2 TESALONIKE 1

1Paulo seku Silivano ku Timoteo, aroma ku tomore na karuko ti Tesalonike laga a ti Ŋun Monye likalo ku Mata Yesu Kristo kilo. 2’Busa na’buna ku teili lo trotro lo ŋiyu ku Ŋun Monyelo yu, ku Mata laga Yesu Kristo yu itrolo ti gbo’dini ku ta. 3Luŋaseri, nyara adi ti yi tikindri Ŋun iyete mu luŋa ku kulia kasu kine‚ be naga ma zukinina‚ igbonaga rugo nasuna ina ’du’dudyo koru‚ ’bo nyadru nasu naga ma ta nyadrini ’beri giri gele gelena ina ’ya’yu muga kasu dridriŋini ina. 4Kuwade yi lepe pupudya beri ku ta i tomoresi ti karuko ti Ŋun kilo katani‚ ku kulia ti teiliko kasu ti rile kilo ku ti rugo nasuna i wowonye nasuna giri katani ku sasanya naga ma ta sakani katani ku teiliko logo ina. 5kine kulia de a kpiye lo ŋedya na Ŋun na kulia naga ma lepe ku kendri ta a lo zuzuki ku tumata nanye naga ma ta rumbini luŋulio ku kulia ti lepe kinena. 6’Bo igbo’da soso ku Ŋun i konyeni i roba na ŋutulu lo sasandru ta kilo ku sasanya, 7ku i tikindra na yi kasi ta laga lo sasanya kilo yuka na teiliko i luŋa lo kpiyani Yesu Kristo ŋiyu i ’diko yu, ku malaika ti lepe laga ku teriŋi kilo kugele, 8ku ŋede lo kima na kokobu lu. Lepe iropakindra ŋutulu laga aku deni Ŋun kilo ku laga aku sobu kulia ti kuu na’bu na Mata lika laga Yesu kilo torozi kasiko kine. 9Ko isasanya ku rope na toro ŋaga na tukarakini ko paratra paratra ku tokore nasiko naga kaŋo ku Ŋun i koŋo yu, ku mo’yu na lepe naga ku teriŋina. 10I lu luŋa de lepe ipopo­ndra i rumbi na pura ku ŋutulu kanye kiloni, ku sopo naga ku nyolana ku ŋutulu lo rugo lepe kilo girini itro‚ igbonaga ta arugo bo na kulia naga ma yi ’dodri kinena ina. 11Ku kine kulia de yi magu Ŋun mu luŋa ku ta adi Ŋun likalo ti kendri ta a lo zuzuki ku luŋu naga ma lepe lungi tana‚ ma lepe ku torumokindri rambu naga a na’bu giri ina ku konesi giri naga ku rugo kine ku teriŋi nanyena, 12ma kari ti lepe kine pupura kasuni, ma ta lepe ku rumbi pura ku lepeni itro, beti naga ma ’busa na’bu na Ŋun likalo ku Mata Yesu Kristo ina ma gbo’dinina.

will be added

X\