2 TESALONIKE 3

1Luŋaseri, kulia naga a tutuweto kine, maketa Ŋun ku yi ma kulia ti Matalo kine ku ririara i rumbi na pura, be naga kazu kasu dridriŋinina‚ 2ma yi ku nine i kenisi ti ŋutulu laga lo kondra a bada kilo ku ŋutulu laga a loro kilo, ’bo agbo’da ŋutu kilo giri laga ku rugo kiloni. 3’Bo Matalo gbo ku teili lo to’diri, laga lo itoliriza ta‚ lo itizu ta ku ŋutu lorolo. 4Ŋun atikindra yi teili lo lidra ku ta adi kulia naga ma yi takindri ta kukuzu kine ta lo kondra‚ ’bo ta ikokondra ’duu. 5Ti Matalo ŋane teiliko kasu kilo i dendra na nyadru na Ŋun‚ ku teili lo rile lo Kristolo. 6Nyenaga luŋaseri, yi kilo takindra ta kukuzu ku kari ti Mata Yesu Kristo kine‚ adi giranita gira ku luŋase le’de laga lo woro a bada ku tolu’betolo, agbo’da ku kulia na pupute naga ma yi togo’ini ta kineni. 7’Bo ta adeni adi nyadru kedri kodro angu ta mirundra yi. Yi aku gbo’da a lu’betiko i naga ma yi sakani kasu dridriŋi yuna. 8Yi aku nyosu kapazi ti le’de ŋutu kana, ’bo ku trereka naga ku mamalayi na ’beri‚ yi akondra kita tukaze ku tupara ka’bi yi ku gbo’da a ŋo lo tikindra le’de ŋutu kasu dridriŋini tomoni. 9Agbo’da adi yi ’ba teriŋi i kondra deni, ’bo ma yi ku tikindri ’beri a kpiye kasuni, ma ta ku mirundri yi ’busa. 10I naga ma yi gbo’dini kasi ta kugelena‚ yi atakindra ta kukuzu adi kugbo le’de ŋutu laga a’biye ku kita‚ lepe ka’bi ku nyonyosu. 11’Bo yi ayinga adi ku’de kilo ŋutulu kasu dridriŋini kilo sasakatu a bada a lu’betiko, ko ani kondra kita ’bo ko lulupuzo ku ku’de ŋutulu i kulia kata a go kuwe. 12Yi takindra ŋutulu laga be kilo de kilo kukuzu‚ yi ma’yu ’beri kasiko itro ku Mata laga Yesu Kristo katani, adi ti ko kone kita ku teiliko mada, ma ko ku nyosuni kapazi kase lepe kilo ’busa. 13’Bo laga ta luŋaseri, ku kakanyata ku konesi naga a na’bu kine. 14Kugbo le’de ŋutu laga ani yinga kulia kaya naga ma yi wudyini i ina waraga de katani kine, meteta ŋutu ŋanilo soso. Ka’bi ta ku momora kasi lepe‚ ma lepe ku rumbini yukuwe ’busa. 15’Bo ku kokonuta lepe be miriku, ’bo tepineta lepe be luŋase. 16Nyenaga Mata lepe laga ku teili lo trotrolo ti ’dogini ta ku teili lo trotro i baŋesi kine giri, i kuliata kine giri itro. Ti Matalo gbo’dini ku ta giri. 17Na laga Paulo awudyo ilo rome de ku keni lio lepe. Ilo de a kpiye lo wuru na i waragaki kuwe kine katani girilo. Na lo bita wudyo de. 18’Busa na’bu na Mata lika Yesu Kristona ti si’dani ku ta giri.

will be added

X\