KONESI 16

1Nyenaga Paulo ayeŋadru Derebe yu ku Lusitra yu itro. Ti lotodinikita le’de lu yu de‚ kari ti lepe kine se naga Timoteo. Lepe a ŋiro lo noka naga a Yahuditio naga a karukonina‚ ’bo monye lo lepelo a Girikitio. 2Luŋaseri laga Lusitra yu kilo ku laga Ikonio yu kilo itro akendra lepe a ŋutu lo’bu. 3Paulo nyadru ti se uti seku lepe, druga taadru lepe ku kulia ti Yahudi lo gbo’da i ka ŋanina kata yu kilo, igbonaga kara giri adeni adi monye lo lepelo a Girikitio ina. 4I naga ma ko rosodri i kezino kine kata yuna, ko druga tikindra karuko kilo kukuzuki naga ma lososonyo ku temezi laga Yerusalema yu kilo takindri kine, ma ko kondri ko ’busa. 5Kuwade tomoresi ti karuko kilo rumbi teriŋi i rugona katani, ’bo mu luŋa ko a’i’yo ’beri rodri. 6Ko druga rosodru i ka na Ferugiana ku na Galatiana kata yu ti Yuka Nakiyena agokindra ko trugo na kulia kine i ka na Asiana kata yu. 7Ku ko laga ayenga nyoga ku Musia, ko druga modyu lubo naga Bitunia yu‚ ’bo druga Yuka na Yesuna gogoki ko lubona. 8Kuwade ku ko laga arosodru i merete lo Musialo‚ ko druga yeŋadru Troa yu. 9Ku gbo’dini tukaze kide‚ Paulo druga medra ŋo lo kpikpiya be na ŋutu lo Makedonia lo lira‚ i ma’yu na mugu ku lepe adi‚ “Laŋundri Makedoniani i logu na yi po!” 10Ku Paulo laga amedra ŋo lo kpikpiya ŋanilo‚ wuleŋa gele yi druga ga’yu kiko laga ma yi lupodri Makedonia yulo‚ kaya yo’yuni yi arambu a ’diri adi Ŋun alungu yi i trugo na kuu na’buna kasiko yu. 11Kuwade ŋiyu Troa yu yi druga laŋadru gbogbo yeŋadru Samotrake yu‚ ’bo imaluna yi ayeŋadru Neapoli yu. 12Ŋiyu yu de yi druga yenga Filipi yu naga a kezi druma koru i go lo Makedonia laga lu de‚ a kezi naga ŋutu ti Roma kilo ma ’duginina. I luŋa ku’de kilo yi a’duteki i kezi ŋanina kata yu. 13’Bo i luŋa lo sabatolo yi alupodru i ketimini kaŋo kare kutu yi i piri naga ma yi yo’ini adi ŋona piri na maguna nu yu dena. Yi druga gbi’diki ka i trukokindro na wate na pependra ’beri kugele kine kulia. 14Noka ne’de druga yinga yi‚ kari ti kepe kine se naga Lu­dia‚ lepe ŋiyu i kezi na Tuwatirana, lepe a katogboreni na bongola naga a naluwe kine‚ lepe a katemini na Ŋun itro. Ti Matalo aŋazu teili lo lepelo i yinga na kulia na ta Paulo kine. 15Ku lepe naga a’deba baputizilo ku ŋutu laga ku lepe i ’ba yu kilo giri‚ lepe druga ma’yu mugu ku yi adi‚ “Ku ta laga ayo’yu adi na a karukoni naga mŋgba na Matalo, poota kuwe kadini a komo kuwe.” Lepe druga rudadru yi ku teriŋi. 16Kugbo yi laga kilo i utu i piri na maguna kata yu‚ yi druga momora kasi upiye ne’de. Lepe gbo ku yuka na tekani kuliata‚ ’bo lepe azakindra drumala kanye kilo rezema koru ku tetekeza nanyena. 17Lepe druga kepodru yi kasi Paulo‚ ti ina i resazi adi, “Kilo ŋutu de a upi ti Ŋun laga Ki korulo, ko kilo trukokindro ta kiko lo rulo.” 18Lepe druga kondra de luŋa rodri. ’Bo Paulo akanya koru ku kulia ŋani kine, lepe druga lopukozi druga takindra yukana adi‚ “Na takindra do ku kari ti Yesu Kristo kine‚ lupundri kaŋo ku lepe i muguni po!” Wuleŋa gele lepe druga lulupundro. 19’Bo ku drumala ti ŋirona kilo laga abonga adi kiko lase lo rieni rezemalo akokoreyi‚ ko druga moga ku Paulo seku Sila‚ i pipigo na ko i piri na togboreni kapazi nu kata yu‚ ku drumala ti ŋutulu kilo i koŋo yu. 20Ku ko laga azonga ko ku kaŋera ti kulia kilo i koŋo yu‚ ko druga kulia adi‚ “Kilo ŋutu de a Yahudi kilo‚ ko kilo kokorozu kezi nikana. 