2 KORINITO 11

1A na’bu tineta ti teiliko kasu kilo ’baziŋa ku na, ku mali niona. Trotro tineta ti teiliko kasu kilo ku na po! 2Na gbo ku yino ku ta ku yino na Ŋun ina, igbonaga na atokuliaki ku ta ku Kristo ma na ku zondra ta ku Kristoni be ’diye naga a nakiye na zuwe ku lale lo lepe laga gelelonina. 3’Bo be naga ma munulo ’bo’bolizi Iva ku toŋulupa nanyenana, na gbo ku kuze yoyolozu nasuna ka’bi ku kokoroyi i tikindra na ta i kolokindro gbiyeri lasu laga ku teili lo’bu ku kekeli naga ku Kristo katanina. 4Kugbo le’de ŋutu laga apondra i trugo na kulia ti Yesu laga ka’de, laga kazu yi aku trulo‚ kugbo ta laga arumbi yuka naga ka’de‚ naga kazu ta aku riona‚ kugbo ta laga arugo kuu na’bu naga ka’de, naga kazu ta aku runa‚ ta kilo tizu teiliko kasu kilo a lo’bu. 5Na rambu adi na ani gbo’da a ŋutu lo bo i dridriŋi na kulu lososonyo de laga a lo’bu lo’bu koru kilo! 6’Dibani kodro ku na laga aku de tazu na kulia kpe, na gbo ku dendra. Yi akpekindra ta kine kulia de giri soso mu luŋa. 7Ŋona na akondra toro kugbo na laga a’delakindra mugu a ŋutu laga iloŋadroo ma ta lepe ku gbo’da a drumala‚ ku naga ma na trukokindri ta kuu na’bu na Ŋun ina kanana ya? 8Na kazu aninundra riye ti tomoresi ti karuko ku’de kilo ma na riozi ropeta kasiko yu‚ ma na ku konakindra ta kita. 9Kugbo na laga asaka kasu dridriŋi yu ku telemera‚ na aku tikindra le’de ŋutu tomoni, igbonaga luŋaseri laga lo ŋiyu Makedonia yu kilo a’diza telemera niona ina. Kuwade na kazu atizu mugu, ’bo na ititizu mugu ’do ka’bi na ku tikindra ta tomoni ku kuliata ku’de. 10Be naga ma kulia ti to’diri ti Kristo kine gbo’dini kuwe teilinina, ina pudya nio na muguna de aka guwa i ka na Akaya yunani. 11Gbandra po? Igbonaga na aku nyari tana ya? Ŋun adeni adi na anyari ta. 12Ŋo lo konu nalo, na ikondra ’duu de, ma na ku goza kiko ku kulu ŋutulu de laga lo ga’yu kiko ku pudya nasiko na ’beri i kpekindra na ’beri zozo be nikana. 13Kulu ŋutulu de a lososonyo laga a ’bureniko kilo, a kakita laga a ti toŋulupa laga lo lopugo ’beri be lososonyo ti Kristo kilo. 14Kine kulia de ani gbo’da a rameta ti ’beri, igbonaga Satani lepe lo lopugo mugu beti malaikata laga a lo pararalo. 15Kuwade kugbo kaloko ti lepe kilo laga alopugo ’beri be na kaloko ti kulia na’bu kine, kine de ani gbo’da a kulia na ramani ’beri. ’Dute nasikona igbo’da be konesi kasiko kine. 16Na kulia ’do, le’de ŋutu ka’bi ku rarami adi na a lo mamali. ’Bo ku ta rambu de, rugita na be ŋutu lo mamali, kuwade na ipudya mugu ’baziŋa itro. 17Kulia na ta na kine na agbo’da tazu ku kukuzu na Mataloni, ’bo ku kulia ti ina pudya na mugu de, na tazu be naga ma na mamalini ina. 18Be naga ma ŋutulu rodri pudyini ’beri ku kulia ti ka kinena, na lepe ipudya mugu de ’do. 19Ta laga ku tobodo kilo ta bita tizu teiliko kasu kilo ku ŋutulu lo mamali kilo ku nyola. 20’Bo ta bita tizu teiliko kasu kilo kugbo le’de ŋutu laga a’delakindra ta a upi, kugbo anyosu kapazi kasu kilo, kugbo adudumuza ta, kugbo a’bilikindra mugu ki, kugbo ananaŋazu ta i gbangiria. 21Na kulia ku yukuwe, laga yi ’ba teriŋi! ’Bo kugbo le’de ŋutu gbo ku teili logo i pudya na mugu, na ipudya mugu ’do. Na kulia be na mamali. 22Ko a Ebere kilo ya? Na gbo de ’do. Ko a Isiraeli kilo ya? Na gbo de ’do. Ko a nyomo ti Abarahama kilo ya? Na gbo de ’do. 23Ko a kaloko ti Kristo kilo ya? Na arodru ko. ’Bo na kulia be ŋutu lo mamali ’do. Na arodru ko ku kitazi naga nago koru kine‚ ku drodrora naga luŋa rodri koru kine‚ ku kpinya naga ani romoki kena kine‚ luŋa rodri na asaka i tuwa kutu. 24Luŋa mukana na arumbi kpinya meria musala konye buŋa ku Yahudi kilo i kenisi yu. 25Luŋa musala na akpinya ku keli‚ luŋa gele na abibiriŋo ku ŋoropo, luŋa musala ki’bona agbalaka ti na lu kata yu. Tukaze gele ku tupara gele na asaka suburi kata yu. 26Mu luŋa na gbo i kiko i woworotu. Na ’do’do ku karaki karia kata yu, ku karaki ku kariaka kiloni‚ ku karaki ku zuru lioloni ku Monyazi kiloni, ku karaki kezi kata ku i ’diŋo kata yu, ku karaki suburi kata yu‚ ku karaki ku luŋaseri laga a ’bureniko kiloni ’do‚ 27ku trereka, ku kanya, luŋa rodri ’ba toto, ku mago, ku kure na pio, luŋa rodri ’ba nyosuto, ku katiro, ku saka naga a pilili. 28Agbo’da kulia naga kaŋo yu kine ka’deloni, ’bo na gbo ku ’do’do na teili mu luŋa ku kulia ti ’deya nio na teili ku tomoresi ti karuki kilo giri kinina. 29Kugbo le’de ŋutu laga a munye, na gbo de ’do. Kugbo le’de ŋutu laga atiki i bayi, na lepe gbo ku ŋoma ku kine kulia de. 30Kugbo na laga apudya mugu‚ na ipupudya mugu ku kulia ti tomunye niona kine. 31Ŋun laga a Monye lo Mata Yesulo, laga lo pupura paratra paratra ilo adeni adi na ani lengu ’bure. 32Damaseke yu, lo’bizo laga ku mata laga Areta i moko yulo atikindra katiyu kilo i tizu na kezi na Damasekena kodro i moga na na. 33’Bo na apute i goro ki yu i derisa kani ku leliye i su’de kata, kuwade na aritundro mugu ku lepe i keni yu.

will be added

X\