2 TIMOTEO 2

1Kuwade do, laga a ŋiro liolo, gbo’di ku teriŋi ku ’busa na’bu naga ku Kristo Yesu katanina. 2Kulia naga mo do yingi kuweni ku ka’doto laga rodri ti bo na kulia kine i koŋoni itro kine, kolokindri kulia ŋani kine ku ŋutulu laga ku teiliko ti to’diri, laga lo igbo’da ku tobodo i togo’yu na ku’de ŋutulu itro kilo. 3Ŋarundri luŋulio be kamoroni laga lo’bu lo Kristo Yesu ilo. 4Le’de kamoroni ’bayi laga autu i moro yu laga lo ku lubo i kulia ti ’ba kine itro, ’bo lepe nyadru tikindra druma lonye laga lo wudyo kari kanye kinelo nyola. 5Ŋutu lo morodru i biro katanilo ani rumbi yogono kugbo lepe aku morodru be naga ma kukuzuna nyadrinina. 6Kakuruni lo sandru mugu ku kitalo ti lepe riene ’didrana a kayo. 7Yole kulia naga ma na tazi kine, igbonaga Matalo itikindra do yo’yu na denani kuliata girina ina. 8Rame Yesu Kristo laga lo ŋiyu i dridriŋi na ŋutulu laga atatuwa kilo‚ lo yuŋe i ketimi na Dawidi ilo‚ be naga kuu na’bu niona ma trukokindrina. 9Na rumbi luŋulio ku kulia ti ina kuu na’buna de‚ yeŋundra tozo kuwe torani be katoronyani. ’Bo kulia ti Ŋun kine aku tora. 10Kuwade na gbo ku teili lo rile ku kulia ti ŋutulu laga anyume kilo‚ ma ko lepe ku rumbi rite naga ku Kristo Yesu katani na toluponi yi i mo’yu naga ani lengana kata yuna. 11Kulia na tatayi kine a ’diri adi‚ Ku yi laga atatuwa kasi lepe kugele‚ yi igbo’da zoru kasi lepe kugele itro. 12Ku yi laga ku teili lo rile‚ yi i’deba tumatana kasi lepe kugele itro. Ku yi laga arenya lepe, lepe irerenya yi ’do. 13Ku yi laga ’ba teiliko ti to’diri lepe ilo saka ku teili lo to’dirilo ’duu, igbonaga lepe ani romoki renya mugu ina. 14Toyuluki ko kine kulia de. Taki ko kukuzu ku Ŋun i koŋoni adi ka’bi ko ku rerenya rerenya ku kulia na tatayi kine, kine kulia de ani logu‚ ’bo ko kokorozu kayiŋa kilo ’du. 15Tiki teili lolulo i kpeza na mugu a ŋutu laga ma Ŋun rugi a lo’bulo‚ a kakitani laga ani ’depa ku yukuwe ku kita ŋanina mo do togo’ini kulia ti to’diri kine soso. 16Girani gira ku roroto laga a ’busa ’busa ti ŋutulu ti ina ka de laga ani teminizo Ŋun kilo‚ igbonaga ko ititikindra ŋutulu i redra na kulia ti Ŋun kine ’do ’do ina. 17’Bo kulia na ta ko kine inyonyosu ŋutu beti gbogbo. Ŋutu laga kilo de i dridriŋini kilo a Humenayo seku Fileto‚ 18laga agira i merete ku kulia ti to’diri kine‚ igbonaga ko atazu adi ŋiye na ŋutulu laga atatuwa kilona akondra mugu azo. 19’Bo muko naga ma Ŋun ’delakindri tritri na lira ’duuna‚ na gbo’da ku ina wure de i muguni ina adi, “Matalo adeni ŋutulu laga a kanye kilo,” ’bo, “Ŋutulu giri laga lo ’di’dindra kari ti Matalo kine kilo ti ko koloki torona kaŋo.” 20I kadi naga drumana kata yu toro’bo kata, agbo’da kukuna ku drumoni, kuwa riye ka’deloni, ’bo ku mbau, ku lipo itro. Ku’de kilo a lo yakiya ku komo, ku’de kilo a lo yakiya mu luŋa. 21Kugbo le’de ŋutu laga atoke’ya mugu ku kine kulia naro giri kine de, lepe igbo’da a turu’be laga lo yakiya ku komo, atokela‚ a rezema ku monye kadilo‚ akukunaki i kitazi naga na’bu kine ’dia gbo adinyo kpe. 22Kuwade woki kaŋo i ki’beŋa ti to’bula kine‚ keporo bo na logbiye lo’bulo, rugona‚ nyadruna, ku teili lo trotrolo‚ ku kulu ŋutulu laga lo lungu Matalo ku teiliko laga a lokiye kilo kugele. 23Girani gira ku rerenyeta naga ti mali naga ’ba dendra kine. Do adeni adi se na izowundra ŋalapa. 24Upiye lo Matalo ka’bi ku ŋaŋalapa, ’bo ti lepe gbo’dini ku teili lo’bu ku ŋutulu giri‚ a katogoloni laga ku tobodo, ku teili lo mada. 25Ti lepe togole kararenya kilo ku teili lo mada. ’Bo ŋo laga de Ŋun ititikindra ko i lopugo na ’beri i dendra na kulia ti to’diri, 26ma ko ku rumbi yoyolozu naludu ma ko ku wogini i biribiri lo kasosoyini lo kulialo katani kaŋo‚ lepe laga kazu lo moga ko i kondra na ŋo laga ma nye nyadrinilo ilo.

will be added

X\