KONESI 10

1Nyenaga le’de ŋutu lu Kaisaria yu‚ kari ti lepe kine se naga Korinelio. Lepe a druma lo katiyu kama gele laga i Tokore na Italia kata yu kilo. 2Lepe a ŋutu laga lo ’delakindra mugu i teminizo na Ŋun‚ ku ŋutu laga ku lepe i ’bani kilo kugele giri‚ ’bo bita lepe tikindra ŋutulu kilo ’doketa koru‚ lepe bita magu Ŋun mu luŋa. 3Ku gbo’dini be i lu’balaŋa de nyena medrini lepe i rudesi kata soso malaikata lo Ŋun i lupundro kanye koŋoni i takindra na nye adi‚ “Korinelio!” 4Korinelio druga gbuluzu malaikatalo ku teili lo kuze‚ druga kulia adi, “Inyo po Mata?” Malaikata lo druga teyitokindro lepe adi, “Magu nonuŋana ayiŋa, ’bo ’doketa kolu kilo aruko ku Ŋun i koŋo yu. 5’Bo tinade sonyoro ku’de ŋutu Yopa yu i lungu na Simona lo luŋu a Peterolo. 6Lepe lu saka a komoni lo Simona laga a kaŋinyani lo lo’bualo, kadi na lepena nu suburi i kutu yu.” 7Kugbo malaikata laga lo takindra lepe kulialo laga aworo‚ Korinelio druga luŋundra kakita mure i dridriŋi na kakita kanye kilo ku katiyuni gele laga lo ’delakindra ’beri i teminizo na Ŋun i dridriŋi na ŋutulu laga lo konakindra nye kita kilo. 8Kugbo lepe laga atrukokindro ko kuliata kine giri‚ lepe druga sonyodru ko Yopa yu. 9Ku gbo’dini imalu de kasiko iutuni‚ ku ko laga ayeŋadru nyoga ku Yopa‚ ti Petero lu kiyadru i kadi naga kuwe a ’darina ki yu i magu na Ŋun beti tupara kide de. 10Kugbo lepe laga atika ku mago‚ lepe kodro nyadru nyosu. Ku nyosuna inga nu dredrera, lepe druga poki i medra na le’de ŋo kanye rambuni be na rudesina. 11Lepe amedra ’dikona ti aŋazu mugu gboŋa, abonga le’de ŋo be bongo nawala i kiyundra kani agomo ku goŋeto iŋmani. 12I bongo ŋanina kata yu kapazi laga ka’de ka’de ku mukuzi iŋmani kilo, ku laga lo woro ka ku gedyo ki kilo ku kpenya ti ’diko kine. 13Roro le’de druga kuu ku lepeni adi‚ “Petero ŋine‚ ’duŋe‚ nyone.” 14’Bo Petero druga kulia adi‚ “ ’Bayi Mata‚ igbonaga bita na aku nyosu kapa laga a loro kugbo ’ba kekeli be kilo de ’berona.” 15Druga rorolo kuu ’do ku lepeni adi‚ “Kapa laga ma Ŋun toke’i kilo‚ ku luluŋu ko a loro.” 16Kine kulia de akondra ’beri luŋa musala‚ i bo ŋanina bongona druga teyitozi i ’diko yu bo agbole. 17Kugbo Petero laga ilo i rambu mugu koru ku kulia ŋani kine adi ŋo lo meri nye lu de a inyo‚ ti ŋutu laga ma Korinelio sunyundri kilo apiza adi kadi na Simonana ina yeda ya‚ druga ko lira i kaakutu yu. 18Ko druga laiza‚ piza adi ŋona Simona lo luŋu a Petero ilo toto yu de. 19’Bo ku Petero laga lu yo’yu ŋo laga ma nye medrilo, Yuka Nakiyena druga takindra lepe adi, “Mete, ku’de ŋutulu musala kulu ga’yu do. 20’Bo ŋine, kiyadri ka yu, uti ku ko kugele‚ kuwe nonuna ka’bi ku gbogbo’da po’di’di‚ igbonaga na lo sunyundro ko ina.” 21Druga Petero kiyundra kani ku ŋutu ŋani kiloni‚ lepe druga kulia adi‚ “Ŋutu laga ma ta ga’ilo ŋolo a na‚ ta pondra inide gbandra ya?” 22Ko druga kulia adi‚ “Korinelio lo sunyundro yi‚ lepe a druma lo katiyu kama gele‚ lepe a ŋutu laga mŋgba lo kuga Ŋun‚ lepe akena a ŋutu lo’bu ku zuru lo Yahudilo giri. Malaikata lokiye le’de atakindra lepe adi ti lepe luŋe do i utu ku lepe kadi yu ma lepe ku yingi kulia konu kutuni.” 23Kuwade Petero druga luŋudru ko kanye yu a komo. Ku gbo’dini imalu de Petero aŋiye‚ druga utu kasi ko kugele‚ ’bo luŋaseri ku’de laga Yopani kilo autu kasi lepe itro. 24Imolulu de ko druga lubo Kaisaria yu. Ku rumbi derengi Korinelio lu i momondru na ko‚ ti alungu maratezi kanye kilo ku worisi kanye kilo a loŋu’du. 25’Bo i lubo na Petero yu‚ Korinelio druga momora seku lepe‚ druga mereke ka ku lepe i mukuzini i teminizo na lepe. 26’Bo druga Petero toŋizu lepe ki‚ druga kulia adi‚ “Lirani ki‚ na a ŋutu ’do.” 27Ku lepe laga inga ilo kukulia seku lepe, lepe druga lubo‚ druga arumbi ŋutulu rodri ti atunundra ’beri kugele. 