2 TIMOTEO 4

1Na takindra do kukuzu ku Ŋun i koŋoni‚ ku Kristo Yesu i koŋoni itro laga lo ŋedya kulia ti ŋutulu laga zoru ku laga atatuwa kilo itro ilo‚ ku puru na lepena seku tumata na lepena itro‚ 2adi trukoki kulia kine, rutunyuki mugu ’duu i baŋe na’bu i baŋe naro‚ rerenyani ku ŋutulu kilo‚ ririŋe ko‚ male mugu kasikoni itro‚ ku teili laga mada koru‚ ku togo’yuna itro. 3’Bo baŋena iyeyeŋundra naga ŋutulu kilo aka rugi togole laga sosoni. Ko itunakindra ’beri katogolo laga lo itrotroŋuza suwo kasiko kilo ma ko togo’ini kulia naga ma ŋutulu nyadrini kine ka’delo. 4Ŋutulu kilo i’di’di suwo kase kilo ka’bi se ku yinga kulia ti to’diri kine‚ ko ilolopugo ’beri i yinga na likikirito laga a ’busa ’busa kilo. 5’Bo laga do, tine ti mugu i kuliata giri katani‚ gbo’di ku teili logo i luŋulio katani‚ kone kita na katrukoni lo kuu na’buna‚ leŋe kita ŋani naga atiki dona. 6Laga na‚ tinade na akukunaki i yanyakindra na mugu azo. Luŋa lo pilarani nalo ayeŋundra azo. 7Na amoro moro naga a na’bu‚ na alenga wokena‚ na a’deba rugona tritri. 8Ŋiyoro tinade yogono lo tiki ku kulia ti logbiye lo’bulo lu riritaki na‚ laga ma Mata laga a Kaŋerani lo kulia laga mŋgbalo ma tikindri na i lu luŋa de lu‚ agbo’da kuweni ka’deloni, ’bo ku ŋutulu giri laga anyadru medra puru na lepena kilo. 9Mori ku teili giri i pondra kuweni wule‚ 10igbonaga Dema laga lo nyadru ina ka delo akolokindro na‚ autu Tesalonike yu ina. Kereseke autu Galatia yu, ’bo Tito autu Dalamatia yu. 11Luka ka’delo laga seku na kugele. Doke Marako, pondrita seku lepe kugele‚ igbonaga lepe ilologu na koru ku kitana. 12Na asonyodru Tukiko Efeso yu. 13Konu pondrani, zowu bongo na guguma naga ma na kolodri Troa yu ku Karipo ina‚ ku bukulo‚ alanguna lo’bua na kukuna a karatasi kine. 14Alekezanda laga a kanitoni lo mo’dolo akondra na a loro koru. Matalo iropakindra lepe konesi ti lepe kine. 15Tine ti mugu ku kulia ti lepe kine igbonaga lepe kazu amoro ku teriŋi ku kulia naga ma yi tazini kine. 16I naga ma na ’dodri bo na kuliana a kayo nu‚ ŋutu ’bayi lo ŋarakindra na‚ ’bo ko giri akolokindro na. kine kulia de ka’bi ku kekena a toro nasiko tro. 17’Bo Matalo alira kuwe lagani i tikindra na na teriŋi ma na ku trugini kuu na’buna giri‚ ma Monyazi kilo giri ku yingi ’busa. Kuwade na anine ku kemurulo i kutuni. 18Matalo ininundra na i kuliata naro kine giri‚ ’bo lepe iritadru na yeŋadru tozo i tumata nanye na ’dikona. Ti lepe purani pura paratra paratra. Amena. 19Rome roma ku Pirisi la seku Akula‚ ku ŋutulu ti ’ba lo Onesiforo kilo. 20Erasito asaka Korintio yu. Na akolokindro Torofimo ku tuwane Mileto yu. 21Mori ku teili giri i pondra ti inga za’belo aku yeŋundra. Eubulo‚ ku Pudente‚ Lino‚ Kilaudia ku luŋaseri kilo giri aroma ku do. 22Ti Matalo gbo’dini ku do. ’Busa na’buna ti gbo’dini ku ta.

will be added

X\