KONESI 19

1Ku Apolo lu Korinito yu, Paulo druga rosodru i ka naga yekina, druga yeŋadru Efeso yu. Yu de lepe rumbi ku’de lotodiniki. 2Lepe druga piza ko adi‚ “Ta kazu rumbi Yuka Nakiyena i luŋa lo ruginita lu ya? Ko druga teyitokindro lepe adi‚ “ ’Bayi‚ yi inga aku yi adi Yuka Nakiye ŋanina kata.” 3Druga lepe piza ko adi‚ “Ta a’deba baputizi laga ya?” Kara druga teyitokindro lepe adi, “Baputizi lo Yoanelo.” 4Druga Paulo kulia adi‚ “Yoane atikindra baputizilo i naga ma ŋutu lopugi teiliko kasena‚ i takindra na ŋutu kilo adi ti ko rugi ŋutu lo ipopondra kanye bonilo lu de‚ ŋolo a Yesu.” 5Ku ko laga ayinga kine kulia de ko druga ’deba baputizilo i kari ti Mata Yesu kine. 6Kugbo Paulo laga atanyakindra kenisi kanye kilo kasiko kini‚ Yuka Nakiyena druga kiyundra ka kasiko kini‚ ko druga poki i kulia ku kuliesi ka’de ka’de‚ druga trugo kulia ti Ŋun kine. 7Ti ko giri beti a lalia mere gele konye mure. 8Nyenaga Paulo druga lubo i kadi naga a momorena kata yu‚ druga trukokindro ŋutulu kilo kulia kine ’ba kuze yapazi musala‚ druga togo’yu ko‚ i’bo’borundra na ko ku kulia ti tumata na Ŋun kine. 9’Bo ŋutulu ku’de kilo kasiko i dridriŋini gbo ku teiliko logo, ko aku rugo tro‚ druga ’dadru Kiko lo Matalo ku mongoyo na ŋutulu kilo i koŋoni‚ lepe druga ’dotodru mugu kasiko i dridriŋini‚ ’bo azonga lotodiniki kanye kilo itro‚ druga togo’yu kulia kine mu luŋa i kadi na Turano na togoloni kulia nu kata yu. 10Lepe druga kondra de kiŋazi mure‚ kuwade ŋutulu giri laga Asia yu kilo ayinga kulia ti Matalo kine‚ Yahudi kilo ku Giriki kilo itro. 11Ŋun druga kondra konesi naga ku teriŋi naga bita aku meta mu luŋa de kine ku keni lo Paulolo. 12Kuwade kitambalaki ku bongola naga ma lepe yakizi kine a’dumazi kaŋo, druga tiki ku ŋutulu laga ku ’beri na mimiye kilo, druga tatuwa kine koko’yu, ’bo yukala naro kine druga lupundro kaŋo kasiko katani. 13’Bo Yahudi ku’de lo woro a kapaka kilo druga modyu i lungu na kari ti Mata Yesu ku ŋutulu lo gbo ku yukala naro kilo kini adi, “Na pagu ta ku Yesu laga ma Paulo trugi kulia ti lepe kinelo.” 14Ŋazi burio ti le’de Yahuditio laga a ka’i’ilani laga a leŋgberelo, kari ti lepe kine se naga Sekeva, se lo kondra kine kulia de. 15’Bo yuka narona druga teyitokindro ko adi, “Yesu na ade, ’bo ba adeni kulia ti Paulo kine itro, ’bo laga ta a kuŋa ya?” 16Druga ŋutu laga ku yuka naro ilo labara kasiko ki yu, i tiga na ko giri ku teriŋi nanyena, ko druga wowokoro i kadi ŋanina kata yu kaŋo a pililia ti ’beri kine arorotonyo a ’dikasi. 17Kine kulia de druga denazi ku ŋutulu giri ti Efeso kilo, ku Yahudi kilo ku Giriki kilo itro, druga kuzena moga ko giri, ’bo kari ti Mata Yesu kine druga pupura. 18Ŋutulu rodri ku karuko kilo i dridriŋini druga pondra i tolupundro na drodropoza nasena. 19Ŋutulu ku’de lo kondra wonyesi kilo druga tunundra bukulo kase kine kugele, druga tonoga ko kaŋo ku ŋutulu giri i koŋoni. Ko druga kendra gbore na bukulo ŋani kine, rumbi ti ayeŋundra a silingi alifu meria mukana. 