2 KORINITO 9

1Ani nyadru ti na wurokindri ta kulia ti ’doke lo ŋarakini ŋutu ti Ŋun kilolo. 2’Bo na adeni nyadru nasu na kine kulia de naga ma na pudyi mugu ku kulia kasu ku ŋutu ti Makedonia kilo i koŋo yu ina. Na akulia kasi ko adi ŋutu ti Akaya kilo akukundra ’beri ŋiyu i kiŋa lo kaazelo yu, ’bo puso nasuna atoŋizu teiliko ti ŋutulu rodri kasiko i dridriŋi yu. 3’Bo na lo sonyodru luŋaseri kilo ma pudya nika na ’beri ku kulia kasu kinena ka’bi ku yeŋundra a ’busa ku kine kulia de, ma ta ku kukundri ’beri be naga ma na kulianina. 4’Bo kugbo ku’de ŋutu ti Makedonia kilo laga autu kasi yi kugele rumbi derengi ta aku kukundra ’beri, kedri kodro laga yi irumbi yukuwe ku naga ma yi yendri dena, ’bo ta itro irurumbi alangu. 5Kuwade na arambu a na’buna ki na ma’yu mugu ku luŋaseri kilo ti ko utini ŋero kasu yu, ma ko ku kukundra kulia ti ’doke laga ma ta sarakindri ’berolo a nze, adi ’doke ŋanilo ma gbo’da a loŋu’du a ŋo laga lo titiki ku teili lo’bu, agbo’da a ŋo lo riri’dikini. 6Na adi kawiani laga lo weza ’baziŋalo, i’di’didra ’baziŋa, ’bo kawiani laga lo weza rodrilo, i’di’didra rodri. 7Ŋutu gele gele ti kondri be naga ma nye yo’ini ’bero kanye teili yuna, ’ba luŋuli, ’ba ri’diki, igbonaga Ŋun nyadru ŋutu lo ’doga ku nyolalo. 8’Bo Ŋun roromoki i tikindra na ta ’doketa giri zore, kuwade i kuliata giri ma ta ku gbo’da ku kapazi giri lo romoki ta mu luŋa, ma ta ku romoki kondra kitazi naga a na’bu kine giri. 9Be naga ma wuronina adi, “Lepe lo teririadru ’doketa kilo, lepe lo tikindra lemerika kilo kapa, ’bo ’bu’busi na lepena iyiŋiki kini.” 10Ŋun lo tikindra kawiani nyomo, ku ’dilo i nyosulo, ititikindra ta nyomo laga lo pupuye kilo i tozorodru kulia na’bu kasu kine itro. 11Ŋun ititikindra ta tokorine mu luŋa i kuliata giri‚ ma ta ku gbo’da a ka’doka laga a ’diri, kuwade ŋutulu kilo ititikindra Ŋun iyetelo ku kulia kaya kine. 12Ina kita de agbo’da tikindra ŋutu ti Ŋun kilo ŋo laga ’bayi kasiko yu kilo ka’deloni, ’bo atiki Ŋun iyete koru itro. 13Ku naga ma ta kondrini ina kita dena, ko itritrimba ta, kuwade ko ipupudya Ŋun ku kulia ti sobu nasu na kuu na’bu na Kristo naga ma ta ruginina, ku kulia ti ’doke lasu laga a druma laga ma ta tikindri ko ku ŋutulu giri ilo. 14Ko ku ’beri imama’yu ’beri ku Ŋun ku kulia kasu kine, igbonaga puso nasuna lenga ko koruna, ku kulia ti ’busa na’bu na Ŋun naga na rodru koru kasu katanina. 15Iyete lo Ŋun ku ’doke lo lepe laga ani romoki tayilo.

will be added

X\