2 KORINITO 6

1Kuwade yi laga a kakita kasi lepe kugele kilo ma’yu ’beri ku ta adi ka’bi ta ku ruruku ’busa na’bu na Ŋun ina a ’busa. 2’Bo lepe akulia adi, “I baŋe naga a rukena na ayinga do, ’bo na alogu do i luŋa lo ritelo.” Meteta‚ baŋe naga a rukena nye ina de. Luŋa lo ritelo nye ilo de. 3Yi ani ’delakindra kumu lo pupugo le’de ŋutu i kiko yu‚ ka’bi kita nikana ku sosoyini kulia. 4’Bo yi akpekindra ’beri i kuliata giri adi yi a kaloko ti Ŋun‚ ku teiliko ti rile koru‚ i sasanya‚ ku drelia‚ ku kuliata nago kine‚ 5ku kpikpinyayi, ku drodrora, ku reresatu na mongoyo kilona, ku kitazi na tretrerekaniki kine, ku saka naga ’ba toto, ku mago itro. 6Yi akpekindra ’beri ku kulia ti kekeli, ku dendra, ku teiliko mada, ku teiliko lo’bu, ku Yuka Nakiyena, ku nyadru naga mŋgbana 7ku kulia na tayi naga ku to’diri kine, ku teriŋi na Ŋun. Yi gbo ku dyapa ti logbiye lo’bulo kilo i keni lo lutate ku lo kaduŋe itro. 8Yi asopo, ’bo yi ani sopo. Kari kaya kine a’di’dinya a naro, ’bo a na’bu itro. Yi a’data be ka’bo’bolia, ti derengi yi a ŋutulu laga a ’diri. 9Yi gbo be ŋutu laga aku dena kilo, ti yi adena koru‚ be ŋutu laga lo tatuwa tatuwa kilo, ’bo meteta, yi kilo zoru, be ŋutu laga aririŋa kilo, ’bo yi aku tatuwi. 10Yi gbo ku luŋuli, ’bo yi nyonyola ’duu, a lemerika, ’bo yi kilo tikindra ŋutulu rodri tokorine, yi ’ba kapazi, ’bo yi gbo ku kapazi giri. 11Ŋutu ti Korinito kilo, yi atakindra ta kulia kine gboŋa. Teiliko kaya kilo aŋaki ta gboŋa. 12Yi ani gbo’da ku teiliko loro ku ta, ’bo ta kilo ku teiliko loro ku yi. 13Na takindra ta beti ŋazi kuwe. Koneta be yi itro. Ŋakita yi teiliko kasu kilo gboŋa ’do po. 14Ka’bi ta ku totomoru ’beri ku ŋutulu laga ’ba rugo kilo. Kulia naga a na’bu kine ma mora ku naro kine adidinyo ya? Ku pararana seku mudena mora adidinyo ya? 15Ku Kristo seku Satani mora adidinyo ya? Kulia ti karukoni kine ma gbo’da kugele seku ŋutu laga aku rugolo adidinyo ya? 16Kadi na Ŋun ina tomodya mugu ku muloko laga a ’busa ’busa kilo adidinyo ya? ’Bo yi laga a kadi na Ŋun laga zorulo. Be naga ma Ŋun kulianina adi, “Na isasaka kasiko katani‚ na iwoworo kasiko i dridriŋini, na igbo’da a Ŋun lasiko, ko igbo’da a zuru lio. 17Kuwade lupundrita kasiko i dridriŋini kaŋo, tokoruta ’beri kasikoni kaŋo, Matalo lo kulia, ku ’bo’bota ŋo laga ’ba kekelilo‚ ’bo na irurukundro ta‚ 18na igbo’da a Monye lasu‚ ’bo ta lo igbo’da a ŋazi kuwe laga lalia kilo, ku nawate kine. Mata Kabulonilo lo kulia de.”

will be added

X\