2 KORINITO 13

1Ilo de a luŋa laga a togi musala lo utini na kasu yulo. Kulia naga a tureta kine ti tolirani ku bo na kulia na ’doru ŋutulu mure kugbo musala. 2Na kazu atepizo ŋutulu laga akondra toro kilo ku ŋutulu ku’de kilo giri. Tinade ti na ’bayi kasiko i dridriŋi yuna, na lo tepizo ko be naga ma na tepizi ko kazu i luŋa laga ma na gbo’dini kasiko i dridriŋi yu i luŋa laga a togi mure lu ina, adi kugbo na laga ayeŋadru ’do na aka kolokindro ko ku pele na’buni, 3igbonaga ta nyadru kulia na kpeza adi a ’diri Kristo lo kulia kuwe kutuni ina. Lepe ani gbo’da ’ba teriŋi kasuni, ’bo lepe gbo ku teriŋi kasu katani. 4’Bo lepe a’beko i kedini mugu ku tomunye, ’bo lepe ilo zoru ku teriŋi na Ŋun ina. ’Bo laga yi a munyeka ku lepe katani, ’bo ku kulia kaya kasi ta kine yi igbo’da zoru kasi lepe kugele ku teriŋi na Ŋun ina. 5Tritrimeta ’beri ŋona ta kilo gbo ku rugo, moreta mo ’beri. Ta aku deni adi Kristo Yesu ilo kasu katani ya? Ŋona ta a’do’do i modru ŋanina katani ya? 6Na yendru adi ta idedeni adi yi lepe aku ’do’do i modru ŋanina katani. 7’Bo yi kilo magu Ŋun adi ka’bi yi ku kokonu ta a loro. Agbo’da i kpeza adi yi arodru i modruna katanini, ’bo ma ta lepe ku kondra ŋo laga a lo’bu, ’dibani kodro ku yi lepe puru beti naga ma yi ’do’doni i modruna katanina kpe. 8’Bo yi ani romoki kondra le’de ŋo i moro ku kulia ti to’diri kine, ’bo i logu na kulia ti to’diri kine. 9Kuwade yi nyonyola kugbo yi lepe a munyeka, ti ta lepe ku teriŋi. Kulia naga ma yi magini kine, se kine de, adi ma ta yeŋundra soso. 10Kuwade na awudyo kine kulia de ti na ’bayi kasu dridriŋi yu, adi ku na laga ayeŋadru kasu yu, ka’bi na ku ririŋi ta koru ku teriŋi naga ma Matalo tikindri nana. Ina teriŋi de atiki na i to’durodru na ta, agbo’da a na temizeni ta kani. 11Luŋaseri, kulia naga a tutuweto kine, sakanita a lo’bu. Kukuneta ’beri soso, yiŋeta kulia naga ma yi ma’ini ’beri ku ta kine. Gbo’dita ku teili logele. Sakanita ku teili lo trotro. Ŋun lo nyadruna seku teili lo trotro ilo igbo’da kasi ta kugele. 12Rometa roma kasu dridriŋi yu ku rome lo nyadru na luŋaserilo. 13Ŋutu ti Ŋun kilo giri aroma ku ta. 14’Busa na’bu na Mata lika Yesu Kristona, ku nyadru na Ŋun ina, ku more na Yuka Nakiyena ti si’dani ku ta giri.

will be added

X\