KONESI 14

1Nyenaga Ikonio yu kugbo ko laga alubo kugele i kadi naga ma Yahudi kilo momoreni kata yuna‚ ko druga trugo yu de‚ kuwade mongoyo na ŋutulu rodri laga a Yahudi‚ ku Monyazi kilo druga rurugo. 2’Bo Yahudi laga aku rugo kilo druga toŋizu Monyazi kilo i zuzuza na ko i kondra na luŋaseri kilo a loro. 3Kuwade ko druga saka yu de luŋa rodri i trugo na kulia ti Matalo kine ’ba kuze. ’Bo Matalo a’dodru bo na kulia kanye ti ’busa na’bu kine‚ i tikindra na ko i kondra na kpiyesi ku wonyesi ku kenisi kase kilo. 4’Bo ŋutulu laga kezi yu kilo druga tokodya ’beri dridriŋita mure. Ku’de kilo nyadru gbo ku Yahudi kilo‚ ku’de kilo nyadru gbo ku lososonyo kilo. 5’Bo Monyazi kilo ku Yahudi kilo ku drumala kasiko kilo anyadru kodro kondra na ko a loro i bibiringo na ko ku ŋoropo. 6Lososonyo kilo ku ayinga kulia ŋani kine‚ ko druga wo Lusitra ku Derebe yu‚ naga a kezino ti ka na Lukayoniana kine, ku ka naga kasiko i laga yuna. 7Ko druga trugo kuu na’buna yu de. 8Ti le’de ŋutu lu Lusitra yu laga ani romoki woro‚ lu agbi’diki yu de‚ lo batra ŋiyu i yuŋe yulo‚ ’bo ŋiyu ’bero lepe aku woro. 9Ŋutu ŋanilo kuwa ayinga kulia na ta Paulo kine‚ Paulo druga gbuluzu lepe‚ druga medra adi lepe gbo ku rugo na toruweni lepe. 10Paulo druga takindra lepe ku roro laga gboŋa adi‚ “Lirani ki.” Lepe druga labara ki‚ druga woworo. 11Mongoyo ti ŋutulu kilo ku amedra kulia naga ma Paulo kondrini kine de‚ ko druga resa ku kutu na Lukayonina adi‚ “Muloko kilo akiyundra kayani kani‚ apuru be na ŋutuluna.” 12Ko druga gbikindro Baranaba kari kine a Zeu‚ ’bo agbikindro Paulo a Herima‚ igbonaga lepe a katrukoni koru ina. 13’Bo kadi na mulete laga Zeulo ma nu i koŋo na kezina a lo kaŋo‚ ’bo ka’i’ilani ŋanilo druga zikodru duwe lo kite ku koturo itro i kaka kutu yu‚ ’bo ko nyadru kodro tikindra ku Paulo ’i’ile kasi mongoyo kilo kugele. 14Kugbo lososonyo laga ku Baranaba seku Paulo laga ayinga kulia ŋani kine‚ ko druga kekenye kekenye bongola kase kine‚ druga wo i dridriŋi na mongoyo ti ŋutulu kilo‚ ko druga reresa ku teriŋi adi‚ 15“Kilo ko dee! Ta kondra de gbandra ya? Laga yi a ŋutulu ku gbiyeri be nasuna‚ laga lo zakindra ta kuu na’buna adi lopuketa ’beri i ko’yu na ŋo laga a ’busa ’busa kilo de i rugo na Ŋun laga zoru‚ lo gbekindra ’diko ku kana‚ ku suburilo ku kapa laga kata yu kilo ilo. 16I luŋa laga arodru kulu‚ lepe kazu akolokindro zuro kilo giri i woro be naga ma ko nyadrinina, 17’bo kpe‚ lepe aku kolokindro mugu ’ba ka’dotoni lo bo na kulia kanye‚ ’bo lepe akondra a lo’bu‚ atikindra ta kudu ŋiyu i ’diko yu‚ ku baŋe na trorani nyostuto kine‚ ’bo ta anyola koru‚ ku naga ta ayiyimotu koru ku nyosu ŋani ina.” 18Ku kulia kasiko na tayi kine de ko agoza mongoyo ti ŋutulu kilo ka’bi se ku ’i’ila ’ila‚ ’bo guwa ŋanina a nago. 19’Bo Yahudi laga lo ŋiyu Antiokia yu kilo‚ ku lo ŋiyu Ikonio yu kilo de yeŋadru yu de. Ku ko laga azuzuza mongoyo ti ŋutulu kilo‚ ko druga bibiringo Paulo ku ŋoropo‚ druga pikodru lepe kaŋo i kezi kutu yu‚ igbonaga ko ayo’yu adi lepe atuwa azona. 20’Bo lotodiniki kilo ma lirani ku lepe i laganina, lepe druga ŋiyoro lubo kezi kata yu‚ ’bo ku gbo’dini imalu de lepe druga utu seku Baranaba kugele Derebe yu. 21Ku ko laga atrugo kuu na buna ikezi naga Derebe kata yu‚ kugbo ko laga atolopugo ŋutulu kilo rodri a lotodiniki, ko druga yitozi bo Lusitra, Ikonio ku Antiokia yu‚ 22i tikindra na teiliko ti lotodiniki kilo teriŋi‚ i ru’ya na teiliko kasiko kilo itro‚ ma ko woroni ku rugo ŋanina ’duu‚ i kulia adi yi ilubo i tumata na Ŋun ina kata yu ku sasanya koru. 23’Bo ku ko laga age’ya temezi kilo i dridriŋi na tomoresi ti karuko kine giri‚ i naga ma ko magini Ŋun‚ ku kuga na nyosutona, kara druga kolokindro ko ku Mata laga ma ko rugini iloni. 24Ko druga rosodru Pisidiani yeŋadru tozo Pamfulia yu. 25Kugbo ko laga atrugo kulia kine Periga yu‚ ko druga tu Atalia yu. 26Ŋiyoro yu de ko druga lubo i ki’bo kata yu i laŋadru Antiokia yu‚ i piri naga kazu ma se kolozini ku ’busa na’bu na Ŋun ku kulia ti kita naga ma se tutuzi gbo’di ina de. 27Ku ko laga ayeŋundra, ko druga tunundra tomore na karuko kilo kugele‚ druga kpekindra ko kulia giri naga ma Ŋun kondrini ku se kine‚ ku kulia naga ma Ŋun ŋakindri Monyazi kilo kaka na rugonana. 28Ko druga ’duteki luŋazi rodri ku lotodiniki kilo kugele.

will be added

X\