2 PETERO 1

1Simona Petero laga a upiye lo Yesu Kristo, laga a lososonyo lo lepe itro ilo aroma ku ŋutulu giri laga lo gbo’da ku rugo naga a na’bu, naga zozo be nikana kilo, ku naga ma Ŋun Kariteni lika laga Yesu Kristolo gbo’dini mŋgbalona. 2’Busa na’buna ku teili lo trotrolo ti ’yale ’ya ’beri kasuni i dendra na Ŋun seku Yesu Mata likalo. 3Teriŋi na lepe naga a na Ŋun ina atikindra yi kuliata kine giri naga na romoki ku ru naga ku gbiyeri lo purani Ŋun kine, ku dendra nika na lepe laga alungu yi i lubo i mo’yu nanyena seku ’bu’busi nanyena kata yulo. 4Ku kine kuliata de lepe asarakindra yi kulia kanye naga a drumala koru, naga a na’bu na’bu kine, adi ku kulia ŋani kine ma ta ku ninundra ’beri i kulia naga na kokorozu ŋutulu laga i kani kilo ku nyara na kulia naro, ma ta ku ŋarundra gbiyeri lo Ŋun ilo. 5Ku kine kulia de morita ku teili giri i ’yalakindra na gbiyeri lo’bu kasu rugo kini, i gbiyeri lo’bu kini dendra, 6i dendra kini teili lo payini kulia ti mugu, i teili lo payini kulia ti mugu kini teili lo rile‚ i teili lo rile kini gbiyeri lo purani Ŋun‚ 7i gbiyeri lo purani Ŋun kini nyadru na nyarani luŋaseri‚ i nyadru na nyarani luŋaseri kini nyadru na nyarani ŋutulu girina. 8Kugbo kine kulia de gbo kasu katani‚ ku ko naga ariara ko igokindra ta gbo’da naga ’ba loguna‚ naga ’ba trora na konye‚ i dena na Mata lika Yesu Kristo. 9’Bo ŋutu laga lo gbo’da ’ba kulia naga kine de ilo, lepe ’ba konye, lepe lo medra kapa laga nyogoŋani kilo ka’delo, lepe aboŋo tokela nanye na torozi ti ’bero kine kaŋo. 10Ku kine kulia de, luŋaseri, morita ku puso koru i toliriza na luŋe nasuna ku nyume nasuna, igbonaga ku ta laga akondra de ta aka pupukoni ina. 11Kuwade kiko laga lo lubi ta i tumata naga ani lenga na Mata lika Kariteni Yesu Kristo ina kata yu ilo iŋaŋaki ta gboŋa. 12Kuwade na aka zara i toyulukindro na ta kine kulia de ’do ’doni, ’dibani kodro ku ta laga adeni ko, ’dibani kodro ku ta laga alira tritri i kulia ti to’diri naga na gbo’da kasuni kine kpe. 13Na rambu adi a na’bu, ti inga na gbo ku ina mugu naga a morogona de, i toŋizu na ta i rambu na kulia ’do, 14igbonaga na adeni adi akoloki baŋe a naŋutruna mugu nio naga a morogona de ilulunyu, beti naga ma Mata lika Yesu Kristo kpekindri nana. 15Na imodyu ku teili giri i tikindra na ta i rambu kine kulia de mu luŋazi kuwe boni. 16Ku yi laga atrukokindro ta kulia ti teriŋi na Mata lika Yesu Kristo ku pondra na lepena kine‚ yi aku kepodru likikirito laga a ti totore na toŋulupa kilo‚ ’bo yi amedra kazu todruma na lepe na tumatana ku konye kaya lepe. 17’Bo lepe arumbi sopo ku pura ku Ŋun laga Monyelo yu‚ i luŋa laga ma lepe yingi roro lo ŋiyu ku Ŋun laga lo pupura koru i ’diko yu lu adi‚ “Ilo de a Ŋiro lio‚ a Ŋutu laga ma na nyadrilo‚ na anyola koru ku lepe.” 18’Bo yi ayinga ilo roro de lo kuu ŋiyu i ’diko yu ilo‚ i naga ma yi gbo’dini kasi lepe kugele i mere laga a lokiyelo ki yuna. 19Kuwade kulia na ta kakeyo kilo kine atoliraki kayani ku teriŋi koru. Ku ta laga a’delakindra teiliko kasu kilo i kulia ŋani kine kini, ta ikondra a na’bu, igbonaga ko a kima naga na kobu i mude kata yeŋadru suu i wara na ka nu, i lupundro na lelegolo kasu teilikoni nu ina. 20A kayona deneta adi ŋutu le’de ’bayi lo romoki kpeza bo na kulia na ta kakeyoni kine ku kuwe nanye, 21’bo kulia ku’de na ta kakeyoni ’bayi na pondra kazu be naga ma ŋutulu nyadrinina, ’bo ŋutulu kulu atazu kulia ti Ŋun kine be naga ma Yuka Nakiyena ’dolakindri ko kuwena.

will be added

X\