KONESI 17

1Nyenaga ku ko laga arosodru Amfipolini ku Apolonia, ko druga yeŋadru Tesalonike yu i piri naga ku kadi naga a momore na Yahudi kilona. 2Paulo druga lubo kata yu be naga bita ma nye kondrinina, ’bo i luŋazi ti sabato laga musala kilo de, lepe arerenya ku ŋutulu kilo ku kulia na wuwuro kine, 3i ’dutukindro na ko bo na kuliata kine, ku i kpekindra na ko adi nyadru ti Kristolo sanyani sanya bulo ku ŋiye i dridriŋi na ŋutulu laga atatuwa kilo, ’bo lepe akulia adi, “Ilo Yesu laga ma na trukokindri ta ilo de, ŋolo a Kristolo.” 4Ku’de kilo ŋutulu kasiko i dri­driŋini arugo druga tomodya ’beri kasi Paulo seku Sila, ŋutulu rodri ti Giriki lo ’delakindra ’beri i teminizo na Ŋun kilo, ku wate rodri naga a ka’dola ti kuwe kine. 5’Bo Yahudi kilo asaka ku yuma, ko druga tunundra ŋutulu laga a loro i ŋutulu laga a ’busa ’busa kilo de i dridriŋini, ko druga tomodya mongoyona, druga poki i tobidyo na kezina, druga ti ku Yasona kadi yu i ga’yu na lososonyo kilo i zondra na ko ku mongoyo na ŋutulu kiloni. 6Ku ko laga aku rumbi ko, ko druga pikundro Yasona ku luŋaseri ku’de kilo, i zonga na ko ku drumala ti kezi ŋani kilo i koŋo yu, druga reresa adi, “Kilo ŋutu de laga lo kokorozu ŋutulu i zuroni giri kilo, ko ayeŋundra inide itro! 7’Bo Yasona arukundro ko, ko giri akokorozu kukuzu na Kaisarina, igbonaga koŋa akulia adi mata le’de kata, ŋolo a Yesu.” 8Mongoyo na ŋutulu kilo ku drumala laga kezini kilo ku ayinga kulia ŋani kine teiliko kasiko kilo druga poki i ’do’do. 9Kugbo ko laga a’deba kapa laga a daketa ku Yasonani ku ku’de kilo ŋutuluni itro, ko druga kokoloro ko. 10Luŋaseri kilo druga sonyodru ku Paulo seku Sila kuwazena agbole i utu Beroya yu. Ku ko laga ayenga yu de, ko druga lubo i kadi naga a momore na Yahudi kilona kata yu. 11Yahudi laga kilo de a lo’bu arodru laga Tesalonike yu kulu igbonaga ko arugo kulia ŋani kine ku puso, ko ga’yu kulia na wuwuro kine mu luŋa i dendra kulia ŋani kine kuwa a kulia naga mŋgba. 12Kuwade ŋutulu rodri kasiko i dridriŋini arugo, ku wate ti Giriki naga a kukaki kine rodri ku lalia kilo arugo itro. 13’Bo Yahudi laga Tesalonike yu kilo ku ayinga adi Paulo atrugo kulia ti Ŋun kine Beroya yu itro, ko druga yeŋadru yu de itro i tokobu na teiliko ti mongoyo ti ŋutulu kilo i zuzuza na ko. 14Luŋaseri kilo druga sonyodru Paulo agbole i utu suburi kutu yu, ’bo Sila seku Timoteo a’duteki yu de. 15Ŋutulu laga lo nyomodru Paulo kilo druga zonga lepe yeŋadru suu Atenai yu, druga ko yitozi bo ku sare laga ma Paulo sarani adi ti Sila seku Timoteo utuni kanye yu wule kuwa roromoki ilo. 16I naga ma Paulo mondrini ko Atenai yuna, kata lo lepelo druga trotroro igbonaga lepe amedra kezina azore ku ŋo lo teteminio kilona. 