2 KORINITO 2

1Nyenaga na ayo’yu adi ka’bi na ku yeyeŋadru kasu yu ku luŋuli ’do tro. 2Kugbo na laga atikindra ta luŋuli, ŋa lo itikindra na nyolana gele’du ŋutu laga ma na tikindri lepe luŋulilo ya? 3Kuwade na kazu awudyo kunu kulia de‚ adi ka’bi na ku yeyenadru kasu yu i rumbi na luŋuli ku ŋutulu laga kodro ma na ku rumbini nyolana kasiko yu kilo. ’Bo na lidra mugu ku kulia kasu kine giri adi kugbo na laga anyola‚ ta giri inyonyola nyonyola ’do. 4’Bo ku na laga ku teili lo sasanya koru‚ ku drelia koru kuwe teilini‚ na kazu awurokindro ta ku ŋolita koru‚ agbo’da i tikindra na ta luŋulini, ’bo i trukokindro na ta adi puso nasuna alenga na koru. 5Kugbo le’de ŋutu laga atikindra luŋuli, lepe agbo’da tikindra nani, ’bo tikindra ta, kuwa ku’de ŋutulu kulu kasu dridriŋi yu, ’bo na ani nyadru kulia ku teriŋi. 6Ropeta ti toro laga ma ŋutulu rodri kilo tikindri kilo aromoki ŋutu laga be ilo de ilo. 7Kugbo de‚ ’di neta toro na ŋutu ŋanilo kaŋo‚ i ru’ya na teili lo lepelo‚ ka’bi lepe ku tika ku luŋuli laga a druma korulo. 8Ku kine kulia de, na ma’yu mugu ku ta adi tikita lepe i dendra na nyadru nasuna soso. 9’Bo na kazu awudyo kunu kulia de ma na ku tritrimbi ta ŋona ta isosobu kulia kuwe kine i kuliata giri katani. 10Ŋutu laga ma ta ’dizi torozi ti lepe ilo, laga na a’diza itro. Ku na laga a’diza ne’de toro‚ na a’diza toro ŋanina kaŋo ku kulia kasu ku Kristo i koŋoni‚ 11ka’bi Satani ku dumba yi‚ igbonaga yi adeni yoyolozu na lepenana. 12Kugbo na laga ayenga Turo yu i trugo na kuu na’bu na Kristona, Ŋun druga ŋakindra na kaakutu na konani kita nanyena. 13’Bo teili liolo aku gbi’diki igbonaga na aku rio luŋase lio laga Tito yu dena. Kuwade na akolokindro ko, druga na laŋadru Makedonia yu. 14Iyete lo Ŋun, igbonaga lepe lo ’dolakindra ŋutu kuwe mu luŋa i rodru na mero kilo ku Kristo katanina. ’Bo lepe tikindra yi i toŋmwadru na azi na denani nye mu pirito. 15’Bo yi gbo be azi na Kristo na ŋmwara ku Ŋun yu ku ŋutulu laga lo rite kilo i dridriŋini ku laga lo kakaraki kilo i dridriŋini itro. 16I ku’de kilo ŋutuluni, azi ŋanina gbo be azi na ŋmwa a naro na tuwa na tatuza ŋutuluna, ’bo i ku’de kiloni azi ŋanina gbo be azi na ŋmwa sisisi naga zoru na zondra runa. Ŋa laga iroromoki kondra kine kulia de ya? 17’Bo yi ani gbo’da be ŋutulu rodri laga lo kokorozu kulia ti Ŋun kine ku toŋulupa kilo‚ ’bo yi a ŋutulu laga ku teiliko laga mŋgba laga lo gelu Ŋun kilo. Yi kulia ku Kristo katani‚ ku Ŋun i koŋoni itro.

will be added

X\