2 PETERO 3

1Ŋutulu laga ma na nyadri kilo‚ ina de a waraga naga a togi mure naga ma na wurokindri tana. I waragaki ŋani kine katani mure katru‚ na atoyulukindro ta kulia i toŋizu na yoyolozu nasu naga ’ba toŋulupana ’do‚ 2ma ta ku rambi kulia naga ma kakeyo laga a lokiye kilo tazi ’bero kine‚ ku kukuzu na Mata laga Kariteni naga ma lososonyo kasu kilo puputundri ina. 3A kayona‚ deneta adi i ’dute na baŋesi kine ka’data kilo ipopondra i ’dadru. Ko ikekepodru bo na ki’beŋa kase lepe kine‚ 4ko ikulia adi‚ “Lepe kazu asarakindra ŋutu kulia adi nye ipopondra. Lepe ilo yaya? ’Bo ŋiyu i luŋa lo ’balazini merenyezi kaya kulu lu kapa kilo giri a’du­teki be naga ma ko gbo’dini i suluki na gbekini kana nu.” 5Ko boŋo aka adi kazu ’bero ’dikona kata ku kulia na ta Ŋun kine‚ ’bo kana agbeki ŋiyu i pio katani‚ ’bo ku pio itro. 6’Bo ku kine kulia de ka naga i ilu luŋa de nu akaraki kaŋo ku pio na zore kine. 7’Bo ku kulia nagele na tayi ŋani kine ’dikona ku ka na tinadena ina riritaki i mondru na kima yeŋadru tozo i luŋa lo ŋerani kulia lo tukarakini ŋutulu laga ani teminizo Ŋun kilo lu. 8’Bo ŋutulu laga ma na nyadri kilo‚ ku ’bo’boŋota kine kulia nagele kine de‚ adi ku Ŋun i konyeni, kolo gelelo gbo beti kiŋazi alifu gele‚ ’bo kiŋazi alifu gele kilo gbo a kolo gele. 9Matalo ani pipiridra mugu ku kulia naga ma lepe sarakindri kine‚ beti naga ma ku’de kilo ŋutulu rambi pipiridra na ’berina, ’bo lepe gbo ku teili lo mada kasuni igbonaga lepe ani nyadru adi le’de ŋutu ti karakini, ’bo ti ŋutulu giri lopuke teiliko. 10’Bo luŋa lo Matalo iyeyeŋundra be kolani. ’Dikona irorosodru ku burulu druma‚ kapa kilo giri ililisoko ku kima. Kana ku kapazi giri laga katani kilo inonokara kaŋo. 11Kugbo kilo kapa de laga ililisoko deŋa‚ laga ta‚ ma ta gbo’da adinyo ya? Gbo’dita ku gbiyeri laga atokela lo purani Ŋun ilo. 12Moneta luŋa lo Ŋun lu‚ ’bo tikita ti lepe nyoŋu mugu wule. Luŋa ŋanilo ititikindra ’dikona inonoka‚ ililisoko kaŋo‚ ’bo kapa kilo giri ililisoko ku kima. 13’Bo yi kilo mondru ’diko naluduna ku ka naluduna be naga ma lepe saranina, ’bo logbiye lo’bulo isasaka katani. 14Kuwade ŋutulu laga ma na nyadri kilo‚ kasu mondru na kilo ŋo deni‚ morita ku teili giri ma lepe ku rumbi ta ’ba mundri‚ ’ba merikozi ku teili lo trotro. 15Yoleta adi teili lo mada lo Matalo nyelo tikindra yi i riteni‚ beti naga Paulo‚ luŋase lika lo nyari yilo ma wurokindri tana ku totore na tiki lepena. 16Lepe awudyo kine kulia de i waragaki kanye kine katani giri. A ’diri ku’de kine kulia i waragaki kine katani‚ dena ŋanina a nago‚ kuwade ŋutulu laga ’ba dendra kilo ku laga aku lira tritri kilo se lo pipiridra ko‚ be naga ma ko pipiridri kulia na wuwuro ku’de kine i tukarakindra na ’beri ina. 17Kuwade ta laga ma na nyadri kilo‚ gbo’dita ku konye, igbonaga ta adeni kine kulia de ’berona, bayi na ŋutulu laga ani sobu kukuzuki kilo ka’bi ku pikundro ta kaŋo, ka’bi ta ku kokoloki lira nasu naga tritrina. 18’Bo ’dudrita a nuu ku ’busa na’bu ku dena na Mata lika Kariteni Yesu Kristo ina. Ti lepe purani pura tinade paratra paratra. Amena.

will be added

X\