KONESI 18

1I bo ŋanina Paulo druga ŋiyoro Atenai yu‚ druga tu Korinito yu. 2Druga lepe rumbi le’de ŋutu a Yahuditio lo yuŋe Ponto yulo‚ kari ti lepe kine se naga Akula‚ ti lepe inga yeŋundra seku noka nanye naga Pirisila ŋiyu Italia yu‚ igbonaga Kilaudio atakindra Yahudi kilo giri kukuzu adi ti ko lupodri Romani kaŋo. Druga Paulo tu kasiko yu. 3Lepe druga saka kasiko yu igbonaga kita nasikona a nagele ina‚ ’bo ko akondra kita ŋanina kugele‚ igbonaga ko a karipa ti hemalana. 4’Bo mu sabatoki Paulo arerenya i kadi naga a momorena kata yu‚ i ’bo’borundra na Yahudi kilo ku Giriki kilo itro. 5Ku Sila seku Timoteo kugbo ayeŋundra ŋiyu Makedonia yu‚ ti Paulo lu atikindra mugu giri i trugo na kulia‚ i ’dutukindro na Yahudi kilo bo na kulia adi Kristolo ŋolo a Yesu. 6’Druga ko ’da’daradru kulia ti lepe kine, druga momorozu lepe itro, lepe druga lupodru kaŋo i trutrungo na putru naga kanye bongolani kine‚ druga takindra ko adi‚ “Yukala kasu kine kuwa akaraki‚ kine de a kulia kasu lepe! Laga na‚ na ’ba toro‚ ŋiyoro tinade na lu iutu ku Monyazi kulu yu.” 7Kuwade lepe aŋiye yu de druga tu ku lubo ku le’de ŋutu kadi‚ kari ti lepe kine se naga Tito Yusito a ŋutu laga lo teminizo Ŋun ilo. Kadi na lepena atomora kugele ku kadi naga a momorena. 8’Bo Kirisipo laga a druma lo kadi naga a momorenalo, arugo Matalo‚ ku ŋutulu giri laga ku lepe i ’ba yu kilo itro. Druga ŋutu ti Korinito kilo rodri ku yingi Paulo de ko druga rugo‚ druga ’deba baputizilo itro. 9’Bo Matalo druga takindra Paulo kuwazeni ku ŋo lo kpikpiya adi‚ “Ku kukuze‚ ’bo kuliani ayu‚ ku yiyiŋa tali‚ 10igbonaga na ilo seku dona‚ ’bo le’de ŋutu aka ŋiyu i moro konuni i kondra na do a loroni‚ ’bo ŋutulu kuwe kilo kilo rodri i ina kezi de katani.” 11Druga Paulo ’duteki yu de kiŋa gele ku yapazi bukiye i togo’yu na kulia ti Ŋun kine kasiko i dridriŋi yu. 12’Bo i baŋe naga ma Galio ’delakini a lo’bizo lo ŋutu ti Akaya kilo nu‚ Yahudi kilo druga ŋi ku teili gele i moro ku Paulo‚ druga zonga lepe i piri na ŋerani kuliana kata yu. 13Ko druga kulia adi‚ “Ilo ŋutu de lepe lo luluga ŋutulu kilo i teminizo na Ŋun be naga kukuzuna aku rugona.” 14’Bo ku Paulo kodro nyadru poki i tazu na kulia‚ druga Galio takindra Yahudi kilo adi‚ “Kugbo kodro a kulia ti toro kugbo gbiyeri loro de kine, ta laga a Yahudi kilo, na kedri kodro iyiyiŋi ta. 15’Bo kugbo a kulia ti piyesi ti kulia ku ti kari, ku ti kukuzu nasu lepe, meteta, kulia ŋani kine a ta lepe, na ’bani nyadru gbo’da a kaŋerani lo kulia ŋani kine de tro.” 16Lepe druga droŋodru ko i piri na ŋerani kuliana katani kaŋo. 17Druga ŋutulu kilo giri moga Sositene laga a druma lo kadi naga a momorena ilo, druga kpindra lepe i piri na ŋerani kuliana i koŋo yu. ’Bo Galio aku yiki kulia ŋani kine. 18I bo ŋanina druga Paulo ’duteki yu de luŋa rodri ’do‚ lepe druga sara druga kolokindro luŋaseri kilo‚ druga laŋadru Suria yu seku Pirisila ku Akula kugele. Kenkerea yu lepe druga ŋedya kupi kanye kilo igbonaga lepe kazu asarakindra Ŋun le’de ŋo. 19Ku ko laga ayenga Efeso yu‚ lepe druga kolokindro ko yu de‚ ’bo lepe ku mugu druga lubo i kadi naga a momorena kata yu i rerenya ku Yahudi kilo. 20’Bo ku ko laga apiza lepe adi ti gbo’dini kaseni i luŋa ku’de ’do lepe aku nyari. 21’Bo lepe druga sara ku ko druga kolokindro ko ti lepe atakindra ko adi‚ “Na iyiyite kasuni ’do‚ ku Ŋun laga anyari.” Lepe druga ŋiyoro ku ki’bo Efesoni. 22Ku lepe laga ayeŋadru Kaisaria yu‚ lepe druga tu Yerusalema yu i roma ku tomore na karuko kilo‚ druga tu Antiokia yu. 23Lepe druga saka yu de luŋa ku’de druga ŋiyoro, i utu mu pirito i ka na Galatiana ku Ferugiana kata yu i tikindra na lotodiniki kilo giri teriŋi. 24Nyenaga Yahuditio le’de lo ŋiyu Alekezandria yulo‚ kari ti lepe kine se naga Apolo‚ ayenga Efeso yu. Lepe a bodo lo kulia‚ ’bo lepe adeni koru kulia na wuwuro kine itro. 25Ti lepe atoguluki kiko lo Matalo. ’Bo lepe atrugo druga togo’yu kulia ti Yesu kine soso ku puso‚ ’bo lepe dendra baputizi lo Yoanelo ka’delo. 26Lepe druga poki i trugo na kulia kine ’ba kuze i kadi naga a momorena kata yu‚ ’bo ku Pirisila seku Akula‚ ku ko laga ayinga lepe‚ ko druga zonga lepe kase ’ba yu i togulukindro na lepe kiko lo Ŋun ilo alangu naga a kayona. 27Ku lepe laga anyadru laŋadru Akaya yu, luŋaseri kilo druga ru’ya teili lo lepelo i kondra de, druga wurokindro lotodiniki laga Akaya yu kilo waraga i rukodru na lepe. Ku lepe laga ayeŋadru, lepe druga logu ŋutulu laga arugo ku kulia ti ’busa na’buna kilo koru, 28’bo lepe arodru Yahudi kilo ku ŋutulu giri i koŋoni ku rerenya, i naga ma lepe kpekindri ko ku kulia na wuwuro kine adi Yesu ŋolo a Kristo ilona.

will be added

X\