2 KORINITO 4

1Ku kine kulia de‚ igbonaga yi gbo ku ina kita de ku ediyo lo Ŋun ina‚ yi ani kanya tro. 2Yi aredra kuliata naga a’dana ti yukuwe kine‚ yi ani kondra ku toŋulupa tro‚ yi ani lopugo kulia ti Ŋun kine ku ’bure‚ ’bo be naga ma yi kpezi kulia ti to’diri kine gboŋana, yi kodro kpekindra ’beri i koŋo na dendra na teiliko ti ŋutulu girina‚ ku Ŋun i koŋoni itro. 3’Bo kugbo kuu na’bu nikana naga amuko‚ lepe amuko i koŋo na ŋutulu laga lo karaki kiloni ’du. 4Ko aku rugo kuu na’buna igbonaga mulete lo ina ka delo atikindra ŋutulu laga aku rugo kilo gbo ’ba konye kasiko i yoyolozuni ina‚ ka’bi ko ku medra parara naga na mo’yu ku kuu na’bu na Kristo lo gbo’da drodrogele beti Ŋun ilo. 5’Bo yi agbo’da trugo kulia kaya lepeni‚ ’bo kulia ti Yesu Kristo kine adi lepe a Mata, ’bo yi lepe a upi kasu kilo ku kulia ti Yesu kine. 6’Bo Ŋun lo kulia kazu adi, “Ti pararana kobi kobu i mude kata yu” ilo, nyelo kobu a parara kaya teilikoni i tikindra na yi i dendra na mo’yu na Ŋun naga ku Kristo i koŋonina. 7’Bo yi kilo riridra kine tokorine de i soŋgbolo lo gbiya ku lipo kilo katani‚ ma yi ku kpezi adi teriŋi naga a druma koru ina a na Ŋun, agbo’da a nikani. 8Yi asasanya i kuliata giri‚ ’bo yi aku tika tro‚ yi gbo i kuliata nago kine katani‚ ’bo yi aku dragu ’beri. 9Yi wowonye wowonye ku mero‚ ’bo yi aku koloki ’ba worisi. Yi agbuteki kani‚ ’bo yi aku karaki. 10Mu luŋa yi kilo ŋarundra tuwa na Yesuna kaya ’berini‚ ma ru na Yesuna boŋa kaya ’berini itro. 11’Bo yi laga zoru kilo yi atikindra ’beri mu luŋa i tuwa ku kulia ti Yesu kine‚ adi ru na Yesuna ma kpezi mugu i ’beri kaya naga na tatatuwa tatuwa kineni ’busa. 12Kuwade tuwana ina kita kaya ’berini, ’bo runa ina kita kasu ’berini. 13’Bo awuro adi‚ “Na arugo‚ nyena kuliani na.” Ku ina yuka nagele na rugona de, yi itro kulia igbonaga yi aru gona. 14Yi adeni adi Ŋun laga lo toŋizu Mata laga Yesu ilo‚ nyelo itoŋizu yi itro kasi Yesu kugele‚ ’bo lepe itotolupu yi kasi ta kanye koŋo yu. 15Kine kulia de giri gbo ku kulia kasu‚ adi be naga ma ’busa na’bu zoreni zore i ŋutulu rodrina, gbode iyetelo irereki i purani na Ŋun. 16Ku kine kulia de yi ani kanya. ’Dibani kodro ku gbo’da nika naga a ŋutuŋutuna ’bu’bure kpe‚ gbo’da nika naga a na yukana totowusa totowusa a naluduko luŋa kilo giri. 17’Bo sasanya nika naga pa’de’de naga na lelengana‚ ina zakindra yi pura naga a druma koru naga ani lengana. 18’Bi yi agbo’da boŋadru ŋo laga lo memeta kiloni‚ ’bo ŋo laga ani meta kilo. Ŋo laga lo memeta kilo lelenga, ’bo ŋo laga ani meta kilo ani lenga tro.

will be added

X\