KONESI 15

1’Bo ku’de ŋutulu lo ŋiyu Yudaya yu kilo apondra i togo’yu na luŋaseri kilo adi‚ “Ku ta laga aku taaro be na kukuzu na Mosena nyadri­nina‚ ta ani romoki rite tro.” 2Kugbo ku Paulo seku Baranaba laga arerenya ku ko ku piyesi laga rodri‚ Paulo seku Baranaba druga nyume ku ku’de kilo ŋutulu‚ i utu Yerusalema yu ku lososonyo kilo yu ku temezi kilo yu ku kulia ti kine piyesi de. 3Kugbo tomore na karuko kilona naga asonyodru ko‚ ko druga rosodru Foinike suu Samaria yu‚ i trukodru na kulia naga ma Monyazi kilo lopugi teiliko kase kine‚ ko druga tikindra luŋaseri kilo giri nyola koru. 4Ku ko laga ayenga Yerusalema yu tomore na karuko kilo ku lososonyo kilo ku temezi kilo druga rukodru ko. Ko druga kpekindra ko kulia giri naga ma Ŋun kondri ku se kine. 5’Bo karuko ku’de i tokore na Farisayo kilo i dridriŋini druga ŋi ki‚ druga kulia adi‚ “Kilo ŋutulu de ti taaroni, taki ko kukuzu adi ti ko kone kukuzu na Mosena itro.” 6Nyenaga lososonyo kilo druga tunundra ’beri ku temezi kilo kugele i yo’yu na kulia ŋani kine. 7Ku ko laga apipiza ’beri kase dridriŋini ku piyesi rodri‚ nyena ŋini Petero druga takindra ko adi‚ “Luŋaseri, ta adeni adi kazu ’bero Ŋun agelundra na kasu dridriŋini adi Monyazi kilo ti yiŋe kulia ti kuu na’bu kine kuwe kutuni‚ ma ko ku rugini ’busa. 8’Bo Ŋun lo dendra teilikolo druga kpeza adi nye arugo ku naga lepe tikindri ko Yuka Nakiyena be nikana ina. 9Lepe aku tokoru driŋi nika kasi ko tro‚ ’bo lepe atoke’ya teiliko kasiko kilo ku rugona. 10Tinade ku kulia ŋani kine ta modyu Ŋun ku naga ma ta todyi kiliŋgboro ku lotodiniki kilo i murutonina gbandra ya? Merenyezi kaya kilo ku yi itro ani romoki ’dokodru kiliŋgboro ŋanilo tro. 11’Bo yi arugo adi yi iririte ku ’busa na’bu na Mata Yesuna be na kona.” 12Mongoyo na ŋutulu kilo giri druga yiŋa tali‚ druga kpega suwo kase kilo i yinga na kulia kasi Baranaba seku Paulo naga ma ko trugini kpiyesi ku wonyesi naga ma Ŋun kondri ku Monyazi kilo i dridriŋi yu ku kenisi kasiko kilo. 13Ku ko laga alenga trugo na kulia kine‚ Yakobo druga teyitokindro ŋutulu kilo adi‚ “Luŋaseri, yiŋeta kulia kuwe na ta na kine‚ 14Simeona lo trukokindro ŋutu kulia naga ma Ŋun tikindri Monyazi kilo i nyumbo na koŋo na’bu i driŋi nasiko ku kulia ti kari kanye. 15’Bo ku­lia naga ma kakeyo kilo tazi kine atorumokindro ’beri drodrogele ku kulia ŋani kine‚ be naga ma wuronina adi, 16‘I bo na kine kulia de na iyiyite, na i’dugo piri na Dawidi naga a sakayeta na ’duki kanina ’do. Na i’dugo rubazi ti lepe kine ’do, na itoŋizu lepe ki, 17adi ŋutu lo koloki a limbito kilo de ma ga’i Matalo, ku Monyazi laga lo luŋu giri ku kari kuwe kilo de itro‚ 18Mata lepe laga lo kpeza kazu ’bero kine kulia delo lo kulia.’ 19Ku kine kulia de na aŋedya kulia kine de ka’bi yu ku sasanyi sasanyi ŋutulu laga lo lopugo ’beri ku Ŋun ni‚ lo ŋiyu i dridriŋi na Monyazil kilo‚ 20’bo ti yi wurokindri ko waraga, adi ti ko pane ŋo laga a loro ti muloko laga a ’busa ’busa kilo‚ ku konye lopi‚ ku kapa laga lo dridriro kilo‚ ku rima kine. 21’Bo kazu ŋiyu ’bero Mose gbo ku katruko kanye ti kulia kine i kezino giri katani‚ ’bo kulia ti lepe kine kena i kadizi naga a momoreta kine katani mu sabatoki.” 