2 KORINITO 3

1Yi puru beti yi kpekindra ’beri ’do ya? Ŋona yi nyadru waragaki na kpekini yi naga awuro kasuni‚ kugbo naga ma ta wudyini kine be naga ma ku’de kilo ŋutulu nyadrinina ya? 2Ta lepe a waraga nika naga awuro kaya teilikoni, naga adena, naga ma ŋutulu kilo giri kendrina. 3’Bo ta akpeza adi ta a waraga na wuru Kristo naga ma yi tikindri, naga agbo’da wuro ku winoni‚ ’bo ku Yuka na Ŋun laga zorulo, naga agbo’da wuro i ŋoropo naga napa’dala kine kinini, ’bo ku ŋutulu i teiliko kata. 4Yi gbo ku rugo naga dena ku Ŋun ni ku kulia ti Kristo kine. 5Agbo’da adi yi lepe gbo ku teriŋi i kondra na le’de ŋo a yi lepeni, ’bo teriŋi nikana ŋiyu ku Ŋun yu. 6Lepe atikindra yi teriŋi i kondra na kita na tomore naluduna. Tomore ŋanina agbo’da a kukuzu na wuwuroni, ’bo a na Yuka Nakiyena. ’Bo kukuzu naga na wurona nyena tatuza ŋutulu, ’bo Yuka Nakiyena tikindra ru. 7Kukuzu naga na geraki i ŋurupi kini, naga kazu atiki ku kobu na mo’yuna zondra tuwa. ’Bo ’dibani kodro ku koŋo na Mosena momo’yu ku mo’yu naga nu lelenga kpe, ŋutu ti Isiraeli kilo aku romoki gbuluzu lepe ku kulia ti mo’yu ŋanina kine. 8Kuwade kugbo kulia ti kukuzuna kine naga atiki ku mo’yu ŋanina, kulia ti Yuka Nakiye kine aka tiki ku kobu na mo’yu naga a druma arodruni ya? 9’Bo kugbo kulia naga ma ŋutulu kilo ŋerakini tuwa kine naga agbo’da ku mo’yuna, kulia naga ma ŋutulu kilo kenani mŋgba kine igbo’da ku mo’yu naga a druma arodru. 10A ’diri ŋo laga kazu ku mo’yulo ayeŋundra ’ba mo’yu ku kulia ti mo’yu naga na rodru lepena kine. 11Kuwade kugbo ŋo laga lo lelengalo akobu ku mo’yu, ŋo laga ani lengalo ti kobini ku mo’yu naga arodruna. 12Igbonaga yi gbo ku yendru naga be ina dena‚ yi gbo ku teiliko logo koru. 13Yi ani gbo’da be Mose, laga lo mugo koŋo nanyena kazu ku bongolo, adi ka’bi ŋutu ti Isriaeli ku medra ’dute na mo’yu naga na lelengana. 14’Bo yoyolozu nasikona kazu ayeŋundra a nago, ’bo yeŋundra tozo tinade, kugbo ko laga kendra tomore na ’berona‚ bongo ŋanina aku ’dumazi kaŋo‚ igbonaga ku ’dumazi ku Kristo ’duna. 15A ’diri yeŋundra tozo tinade kugbo buku na Mosena naga kekena‚ yoyolozu nasikona gbo beti amuko ku bongo. 16’Bo kugbo le’de ŋutu laga alopugo mugu ku Matalo yu‚ bongo ŋanina i’du’dumazi kaŋo. 17’Bo Mata ŋanilo a Yuka Nakiyena, ’bo i piri naga ma Yuka na Ŋun gbo’dini nu‚ lakana nu kata yu itro. 18’Bo yi giri laga aku mugo koŋo kilo temetakindra mo’yu na Matalo beti naga i maraya katana‚ ma yi lopuko i gbetita na lepe naga ku mo’yu naga na purara ’duuna. Kine kulia de ŋiyu ku Mata laga a Yukalo yu.

will be added

X\