo nanyena ’doni. Druga ko nyomodru lepe i lubo i ki’bo kata yu.

will be added

X\