2 KORINITO 12

1Nyadru ti na pure mugu, ’di bani kodro ku kondra naga dena ’ba logu kpe. ’Bo na ipoki i trukokindro na ŋo lo memeta ku lo kpikpiya ti Matalo kilo. 2Na kazu adeni ŋutu laga ku Kristo katani, laga a’dumazi yeŋadru tozo i ’diko naga ki koruna kata yu ilo, tinade kiŋazi mere gele konye iŋmani arodru. Ŋona kine kulia de akondra ’beri a ’diri, ŋona ko a ŋo lo memeta, na aku deni, ’bo Ŋun laga adeni. 3Na lo kulia ’do, ŋona kine kulia de akondra ’beri a ’diri, ŋona ko a ŋo lo memeta, na aku deni‚ ’bo Ŋun laga adeni. ’Bo na adeni adi ilo ŋutu de a’dumazi yeŋadru tozo i piri naga a na’bu koruna kata yu. 4Lepe ayinga kulia naga ani romoki trukoki kine‚ naga ani rukoki loŋutu i tazu kine. 5Na lo ipudya mugu ku kulia ti ilo ŋutu de, ’bo na aka pudya mugu ku kulia kuwe kineni, ’bo ku kulia ti tomunye niona ka’delo. 6’Bo kpe, ku na lo nyadru pudya na mugu, na aka gbo’da a lo mamalini, igbonaga na itazu kulia naga mŋgba kinena. ’Bo na ikoko pudya na mugu, le’de ŋutu ka’bi ku rambu adi na a lo’bu arodru kulia naga ma lepe medri kugbo yingi kuweni kine. 7’Bo ka’bi na ku pudya mugu koru ku kulia ti ŋo lo kpikpiya laga rodri kilo, na atiki kokoti kuwe muguni, naga asasandru be lososonyo lo Satani lo kidro nalo, ka’bi na ku pudya mugu koru. 8Na ama’yu mugu ku Matalo luŋa musala ku kine kulia de, adi kokoti ŋanina ti ’dutuzini kaŋo kuwe muguni. 9’Bo lepe druga takindra na adi, “ ’Busa na’bu niona aromoki do, igbonaga teriŋi niona nyena yeŋundra soso i tomunye katani.” Kuwade na ipupudya mugu ku kulia ti tomunye niona ku nyola naga alanguna ma teriŋi na Kristona ku mugi na ’busa. 10Ku kine kulia de, ku kulia ti Kristo kine, na arugo tomunyena ku nyola, ku momoroyina, ku dreliana‚ ku sasanyana, ku kuliata nago kine‚ igbonaga i luŋa laga ma na gbo’dini a munye lu‚ derengi ti na gbo ku teriŋi ina. 11Na akondra be ŋutu lo mamali. ’Bo ta lepe ari’dikindra na de. ’Bo na ani gbo’da a ŋutu laga lo bo i dridriŋi na kulu lososonyo laga a lo’bu lo’bu koru kilo‚ ’dibani kodro ku na laga a ’busa de kpe. 12Konesi ti lososonyo laga mŋgbalo akona kazu kasu dridriŋi yu ku teili lo rile koru‚ ku kpiyesi, ku wonyesi ku konesi naga ku teriŋi kine. 13Ŋo lo inyo laga ta aku rumbi ’bo laga ma tomoresi ti karuko ku’de kilo rumbinilo ya? Gele’du na lepe aku tikindra ta tomoni. ’Dineta kulia kuwe naro kine de kaŋo po! 14Meteta‚ ilo de gbo’di a luŋa laga a togi musala laga ma na kukundri mugu i pilara kasu yulo. Na aka tikindra ta tomonini, igbonaga na agbo’da ga’yu kapazi kasunini, ’bo ta lepe. ’Bo nyadru ŋazi kilo ka’bi ku ’de’delakindra kapazi ku kayuŋo kiloni, ’bo kayuŋo kilo ti ’delaki ku ŋazi kiloni. 15Na ititikindra kapazi kuwe kilo ku nyola, ’bo na itikindra mugu giri i logu na ta. Ku na nyadru ta koru, trugo adi ti na nyarani ’baziŋa ya? 16Na kazu aku tikindra ta tomoni, ’bo kpe, ta adi na gbo ku tomboli, na amomoga ta ku toŋulupa. 17Na adudumuza ta ku kiko lo ŋutulu laga ma na sonyodri kasu yu kilo ya? 18Na ama’yu mugu ku Tito adi ti lepe utini kasu yu, na asonyodru luŋaselo seku lepe. Ŋona Tito adudumuza ta ya? Yi aku kondra ku yololozu nagele, ku gbiyeri logele ya? 19Ta arambu yeŋundra tozo tinade adi yi lo ’budyu ’beri kasu koŋo yu ya? Ku Ŋun i koŋo yu yi akulia ku kari ti Kristo kine, ’bo kine de giri a na to’durodru ta, ŋutulu kuwe laga ma na nyadri kilo. 20Na gbo ku kuze adi ŋona kugbo na laga ayeŋadru, na aka riondru ta be naga ma na nyadrininani, adi ta aka riondru na be naga ma ta nyadrininani. Ŋona ŋalapa igbogbo’da kata kasu dridriŋi yu‚ ku yule, ku trotrori na teiliko‚ ku rerenyeta, ku ’dadru, ku moŋa na ŋutulu, ku pura na ’beri‚ ku kulia naga mŋgbelemŋgbele kine. 21Na gbo ku kuze adi ku na laga ayeŋadru ’do‚ Ŋun liolo ka’bi ku temizundro na ka kasu koŋo yu, ka’bi na ku gbiye ku kulia ti ŋutulu rodri laga kazu akondra toro kilo, ’bo laga aku lopugo teiliko ku kulia ti ’baka na kekeli‚ ku konye lopi, ku kulia ti yukuwe na nyara naga ma ko kondrini kine.

will be added

X\