22I bo ŋanina lososonyo kilo ku temezi kilo ku tomore na karuko kilo giri druga medra adi a na’bu i nyumbo na ŋutulu kase dridriŋini lo sunyuzi kasi Paulo seku Baranaba kugele Antiokia yu kilo. Ko druga sonyodru Yuda lo luŋu a Barisabalo ku Sila‚ laga a ka’dola ti kuwe ku luŋaseri kilo i dridriŋini. 23Ko druga sunyuzi ku ina waraga de adi‚ “Luŋaseri laga a lososonyo kilo ku laga a temezi kilo aroma ku luŋaseri laga Antiokia yu ku laga Suria yu ku laga Kilikia yu i dridriŋi na Monyazi yu kilo. 24Yi ayinga adi ku’de kilo ŋutulu lo lupundro kaya dridriŋini kilo atikindra ta i bayi ku kuliata ku’de i kokorozu na teiliko kasu kilo‚ ti derengi yi aku tikindra ko kukuzu naga de tro. 25Kuwade yi amedra a na’bu‚ yi laga lo tunundra ’beri kilo de adi ti yi nyume ku’de ŋutulu i sonyodru na ko kasu yu ku Paulo seku Baranaba laga a ŋutulu laga lo nyari yi kilo. 26Ŋutu ŋani kilo ayanyakindra ’beri i tuwa ku kulia ti Mata Yesu Kristo likalo. 27Ku kine kulia de yi sonyodru Yuda seku Sila‚ ko lo itrukokindro ta kulia kine ku kutuzi kase. 28’Bo a na’bu ku Yuka Nakiyena i konyeni kaya konyeni itro‚ ka’bi yi ku ’de’delaki ŋo lo tomoni kilo kasu kini‚ ’bo ŋo kine kulia naga drumala kine de ’du. 29Paneta kapa laga a ’i’ileta ti muloko laga a ’busa ’busa kilo kaŋo‚ ku rima‚ ku kapa laga lo dridriro kilo ku konye lopi. Ku ta laga atizu ’beri ku kine kulia de‚ ta ikondra a na’bu. A na’bu‚ gbo’dita kuru.” 30Ku ŋutulu ŋani kilo laga asunyuzi, ko druga tu Antiokia yu‚ druga tunundra mongoyo ti karuko kilo kugele‚ i tikindra na ko waraga ŋanina. 31Ku ko laga akendra, ko druga nyonyola ku ruda nase na teilikona. 32Kuwade Yuda seku Sila laga a bodoki ti kulia ti Ŋun kine kilo druga ru’ya teiliko ti luŋaseri kilo ku kuliata rodri‚ i tikindra na ko teriŋi. 33Ku ko laga asaka yu de‚ luŋaseri kilo druga sonyodru ko ku teili lo trotro i yitozi ku ŋutulu lo sunyundro ko kilo yu. 34’Bo Sila druga rambu adi a na’bu ki nye ’dutekini yu de.] 35’Bo ku Paulo seku Baranaba a’duteki Antiokia yu ku ku’de ŋutulu rodri‚ i togo’yu ku i trugo na kulia ti Matalo kine. 36I bo na luŋa ku’de‚ Paulo druga takindra Baranaba adi‚ “Pondri‚ kita ku yitozi bo i kezino naga ma yi trukodrini kulia ti Matalo kine giri kata yu‚ i wodyu na luŋaseri laga kata yu kilo‚ i medra kugbo ŋona ko kulu gbo adinyo.” 37’Bo Baranaba nyadru zonga Yoane lo luŋu a Marakolo ti uti kasi se. 38’Bo ku Paulo i konyeni ani gbo’da a na’bu i zonga na ŋutu laga akolokindro se i ka na Pamfulia yu‚ laga aku utu i kondra na kita kasi se itrolo. 39Kine kulia de druga lupundro a rerenyeta kasiko i dridriŋini, kuwade ko druga tokodya ’beri‚ Baranaba druga zonga Marako‚ ko druga lubo i ki’bo kata yu i laŋadru Kuporo yu. 40’Bo Paulo druga gelundra Sila‚ ko druga pilara ti luŋaseri kilo akolokindro ko i ’busa na’bu na Matalona. 41Lepe druga rosodru Suria ku Kilikia kata yu i tikindra na tomoresi ti karuko kilo teriŋi.

will be added

X\