2 PETERO 2

1Nyenaga kakeyo ti to’bure kilo aŋiye kazu i dridriŋi na ŋutulu ti Isiraeli kilo, be naga katogolo ti to’bure kilo igbogbo’da kasu dridriŋini itrona. Ŋutu ŋani kilo itolubo togole lo to’bure laga lo tukarakini ŋutululo, trugo adi i renya na Mata laga lo gborundro se ilo. Ko izakindra ’beri karaki na tukarakini se lepe wuleŋa. 2Ŋutulu rodri ikekepodru konesi kasiko naro naro kine‚ ’bo ku kulia kasiko kine Kiko lo to’dirilo i’da’data. 3Ku kulia ti roŋgbo nasikona kine ko inyonyo ta ku tobudruŋa, ku kulia na tayi ku to’bure. ’Bo ŋiyu ’bero ŋera nasiko na kuliana nu momondru ko‚ ’bo tukaraki nasikona ani boŋole. 4’Bo Ŋun kazu aku kolokindro malaika laga akondra toro kilo‚ ’bo lepe agupadru ko ka i piri na ŋutulu laga atatuwa kilo kata yu‚ i drilio na mude kilikili kine kata yu‚ i piri na ritani ko i mondru na ŋera na kulia nu. 5Lepe aku kolokindro ŋutulu ti ’bero kilo‚ ’bo lepe atizu Noa‚ laga a katrukoni lo kulia ti logbiye lo’bulo kine ku ku’de ŋutulu burio‚ i luŋa laga ma lepe tikindri kana zoreni ku pio i tukarakindra na ŋutulu laga aku teminizo Ŋun kilo lu. 6Kugbo lepe laga atonoga kezi na Sodomana ku na Gomorana girigiri a lopotrotro, lepe aŋedya kulia kasiko kine a naro i tukarakindra na ko‚ i ’delakindra na ko a kpiyesi ti ŋutulu laga lo ipondra a bo‚ laga ani teminizo Ŋun kilo. 7’Bo lepe aninadru Loto laga a ŋutu lo’bu‚ lo saka ku drelia ku gbiyeri loro lo konye lopi ti ŋutulu laga a loro kilo. 8’Bo ku lepe i medra na ko ku i yinga na ko‚ ti lepe lu saka kasiko i dridriŋi yu mu luŋa‚ ilo ŋutu laga mŋgba delo teili lo lepe laga a lo’bulo arumbi drelia koru ku kulia ti konesi kasiko naga kukuzuna ani rugo kine. 9Matalo adeni ninadru na ŋutulu laga lo teminizo Ŋun kilo i modru katani‚ ’bo lepe adeni riridra na ŋutulu laga ani gbo’da mŋgba kilo i mondru na rope na toro yeŋadru suu i luŋa lo ŋerani kulia lu‚ 10alanguna ŋutulu laga lo kepodru bo na ki’beŋa kase ti mugu naga na kokorozu se kine‚ laga lo ’dadru teriŋi na ka’dola ti kuwe kilona. Ŋutulu ŋani kilo gbo ku teiliko logo‚ ko kilo kondra beti naga ma se nyadrinina‚ ko ani kuze i ’dadru na malaika laga lo momo’yu kilo‚ 11’bo malaika laga a riŋiko arodru ko kilo ku teriŋi na konani kitazi kine‚ ko ani sosozu kulia naga a ’dateta kine kasiko i muguni ku Matalo i koŋoni. 12’Bo kilo ŋutulu de laga be gboroŋa laga ani rambu kulia‚ laga ayuŋele i togora‚ i tatuyi kilo‚ ŋutulu laga lo ’dadru kuliata naga ko aku deni kine‚ ikakaraki be naga ma gboroŋa ŋani kilo kakarakinina. 13Ko irumbi kulia naro a rope na kulia naro naga ma ko kondrini kine. Ko rambu adi kipizi na bo na ki’beŋa ti mugu kine ku tuparana ina a nyola. ’Bo ko a mundri‚ ko a merikozi, ko kilo kepodru bo na toŋulupa nasena ku nyola‚ ti ko kilo nyosu kasi ta kugele. 14Konye kasiko kilo a lopi i kondra na towute ’duu. Ko ani yimo i galadru na torozi. Ko kilo luluga ŋutulu laga ani lira tritri kilo. Roŋgbolo adiniki ko igbonaga ko kondra de ’duuna. Ko a ŋazi laga alomo! 15Ko akolokindro kiko laga gbogbolo, ’bo ko aliaŋa‚ igbonaga ko akepodru kiko lo Balama‚ ŋiro lo Beora‚ laga lo nyadru rumbi na rezema ku kondra na kulia narona ilo. 16’Bo lepe aririŋa ku naga ma lepe kokorozi kukuzuna ina. Drongi naga ani kuliana akulia ku roro lo ŋutu‚ agoza mali na kakeyonilo. 17Kilo ŋutulu de ko a kidia laga ’ba pio‚ ko a ’dikolo na zondra kudu laga ma lobiyu buradri ilo. ’Bo mude naga kilikilina ariritaki ko. 18Ko tataazu kulia naga a ’busa ’busa kine ku sisinga na ’beri‚ ko kilo luluga ŋutulu ku ki’beŋa naro ti mugu‚ ŋutulu lo luluka kilo labu i dridriŋi na ŋutulu laga lo babayizi kilo‚ ’bo labu ŋanina a nago. 19Ko sarakindra karaŋa adi ko ilalake, ’bo ko lepe ku ’beri a upi ti kulia naro naga na kokorozu se kine. ’Bo ŋutulo a upiye lo ŋo lo tiga nyelo. 20Kugbo ŋutulu laga alabu i kulia ti ka naga na kokorozu se kine ku dendra nase na Mata lika Kariteni Yesu Kristo ina‚ i bo ŋanina ku ko laga ayitozi bo i kulia ŋani kine kata yu‚ ku ko laga atiga ko‚ gbiyeri lasiko laga bonilo igbo’da a loro arodru laga a kayolo. 21Troru kedri kodro a na’bu ku ko laga aku deni kulia ti logbiye lo’bulo kine alanguna, i bo na dendrana, ku ko laga alopuke bo i ko’yu na kukuzu naga a nakiye na tiki kona. 22Kulia na guguma naga a ’diri kine akondra ’beri kasikoni adi‚ “ ’Diolo ayite bo kanye zayini‚ ’bo ŋote na wurina ’dia kodro atukuwe kpe‚ lepe iyite bo i ’odra na mugu i wo’do’do katani ’do.”

will be added

X\