28Petero druga takindra ko adi‚ “Laga ta‚ ta adeni adi kukuzu na Yahudi kilona ani rugo ti yi tomore ’beri ku ŋutulu laga a kulege kilo‚ kugbo ka’bi yi ku ututu kasi ko yu‚ ’bo Ŋun akpekindra na adi ka’bi na ku luluŋu ŋutu le’de a loro kuwa ’ba kekeli tro. 29Kuwade nyena pondri na ’ba rerenya ku naga ma ta lungi nana. ’Bo na piza ta‚ ta lungu na gbandra ya?” 30’Bo Korinelio druga teyitokindro lepe adi‚ “Tinade luŋa kilo arosodru iŋmani. Beti ilo sawa de ku na lu kuwe magu na Ŋun kuwe kadi yu‚ ku lu’balaŋa‚ le’de ŋutu druga lira kuwe lagani ti asozu mugu ku bongola naga a nakpe salala. 31’Bo ŋutu ŋanilo druga kulia adi‚ ‘Korinelio‚ magu nonuna ayiŋa‚ Ŋun aku boŋoni ’doketa kolu kilo. 32Kuwade sonyoro ŋutu Yopa yu‚ luŋe Simona lo luŋa a Peterolo. Lepe lu saka a komoni ku Simona laga a kaŋinyani lo lo’bualo kadi yu‚ ’bo kadi na lepena nu suburi i kutu yu.’ 33Kuwade wuleŋa gele na druga sonyodru ŋutulu konu yu‚ ’bo do akondra a na’bu i pondra. ’Bo tinade yi kilo giri inide ku Ŋun i koŋoni i yinga na kulia giri naga ma Matalo takindri do kine.” 34Petero druga poki i kulia adi‚ “A ’diri na aliri Ŋun ani nyumbo ŋutulu tro‚ 35’bo i zuro kiloni giri‚ ŋutulu laga lo kuga lepe kilo‚ ku laga lo kondra a lo’bu kilo‚ lepe rugo se. 36’Bo ta adeni kulia ti lepe na sunye ku ŋutu ti Isiraeli kiloni kine‚ i trugo na kuu na’bu na teili lo trotro lo Yesu Kristolo, lepe laga a Mata lo ŋutulu girilo. 37Kulia ŋani kine atrukozi i ka na Yudayana kata yu giri‚ ŋiyu Galili yu i bo na baputizi laga ma Yoane trugini kulia ŋani kine lu. 38’Bo kulia ŋani kine trugo kulia ti Yesu lo Nazareta laga ma Ŋun ’bugi wele na Yuka Nakiye ku lepe kini ku teriŋi itrolo. Lepe kazu aworo mu pirito kine i kondra na konesi na’bu i toruzo na ŋutulu laga ma kasosoyini lo kulialo sasandri ku teriŋi kilo‚ igbonaga Ŋun kazu gbo ku lepena. 39’Bo yi a ka’doto ti kulia na konu lepe kine giri i ka na Yahudi kilona ku na Yerusalemana. ’Bo ko atatuza lepe ku ’beko na lepe i kedini muguna. 40’Bo i luŋa lo musala lu‚ Ŋun atoŋizu lepe druga kpeza lepe i konye ti ŋutulu. 41Agbo’da ku ŋutu kilo girini‚ ’bo ŋo kilo a yi laga ma Ŋun nyumundri a kayo a ka’doto ti kulia kilo i konyeni, laga lo nyosu‚ lo mozu kasi lepe kugele i bo na ŋiye na lepe i dridriŋi na ŋutulu laga atatuwa kilona kilo. 42’Bo lepe atakindra yi kukuzu adi ti yi trukoki ŋutulu kilo‚ ti yi ’dote bo na kulia adi lepe a ŋutu laga Ŋun anyumundro ma gbo’da a kaŋerani lo kulia ti ŋutulu laga zoru ku laga atatuwa kilo itro ilo. 43’Bo kakeyo kilo giri ’dodru bo na kulia ti ilu ŋutu de‚ adi ŋutulu giri lo rugo lepe kilo irumbi ’diya na torozi ku kari ti lepe kine.” 44Ku Petero inga ilo kukulia kine kulia de‚ Yuka Nakiyena druga kiyundra ka ku ŋutulu giri lo yinga kulia ŋani kine kilo kini. 45’Bo ŋutulu laga ataaro laga a karuko‚ lo pondra kasi Petero kugele kilo arambu ’beri koru igbonaga Ŋun a’doga Monyazi kilo ku yuka nakiyena itro koru ina‚ 46igbonaga ko ayinga ko i kulia ku kuliesi naga ka’de ka’de i be’ya na kari ti Ŋun ina. Petero druga teyitokindro ko adi‚ 47“Ŋa lo romoki goza pio kine i tikini kilo ŋutulu de baputizilo, laga lo rumbi Yuka Nakiyena beti naga ma yi lepe rumbi ina ya?” 48Lepe druga takindra ko kukuzu i ’deba na baputizilo ku kari ti Yesu Kristo Kine. I bo ŋanina ko druga ma’yu ’beri ku lepeni adi ti lepe sakani luŋa ku’de ki’do.

will be added

X\