17Kuwade lepe druga rerenya i kadi naga a momorena kata yu ku Yahudi kilo, ku ŋutulu lo ’delakindra ’beri i teminizo na Ŋun kilo, ku i piri na togboreni kapazina kata yu ku ŋutulu laga lo pondra yu de kilo mu luŋa. 18Ku’de ŋutulu ti totore laga a ti Epikurio ku a ti Sitoiki kilo ko druga momora kasi lepe. Ku’de kilo akulia adi, “Ilo ka’duroni de nyadru kulia adinyo ya?” Ku’de kilo adi‚ “Lepe gbo beti katrukoni lo trugo kulia ti muloko ti monyazi kilo,” igbonaga Paulo trugo kulia ti Yesu kine ku ŋiye na lepena itro ina. 19Ko druga moga lepe, druga zonga lepe ku kayolo ti kuliata laga a Areopago kilo yu, ko druga piza adi‚ “Yi roromoki i dendra na totore naludu naga mo do togo’i ina de ya? 20Do azondra kulia naluduko kaya suwoni. Ku­wade yi kodro nyadru dendra bo na kulia ŋani kine.” 21’Bo ŋutulu giri laga Atenai yu kilo, ku ŋutulu laga a kulege lo saka yu de kilo, ko bita ani kondra kulia ku’de tro, ŋona truko na kulia naluduko kine ku yiŋa ŋanina ’du. 22Paulo druga ŋi ki ku Areopago kilo i koŋo yu, lepe druga kulia adi, “Ta laga a ŋutu ti Atenai kilo, i kuliata giri na amedra ta a ŋutulu laga lo ’delakindra ’beri koru i teminizo na muloko. 23’Bo ma na kedri ŋerundri i kikonina, na amedra kapa laga ma ta teminizi kilo, na arumbi piri ne’de naga a ’i’ile ti awuroki kini adi, ‘A na Ŋun laga aku denalo.’ Ŋo laga ma ta teminizi ti ta aku denilo, nyelo trukoki na ta ilo de. 24Ŋun laga lo ’de’ya kana ku kapazi laga katani kilo giri, a Mata lo ’diko ku lo ka itro. Lepe ani saka i kadizi ti oriya na ’duko ku kenisi ti ŋutulu kilo de katani tro. 25Kenisi ti ŋutulu kilo ani konakindra lepe kita, lepe ani yoŋo le’de ŋo tro, igbonaga lepe ku mugu lo tikindra ŋutulu kilo giri tuzoruna, ku yuka na yuyukanikina ku kapa giri itro. 26Ŋiyu ku ŋutu gele lepe agbekindra zuro ti ŋutulu kilo giri i saka i kani giri. Lepe druga gelundra luŋa kasiko kilo a kayo‚ druga gelundra ka na sakani kona ku lokokorita ŋani kilo itro‚ 27adi ma ko ga’i Ŋun‚ kugbo ŋona ko roromoki ’ba’bakadru lepe i riondru na lepe. ’Bo lepe ani gbo’da pazo ku yi gele gele‚ 28’bo ‘Yi gbo ku tuzoru‚ yi woworo‚ yi gbo ku lepe katani‚’ beti naga ma kawuro kasu ku’de ti wirito kilo ma kulianina‚ ‘Igbonaga a ’diri yi a ŋazi ti lepe.’ 29Kuwade ku yi laga a ŋazi ti Ŋun‚ yi ani romoki yo’yu adi Ŋun gbo be drumo kugbo riye de‚ kugbo be ŋoropo laga ma ŋutulu kebi ku tomira ku tobodo nasena kilo. 30’Bo Ŋun aku yiki luŋa laga kazu ma ŋutulu kilo gbo’dini ’ba dendra nu, ’bo tinade lepe atakindra ŋutulu kilo giri kukuzu i piritoni giri adi ti ko lopuke teiliko. 31’Bo lepe agelundra luŋa gele lo iŋerani kulia ti ŋutulu ti ka kilo ku ŋera na kulia naga soso kine ku ŋutu laga ma lepe gelundrilo. Lepe akpekindra ŋutulu kilo giri kine kulia de mŋgba, ku naga ma lepe toŋiyundri ŋutu ŋanilo i dridriŋi na ŋutulu laga atatuwa kilo yuna.” 32Nyenaga kugbo ko laga ayinga kulia ti ŋiye naga i dridriŋi na ŋutulu laga atatuwa kilona, ku’de kilo ŋutulu druga zozonya, ’bo ku’de kilo akulia adi‚ “Yi iyinga kine kulia de konu yu ’do.” 33Kuwade Paulo druga lulupodru kasiko i dridriŋini. 34’Bo druga ku’de kilo ŋutulu moradru ’beri ku lepe yu i rugo, i dridriŋi na kilo ŋutulu de, Dionisio laga a kayoloni lo kulia lo Areopagolo, ku noka ne’de, kari ti lepe kine se naga Damaria, ku ku’de ŋutulu kasi ko itro.

will be added

X\