21Ko atogo’yu gbiyeriki laga yi laga a Roma kilo ani romoki rugo kugbo kondra kilo.” 22Mongoyo na ŋutulu kilo druga moradru ’beri i ŋiye kasiko kini ku teriŋi‚ druga kaŋera ti kulia kilo kekenyeza bongola naga kasiko i ’berini kine kaŋo druga takindra kukuzu adi ti ko kpinyani kpinya. 23Ku ko laga akpindra koŋa koru‚ ko druga zondra ko i kadi naga a drodrorena kata yu druga takindra katiyunilo kukuzu i tizu na ko ku teriŋi. 24Katiyuni ŋanilo kuwa arugo kukuzu ŋanina‚ lepe druga zonga ko i kadi naga a drodrore kide yuna kata yu, druga lepe tokoza mukuzi kasiko kilo i kade laga a susuketo kilo i mugu. 25’Bo ku gbo’dini tukaze kide ku Paulo seku Sila kulu i magu ku i wihkindro na Ŋun wirito‚ ti ŋutulu laga a drodrora kilo kulu i yinga na ko. 26’Bo wuleŋa gele kana druga dodonga dodonga mugu koru‚ kuwade muko na kadi naga a drodrorena druga lulugu mugu‚ kaakutuzi kine giri druga ŋazu ’beri‚ maaroki laga a toreta ti ŋutulu kilo giri druga lala ’beri. 27Kugbo katiyunilo laga apure‚ lepe ku medri kadi naga a drodrorena kaakutuzi kine gbo’di gboŋa‚ lepe ayo’yu adi ŋutulu laga a drodrora kilo awoke. Lepe druga ’dumundra wale lonye lo morolo kodro tyegini mugu. 28’Bo Paulo druga laiza ku roro laga gboŋa adi‚ “Ku kokonu mugu a loro, yi ma kilo giri.” 29Katiyunilo druga magu kima, lepe druga ’damaadru mugu kata yu, ti ilo i zangu ku kuzena‚ lepe druga mereke ka kasi Paulo i koŋoni seku Sila. 30Lepe druga tolupundro ko kaŋoni‚ druga piza ko adi, “Kowu kilo‚ ma na kondra inyo laga ma na ririteni ya?” 31Ko druga teyitokindo lepe adi, “Ruke Mata Yesu‚ do iririte‚ do lepe ku ŋutulu laga konu ’ba yu kilo itro giri.” 32Ko druga trukokindro lepe kulia ti Matalo kine‚ ku ŋutulu giri laga lo gbo’da ku lepe i ’ba yu kilo. 33I nu baŋe na tukaze de lepe azonga ko druga lalazu ’dikasi kasiko kine‚ druga lepe ’deba baputizilo agbole ku maratezi ti lepe kilo giri. 34’Bo kugbo lepe laga azonga ko kanye kadi yu‚ lepe druga tikindra ko nyosu‚ druga nyonyola koru ku ŋutulu laga kanye ’ba yu kilo giri igbonaga nye arugo Ŋun ina. 35’Bo ku kana naga awara‚ kaŋera ti kulia kilo druga sonyodru katiyu kilo adi ti kulu ŋutu de kolozini, ti utini. 36Katiyuni lo kadi naga a drodrorenalo druga trukokindro Paulo kine kulia de adi‚ “Kaŋera ti kulia kilo asunyundro ŋutu i kolodru na ta‚ kuwade‚ lupundrita‚ woronita ku teili lo trotro.” 37’Bo Paulo druga teyitokindro ko adi‚ “Ko akpindra yi ku ŋutulu i koŋo yu ti inga kulia kaya kine aku ŋera‚ yi laga a ŋutu ti Roma kilo‚ ko atokoza yi i kadi naga a drodrorena katani. Tinade ko nyadru sonyodru yi kaŋo yu tali ya? ’Bayi‚ ani romoki. Ti ko lepe pondri i lagu na yi.” 38Katiyu kilo druga trukokindro kaŋera ti kulia kilo kine kulia de‚ ’bo ku ko laga ayinga adi kara a ŋutu ti Roma‚ ko druga gbo ku kuze. 39Ko druga pondra i ma’yu na ’beri kasikoni‚ druga tolupundro ko kaŋoni adi ti ko koloki kezina. 40Kuwade ko druga lupundro i kadi naga a drodrorena kata yu kaŋo, druga tu i wodyu na Ludia. Ku ko laga abonga luŋaseri kilo, ko druga ru’ya teiliko kasiko kilo, druga woworo.

will be added

X\