2 KORINITO 8

1Luŋaseri yi nyadru adi deneta kulia ti ’busa na’bu na Ŋun na kpiya i tomoresi ti karuko ti Makedonia kuluna. 2’Bo i luŋa laga ma ko moroni koru ku sasanya rodri lu, nyola nasikona a druma koru‚ kuwade ko atikindra ’doketa kase kilo beti korineko kilo‚ ’dibani kodro ku telemera nasikona naga ’boto de kpe. 3’Bo na ’dodru bo nasiko na kuliana adi ko atikindra ’doketa laga ku puso kilo be naga ma ko romokinina, ’bo arodru naga ma ko romokinina. 4Koŋa ama’yu ’beri koru ku yi adi ti se ŋaraki ina ’busa na’bu de i logu na ŋutu ti Ŋun kilo. 5’Bo ani gbo’da be naga ma yi rambini nu‚ ko atikindra ’beri a nze ku Mataloni‚ ku yi ’do itro‚ be naga ma Ŋun nyadrinina. 6Kuwade yi aru’ya teili lo Titolo adi be naga ma lepe sulukindri ina kita naga ku ’busa na’buna dena‚ ti lepe tutune kita ŋanina kasu dridriŋi yu. 7Kuwade be naga ma ta zoreni ku kulia kine girina‚ ku rugona‚ ku tayi na kuliana, ku dendrana, ku puso naga a ’dirina, ku nyadru nasu na yina, gbode ina ’busa na’buna de ti zoreni kasuni ’do itro. 8Na agbo’da kulia ku kukuzuni, ’bo na kodro modyu ta ku kulia ti puso na ku’de kilo ŋutuluna, adi ŋona nyadru nasuna a kulia naga mŋgba ’do. 9’Bo ta adeni ’busa na’bu na Mata lika Yesu Kristo ina‚ adi, ’dibani kodro ku lepe a korine de kpe‚ lepe ayeŋundra a lemeri ku kulia kasu kine‚ adi ku kulia ti telemera na lepena kine ma ta ku yeŋundra a korineko. 10Kulia na rami na kine na lo trukokindro ta. Kine de a na’bu i logu na ta. Kiŋa lo kaazelo ta asulukindra kondra naga nu de‚ ’bo agbo’da kondra ka’deloni‚ ’bo ta lepe anyadru kondra de. 11Kuwade i ilo so de tutuneta kondra na kunu kulia de kaŋo. Kuwade be naga kazu ma ta nyadri tikindrina, tikindrita be naga ma kapa kilo gbo’dini kasunina. 12’Bo kugbo nyadru na ’dogana kata‚ Ŋun irukundro ’doke ŋanilo be naga ma kapa kilo gbo’dini kasunina, agbo’da be naga ma kapa kilo gbo’dini ’bayinani. 13Agbo’da adi ku’de kilo ŋutulu ti gbo’dim ’ba ŋo lo tomoni ti ta lepe gbo ku ŋo lo tomonini. 14’Bo be naga ma kulia kine gbo’dini zozona‚ tokorine nasu naga tinadena ti logi telemera nasikona, gbode tokorine nasikona ma logi telemera nasuna ’busa‚ ma kulia kine gbo’da zozo. 15Be naga ma wuronina adi‚ “Ŋutu laga a ’dumba rodrilo, aku kolokindro limbito ’bo ŋutu laga atundra ’baziŋalo aku yaŋa.” 16Iyete lo Ŋun lo tikindra puso ku Tito i teili yu be niona ku kulia kasu kinelo. 17’Bo Tito agbo’da rugo ku piza nio na lepena ka’deloni, ’bo igbonaga lepe gbo ku puso koruna‚ lepe ayo’yu utu naga kasu yuna ku kuwe nanye lepe. 18Yi kilo sonyodru seku lepe luŋase laga lo pupura pupura i dridriŋi na tomoresi ti karuko kilo giri ku trugo na lepe na kuu na’buna ilo. 19Agbo’da ku kine kulia de ka’deloni, ’bo tomoresi ti karuko kilo giri agelundra lepe i woro ku yi kugele i ina kita naga ku ’busa na’bu naga ma yi kondrini i purani na Matalo‚ ku i kpeza na puso nikana ina de. 20Kulia naga ma yi gigirini kine de, le’de ŋutu ka’bi ku soso soso yi ku kulia ti ilo ’doke laga a druma laga ma yi kodyi ilo de. 21Yo’yu nikana adi ti yi kone kulia naga soso, agbo’da ku Ŋun i konyeni ka’deloni, ’bo ku ŋutulu i konyeni itro. 22’Bo yi kilo sonyodru kasi ko kugele luŋase lika laga ma yi modyi luŋa rodri laga ma yi rumbi ku puso i kuliata rodri ilo. Lepe ayeŋundra gbo’di ku puso naga koru igbonaga lepe lidra mugu koru ku tana. 23’Bo laga Tito, lepe a ŋutu laga lo tomodya mugu i kondra na kita seku na kugele i logu na ta. ’Bo laga luŋaseri kaya kilo ko a lososonyo ti tomoresi ti karuko laga lo tikindra Kristo pura kilo. 24Kuwade kpekita kilo ŋutulu de nyadru nasuna ku pudya nika na ’beri naga ku kulia kasuna ku karuko kilo i koŋo yu.

will be added

X\