2 TESALONIKE 2

1Luŋaseri, ku kulia ti pondra na Mata lika Yesu Kristo ku tomora nika kasi lepena, yi magu ta, 2adi yoyolozu nasuna ka’bi ku yoyongu yoyongu wule wule, teiliko kasu kilo ka’bi ku ’do’do ’do’do, ŋona ku kulia na kpikpiya ti yuka kine‚ kugbo ku kulia ku’de na tatayi kine‚ kugbo ku waraga naga na tayi adi ŋiyu kaya yu‚ na kulia adi luŋa lo Matalo ayeŋundra azona. 3Le’de ŋutu ka’bi ku ’bo’boli ’bo’boli ta ku le’de ŋo tro. Igbonaga lu luŋa de aka yeŋundrani ti inga ŋutulu kilo aku pazu Ŋun ku teriŋi‚ ti inga kakokoreyini lo kukuzulo aku kpeza muguna. Lepe laga lo ikakaraki‚ 4laga lo moro ku sisinga na mugu ku ŋo laga lo luŋu a muloko ku laga a ŋo lo teteminio kilo giri‚ yeŋadru tozo i gbi’diki na lepe i kadi na Ŋun ina kata yu i kpekindra na mugu adi nye a Ŋun. 5Ta aku rambu adi na kazu atrukokindro ta kine kulia de‚ ti inga na lu kasu dridriŋi yu ya? 6’Bo ta adeni ŋo lo gokindra lepe tinadelo, adi ma lepe ku kpezi mugu i luŋa lonye lu ’busa. 7Kulia ti kokorozu na kukuzuna naga a kulia naga na mumuyi mumuyi kine apoki i kita azo. ’Bo tinade kaguwanilo nye lo igogoza kulia ŋani kine ti inga lepe aku ’dutuzi kaŋo. 8I bo ŋanina kakokoreyini lo kukuzulo ikpekpeza mugu. Mata laga Yesu itatuza lepe ku yuka naga na lupundro kanye kutu yu ina‚ i tukarakindra na lepe ku mo’yu naga i pondra nanyena yu. 9Kakokoreyini lo kukuzulo ipopondra ku kita na konu Satanina. Lepe ikondra konesi giri naga ku teriŋi kine ku kpiyesi‚ ku wonyesi laga ku to’bure kilo itro. 10Lepe i’bo’boliza ŋutulu laga lo mondru karaki kilo ku toŋulupa naro koru‚ igbonaga ŋutulu ŋani kilo a’biye ku nyadru kulia ti to’diri kine i riteni na ko ina. 11Ku kine kulia de Ŋun lo sunyundro kasikoni tomboli naga ku teriŋi ma ko ku rugini kulia ti to’bure kine ’busa. 12Kuwade ŋutulu giri laga aku rugo kulia ti to’diri kine kilo ’bo laga lo nyola ku kulia naro kine kilo ko iŋeŋeraki kulia a naro. 13’Bo nyadru ti yi tikindri Ŋun iyete mu luŋa ku ta, luŋaseri laga ma Matalo nyadrini kilo, igbonaga Ŋun anyumundro ta ŋiyu kazu ’bero i rite‚ ku naga ma Yuka Nakiyena toke’i tana‚ ku naga ma ta rugini kulia ti to’diri kine itrona. 14Ŋun alungu ta i rumbi na kine kulia de ku kiko lo kuu na’bu naga ma yi truginina ma ta ku ŋarundri mo’yu na Mata lika Yesu Kristo ina. 15Kuwade‚ luŋaseri, liranita tritri‚ ’depeta kulia na pupute naga ma yi togo’i ta kine‚ ŋona ku kulia na trutruko, kugbo ku waraga nikana. 16Nyenaga Mata lika Yesu Kristo lepe, ku Ŋun Monye lika laga anyadru yi, laga a’doga yi ku ruda na teili naga ani lengana, ku yendru na’buna ku kulia ti ’busa na’bu kinelo, 17ti lepe ru’ini teiliko kasu kilo, ti lepe tolirizi ta i kondra na konesi na’bu ku i tazu na kuliesi na’bu kine giri.

will be added

X\