3 YOANE 1

1Temizitiolo aroma ku Gayo laga lo nyanyara, laga ma na lepe nyadrini a ’dirilo. 2Wori lio lo nyari nalo‚ na magu Ŋun adi kulia konu kine giri ti gbo’dini a na’bu, mugu nonuna ti gbo’dini a na’bu itro be naga ma yuka nonuna gbo’dini a na’buna. 3’Bo na kazu anyola koru i luŋa laga ma ku’de luŋaseri yeŋundri lu laga lo ’dodru bo nonu na kulia adi do laga ku teili lo to’dirilo, be naga mo do sakani i kulia ti to’diri kine katani ina. 4Nyola ne’de ’bayi kuweni naga a druma arodru ina de, ku naga ma na yingini adi ŋazi kuwe kilo kepodru bo na kulia ti to’diri kinena. 5Wori lio lo nyari nalo‚ kita naga mo do kondrinina a na teili lo to’diri i naga mo do konakindri luŋaseri kilo kita ina‚ ’dibani kodro ku do laga aku deni ko kpe. 6Kilo de a’dodru bo na kulia ti nyadru nonuna ku tomore na karuko kilo i koŋoni. Do lo kondra a lo’bu ku do laga nyomodru ko i kiko lasikolo yu be naga ma zukini kaloko ti Ŋun kilona. 7Ko alupodru ku kari ti Ŋun kine‚ ko aku rukundro le’de ŋo ku ŋutulu laga aku rugo Ŋun kilo yu. 8Kuwade laga yi‚ a na’bu ku yi rukundri ŋutulu laga be kilo de kilo i logu na ko‚ ma yi ku gbo’dini a kakita kasi ko kugele i kulia ti to’diri kine. 9Na awurokindro tomore na karuko kilo ku’de kuliata, ’bo Diotrefe laga lo nyadru gbo’da a druma kasiko i koŋo yulo aku rugo kulia kuwe kine. 10Ku kine kulia de‚ ku na laga autu‚ na itodinikindro ta konesi naga ma lepe kondri kine‚ lepe a’dadru yi ku kuliesi naga a naro kine. Ina kondra na lepe de aku romoki lepe‚ ’bo lepe a’biye ku rukundro luŋaseri kilo‚ ’bo lepe babangu luŋaseri laga lo nyadru kodro rukundro ko kilo‚ i droŋodru na luŋaseri ŋani kilo i dridriŋi na tomore na karuko kilona kaŋo. 11Wori lio lo nyari nalo‚ ku mimiru kulia naro kine‚ ’bo miru kulia na’bu kine ayu. Ŋutu laga lo kondra a lo’bu ilo a lo Ŋun. Ŋutu laga lo kondra a loro ilo aku meri Ŋun. 12Ŋutu kilo giri a’dodru bo na kulia ti Demetrio kine a lo’bu. Kulia ti to’diri kine a’dodru bo ŋanina itro. Iye‚ na lepe lo ’dodru bo na lepe na kuliana itro‚ ’bo ta adeni adi bo na kulia na ’doru na kine a naga mŋgba. 13Na gbo ku kuliata rodri i wurokindro na do‚ ’bo na ani nyadru wudyo ku kalamu lo vino. 14Na yendru adi na iyeyenga konu yu‚ ma yi ku tokuliaki kasi do i konye konye. 15Teili lo trotrolo ti gbo’dini konu yu. Worisi kolu kilo aroma ku do. Rome roma ku worisi kilo giri gele gele itro.

will be added

X\