2 KORINITO 10

1Na lepe, Paulo, laga ’ba teriŋi kasu dridriŋi yulo, ’bo ku teili logo ku na laga pazo, na ma’yu mugu ku ta ku Kristo laga ’ba pudya na mugu ku teili lo mada itrolo. 2Na ma’yu mugu ku ta, tikita ka’bi na ku kpekindra teili logo be lu de ku na laga ayeŋadru kasu dridriŋi yu, ’bo na yo’yu adi na igbo’da ku teili logo koru ku ŋutulu lo yo’yu adi yi woro be na ŋutu ti ka kilona i koŋo yu. 3’Dibani kodro ku yi saka i kani kpe, yi ani moro be ŋutulu ti ka kilo. 4’Bo kapazi ti moro nikana kilo agbo’da a ti ina ka deni, ’bo ko a riŋiko ku kulia ti Ŋun kine i ’be’belengu na mariŋa naga nago kine kaŋo. Yi kilo gupadru rerenyeta kaŋo. 5Yi kilo rurusugo kapazi giri ka laga a’bilikindra ’beri i gokindra na ŋutulu i dena na Ŋun kilo. Yi kilo lopugo rambuzi giri ti ŋutulu kine i sobu na kulia ti Kristo kine. 6Kugbo ta laga arugo sobu na kukuzu nikana, yi akukundra ’beri i tikindra na ŋutulu giri laga ’ba sobu na kulia kilo rope na toro. 7Metarata ŋo laga kasu koŋo yu kilo. Kugbo le’de ŋutu lo lidra mugu adi nye a lo Kristo, ti lepe yuluki mugu ’do, adi be naga ma lepe gbo’dini a lo Kristo ina, yi gbo de ’do itro. 8Matalo atikindra na teriŋi i to’durodru na ta ki, agbo’da i rusugo na ta kani, kuwade ’dibani kodro ku na pudya mugu sa ku kulia ti teriŋi ŋanina kine de kpe, na aka gbo’da ku yukuweni. 9Na ani nyadru gbo’da be ŋutu lo tokuzendru ta ku waragaki kiloni. 10’Bo ta adi, “Waragaki ti Paulo kine a nago, ku teriŋi itro, ’bo kugbo lepe laga kaya dridriŋini lepe ’ba teriŋi, kulia na ta lepe kine ’ba teriŋi ’do.” 11Ŋutulu laga be kilo de kilo ti ko yole adi kulia naga ma yi tazi i waragaki katani kine ku yi laga ’bayi, ku yi laga ayeŋadru kasu yu yi ikokondra kulia ŋani kine. 12’Bo yi ani togo’yu teiliko i kendra na ’beri kuwa i modyu na ’beri be na ŋutulu ku’de laga lo kpekindra ’beri kilona. ’Bo ku ko laga lo tritrimba ’beri kase dridriŋi yu kuwa modyu ’beri a ’beri, ko a ŋutulu laga ’ba dendra. 13’Bo laga yi aka pudya ’beri arodru more nikanani, ’bo be naga more na dridriŋi na kita naga ma Ŋun modyi yi, naga na yeŋadru tozo kasu yuna. 14Yi aku modyu tuwalangu na dridriŋi na kita ŋanina be naga lepe aku yeŋadru tozo kasu yu ina, ’bo yi kazu ayenga kasu yu a kayo ku kulia ti kuu na’bu na Kristo kine. 15Yi ani pudya ’beri arodru more nikana ku kulia ti kita na ku’de ŋutuluna, ’bo yi yendru adi rugo nasuna ku ’dudyi ’dudyo, dridriŋi nika na kita kasi tana ituwalaŋazi arodru, 16adi ma yi ku trugini kuu na’buna i kazi naga kasu i lu lozo yu kine, ’ba pudya na ’beri ku ŋo lo kona i dridriŋi na kita na ŋutu le’de kata yuna. 17“Ŋutu laga lo pupudya mugulo, ti lepe pupure mugu ku kulia ti Matalo kine.” 18Kuwade ŋutu laga lo kpekindra mugulo agbo’da nye lo irukeni, ’bo ŋutu laga ma Matalo kpekindrilo, nye lo iruke.

will be added

X\