20Kuwade kulia ti Ŋun kine druga ’du’dudyo ku teriŋi koru. 21Nyenaga i bo na kine kuliata de Paulo a’delakindra teili i rosodru purie Makedonia ku Akaya yu i utu Yerusalema yu‚ druga kulia adi‚ “I bo naga ma na utuni yu dena‚ nyadru ti na mete Roma itro.” 22Ku lepe laga asonyodru ŋutulu mure i kaloko kanye kilo i dridrinini laga ku Timoteo seku Erasito Makedonia yu, lepe ku mugu druga ’duteki Asia yu luŋa ku’de. 23I nu baŋe de reresatu naga koruna druga kuu Efeso yu ku kulia ti Kiko lo Mata lu de. 24Le’de ŋutu, kari ti lepe kine se naga Demeturio, laga a kanitoni lo riye, laga lo kukundra kadizi ’bazi’bazi ti oriya ti mulete naga Diana kilo ku riyelo, laga lo zakindra kakukuna ŋani kilo rezema laga a drumalo. 25Kuwade lepe druga tunundra ŋutulu ŋani kilo kugele, kasi kakita laga lo gbo’da be karaŋa kilo itro, druga kulia adi, “Kowu kilo, ta adeni adi yi rumbi rezema likalo i ina kita de katani. 26’Bo ta abo‚ ta ayi adi‚ ilo Paulo de aluluga ’bo alopugo ŋutulu rodri‚ adi muloko laga lo kukuna ku kenisi kilo ani gbo’da a muloko laga mŋgba‚ agbo’da Efeso katani ka’deloni‚ ’bo ’do’do Asia katani giri. 27Kuwade kita nikana roromoki kokoreyi ku ŋutulu kilo i konyeni, ’bo kadi na mulete naga Diana ina roromoki meta a ’busa itro‚ ’bo lepe naga ma Asia ku kana giri teminizi ina roromoki temize ka.” 28Ku ko laga ayinga kine kulia de‚ ko druga ŋoŋoma‚ druga resa adi‚ “Diana naga na Efeso ina a druma!” 29Kuwade ŋutu ti kezi kilo druga reresa koru druga ko buradru i piri na konani biroto ina kata yu kugele‚ ’bo kasiko i wokeni ko apipikodru ku Gayo seku Aristariko laga a ŋutu ti Makedonia lo woro kasi Paulo kugele kilo. 30Paulo kodro nyadru i utu ku ŋutulu kilo i dridriŋi yu‚ ’bo lotodiniki kilo druga goki lepe kaŋo. 31’Bo drumala ku’de laga a ka’dola ti kuwe ti Asia‚ laga a worisi ti lepe kilo druga sonyodru ŋutu ku lepe yu‚ druga ma’yu ’beri ku lepe adi ka’bi ku ututu i piri na konani biroto kine kata yu. 32Nyenaga ku’de kilo ŋutulu resa ku kine kulia de‚ ku’de kilo resa ku kunu kulia de‚ igbonaga mongoyo na ŋutulu kilona abayi‚ ’bo ŋutulu rodri aku de adi se pondra inide i nyona. 33Ku’de kilo ayo’yu adi Alekezanda laga ma Yahudi kilo tolupundri ku ŋutulu i koŋo yulo nyelo zondra kulia kine. Lepe druga goza ŋutulu kilo ku keni igbonaga lepe nyadru ’dodru bo na kulia ku ŋutulu i koŋo yu. 34’Bo kugbo ko laga adeni adi Alekezanda ŋanilo a Yahuditio, ŋutulu kilo giri druga reresa ku roro gele i sawa mure adi‚ “Diana naga na Efeso ina a druma.” 35Kugbo kawuroni lo kezilo laga atikindra mongoyo kilo i yiŋa tali, lepe druga kulia adi‚ “Ŋutu ti Efeso kilo, ŋutu laga a ŋa laga aku deni adi kezi na Efesona a katiyuni na kadi na Diana naga a drumana, ku na ŋo laga a’duki ka ŋiyu i ’diko yulona ya? 36Kilo ŋo de ani romoki rerenyaniki, kuwade yiŋanita tali, ’bo ku kokonuta le’de ŋo ’ba yo’yu. 37’Bo ta azondra kilo ŋutulu de inide laga aku kokorozu kadi na muletena, aku momorozu mulete nikana. 38Kuwade Demeturio kugbo kakita laga a bodoki laga ku lepe kugele kilo kugbo gbo ku kulia ku le’de ŋutu, luŋazi lo ŋerani kuliata kata, ’bo lo’bizoki ti Roma kilo kata, ti ko ture ’beri kasiko yu. 39’Bo ku ta laga gbo ku kulia ku’de, kulia ŋani kine roromoki yiŋa i luŋa lo tayini kuliata lu kata yu, beti naga ma kukuzuna nyadrinina.” 40’Bo indikinina ŋona kulia kaya kine iŋeŋeri ’beri a naro ku kine kuliata na resaniki ’ba bo kine de, igbonaga yi igbo’da ’ba kulia na teteyitoki ku kulia ti ina pepena naga ku ŋomana de. 41’Bo kugbo lepe laga atazu kine kulia de, lepe druga teririza mongoyo kilo kaŋo.

will be added

X\