KONESI 12

1I dridriŋi na inu baŋe de mata laga Herode druga poki i sasandru na ŋutulu ku’de laga a ti tomore na karuko kilo ku teriŋi. 2Lepe druga tikindra Yakobo laga a luŋase lo Yoanelo i remo. 3Kugbo lepe laga amedra Yahudi kilo inyolani ku kulia ŋani kine, lepe druga tikindra Petero i mokani itro. Kine kulia de kondra ’beri i luŋa laga lo nyeini mugati naga ’ba kape kine kulu. 4Kugbo Herode laga atikindra Petero i mokani, lepe druga zonga lepe i drodrora, druga tikindra lepe ku katiyu mere gele konye bukiye kilo i kenisini i tizu na lepe ti ko akodya ’beri iŋmani iŋmani ’Bo lepe ayo’yu kugbo kolo drumala naga a Rosetona kuwa alenga nye bulo ku tolupundro Petero ku ŋutulu kilo i koŋoni. 5Kuwade Petero atora i kadi naga a drodore nu, ti ŋutu ti tomore na karuko kilo kulu i ma’yu na ’beri ku teili giri ku Ŋun ku kulia ti lepe kine. 6I lu mude de kodro Herode nyadru tolupundro lepe kaŋo, ku Petero lu i toto i dridriŋi na katiyu mure, ti atora ku maaroki mure‚ ti katiyu lo tizu kadina kilo alira i koŋo na kaakutuna. 7’Bo malaikata lo Matalo akpeza mugu, druga parara ne’de kopodru i kadi naga aŋera nu kata yu, druga lepe nangu Petero i mereteni‚ druga gbungu lepe‚ adi‚ “Ŋine wule.” Maaroki lo torani lepe kilo druga lala ’beri ku lepe i kenisini. 8Druga malaikatalo takindra lepe adi‚ “Sone mugu‚ sone kamuka konu mukuzini.” Lepe druga kondra de‚ druga malaikatalo takindra lepe adi, “Kalaki bongo nonu na kaŋona konu muguni, ’bo kipu na.” 9Lepe druga lupodru kaŋo yu i kepodru na lepe. Lepe aku deni kugbo kulia naga ma malaikatalo kondri kine a kulia naga mŋgba kugbo ’bani, lepe ayo’yu adi nye amedra ŋo laga a rube. 10Druga i naga ma kara rosodri ku katiyu laga a kayolo ku laga a togi murelo, ko yeŋundri i kaka naga a witi naga ma ŋutulu kilo lupodri kezi yuna. Kaakutu ŋanina druga ŋaŋa mugu kasiko i koŋoni ko druga lupodru kaŋo yu druga rosodru i goru gele‚ druga malaikatalo kokoloki Petero agbole. 11Kugbo Petero laga apoki i rambu na mugu, lepe druga kulia adi, “Tinade na adeni a ’diri adi Matalo asunyundro malaikata lonyelo i ninadru na na ku Herode i kenini, ku kulia giri naga ma Yahudi kilo rambi kondra kuwe muguni kine itro.” 12Kugbo lepe laga arambu kulia ŋani kine, lepe druga tu ku Maria i ’ba yu, naga a ŋote na Yoane lo luŋu ku kari ku’de a Marakolo‚ yu de ŋutulu rodri ti kulu atunundra ’beri kugele i magu. 13Ku lepe laga atrutrungo kaakutuna, ŋiro ne’de‚ kari ti lepe kine se naga Roda‚ druga pondra i medrani. 14Kugbo lepe naga adeni adi a roro lo Peterolo, lepe druga nyonyola koru‚ ’bo aku ŋakindra lepe kakana‚ ’bo awoke, druga kulia adi Petero lu alira kaŋo i kaakutu yu de. 15Ko druga teyitokindro lepe adi‚ “Do mamali.” ’Bo lepe druga takindra ko ku teriŋi ’do ’do adi a ’diri gbo de. Ko druga kulia adi‚ “Ŋolo a malaikata lo lepelo.” 16’Bo Petero atrutrungo ’do ’do‚ ’bo ku ko iŋazuni‚ ko druga medra lepe‚ druga rambu ’beri koru. 17’Bo Petero druga goza ko ku keni adi ti ko yiŋani tali‚ druga lepe kekenakindra ko kulia naga ma Matalo tolupundri nye i kadi naga a drodrorena kata yu kine. Druga lepe kulia adi‚ “Ku trukokita Yakobo ku luŋaseri kilo kine kulia de giri.” I bo ŋanina lepe druga ŋi i utu i ne’de piri. 18Ku kana naga awara katiyu kilo druga poki i lalaiza ku teriŋi kase dridriŋi ku liki na Peterona, adi lu autu daa ya. 19’Bo ku Herode laga aga’yu Petero‚ aku rumbi lepe‚ lepe druga pipiza katiyu ti kadi naga a drodrorena kilo ku kuliata giri‚ lepe druga takindra kukuzu na tatuwini koŋa kaŋo. I bo ŋanina Herode druga ŋiyoro Yudayani utu Kaisaria yu‚ druga saka yu de. 20’Bo Herode aŋoma koru ku ŋutu ti Turo ku ti Sidona kilo‚ ’bo ko druga pondra ku teili gele ku lepeni, kugbo ko laga a ’bo’bodya Bulasito laga a katiyuni lo kadi na tumatalo, ko druga magu teili lo trotro lo guwani morona igbonaga ŋutulu laga kasiko i ka yu kilo rumbi nyosuna ku matalo i kani ina. 21I luŋa lo nyumelo Herode druga sozu bongola kanye ti tumata kine, lepe druga gbi’diki i si’de kini i trukokindro na ko kuliata. 22Dmga ŋutulu kilo reresa adi‚ “Ilo roro de a lo Ŋun, agbo’da a lo ŋutuni.” 23Wuleŋa gele malaikata lo Matalo druga gbugbutoro Herode ka igbonage lepe aku tikindra Ŋun purana, lepe druga nyei ku kuru druga tutuwa. 24’Bo kulia ti Ŋun kine druga ’du’dudyo druga rereki. 25Kugbo ku Baranaba seku Saulo laga alenga kita nasena, ko druga ŋiyoro Yerusalema yu yitozi bo. Ko druga zonga Yoane lo luŋu ku kari ku’de a Marakolo itro.

will be added

X\