2 KORINITO 1

1Paulo laga a lososonyo lo Yesu Kristolo be naga ma Ŋun nyadrini ina seku Timoteo laga a luŋase likalo‚ aroma ku tomore na karuko ti Ŋun laga Korinito yu kilo‚ ku ŋutulu giri laga a ti Ŋun‚ lo gbo’da i ka na Akaya kata yu kilo giri. 2’Busa na’buna ku teili lo trotro lo ŋiyu ku Ŋun Monye likalo yu‚ ku Mata laga Yesu Kristo yu itrolo ti gbo’dini ku ta. 3Ŋun laga a Monye lo Mata lika Yesu Kristolo ti purani pura‚ lepe a Monye ediyo‚ a Ŋun laga a karudani lo teiliko ti ŋutulu giri. 4Lepe ru’ya teiliko kaya kilo i sasanya nikana katani giri, ma yi ku romoki ru’ini teiliko ti ŋutulu laga i sasanya naga kuwa adinyo ina katani kilo itro ku ruda na teiliko naga ma yi lepe rumbi ku Ŋun katanina. 5’Bo beti naga luŋulio ti Kristo kilo ma rewuni kayanina, gbode ruda na teiliko ina arewu kayani ku kulia ti Kristo kine itro. 6Kugbo yi laga asasanya, ina de a ruda nasu na teiliko, ku rite nasuna. Kugbo teiliko kaya kilo laga aruda, ina de a ruda nasu na teiliko naga ma ta rumbini i naga ma ta gbo’dini ku teiliko ti rile i luŋuli logele laga ma yi rumbinilo katanina. 7Yendru nika naga ku kulia kasu kinena alira tritri, igbonaga yi adeni adi be naga ma ta ŋarundri luŋunilo kaya kilona, gbode ta iŋaŋarundra ruda nika na teilikona itro. 8’Bo luŋaseri‚ yi nyadru deneta sasanya nika naga ma yi rumbi Asia yuna. Nu sasanya de tomoni koru‚ ’bo atiga teriŋi nikana munyumunyu, kuwade yi adragu ’beri adi yi aka runi. 9A ’diri yi ayo’yu adi yi aŋeraki tuwa. Kine kulia de atikindra yi adi ka’bi yi ku toto ’beri a ’beri, ’bo ku Ŋun laga lo toŋizu ŋutulu laga atatuwa kilolo. 10Lepe aritundro yi kazu i nu tuwa naga a drumana kata yu, lepe iriritundro yi, ’bo yi a’delakindra teiliko kaya kilo ku lepeni adi lepe iriritu yi ’do. 11Laga ta itro, loketa lo yi ku magu nasuna, gbode ŋutulu rodri ititikindra iyete ku kulia kaya kine ku ’doke laga ku ’busa na’bu, laga a ’dokani yi ku kulia ti magu na ŋutulu rodri ina. 12’Bo pudya nika na ’beri naga dena, bo na kulia na ’doru dendra nika na teilikonana adi woro nika naga i kanina, ’bo alanguna kasu yuna gbo a na kekeli, ku teiliko laga ’ba toŋulupa lo ŋiyu ku Ŋun, agbo’da ku tobodo na kanani, ’bo ku ’busa na’bu na Ŋun ina. 13’Bo yi aku wurokindro ta kulia ku’de‚ ŋo kine kulia naga ma ta romokini kendri i dendra kine ka’delo. Na yendru adi ta idedeni kulia kine giri giri. 14’Bo ’dibani kodro ku ta adeni kulia kine a dridriŋi ka’delo tinade kpe, ta iromokiipupudya na ’beri ku kulia kaya kine be naga ma yi ku pupudyi ’beri ku kulia kasu kine i luŋa lo Mata lika Yesu lu ina. 15Igbonaga na lidra mugu ku kine kulia dena, a kayona na anyadru utu naga kasu yuna, ma ta ku rumbini koŋo na’buna luŋa mure ’busa. 16Na kazu kodro nyadru ŋeradru kasu yu i utu nio naga Makedonia yuna, druga i yite nio naga bonina i pondra kasuni ’do, ma ta ku nyomodri na i kiko lo Yudaya lu ’busa. 17Ku na laga anyadru de‚ trugo adi na a ŋutu lo tamure ya? Ŋona ku na lo kukundra mugu i kondra na le’de ŋo, na lo kondra be na ŋutu lo ka laga lo kulia adi Iye ku ’Bayi itrolo ya? 18Be naga ma Ŋun gbo’dini ku to’dirina‚ kulia na ta yi kasuni kine ani gbo’da a ti Iye ku ’Bayi. 19Ŋiro lo Ŋun‚ Yesu Kristo laga ma yi trugi kasu dridriŋi yulo‚ yi seku Silivano ku Timoteo, Yesu ŋanilo ani gbo’da a ŋutu lo tamure‚ ’bo ku lepe katani‚ ŋolo Iye ’du. 20’Bo Ŋun atoliriza sareta kanye kilo giri gele gele ku Yesu katani. Ku kine kulia de yi bita tazu Amena ku kulia ti lepe kine i purani na Ŋun. 21’Bo Ŋun lepe lo tolirakindra yi kasi ta ku Kristo katani‚ agelundra yi itro. 22Lepe a’delakindra kpiye lonye kaya koŋoni‚ druga rabu yi ku Yuka nanyena kaya teilikoni. 23Laga na lungu Ŋun a ka’dotoni lo bo nio na kuliana adi na ko’yu utu naga Korinito yu ina ka’bi na ku tikindra ta luŋuli. 24Yi ani ri’dikindra ta i rugo na kuliani, igbonaga ta alira tritri kasu rugonina, ’bo yi a kakita lo kita kasi ta kugele ma ta ku rumbi nyola.

will be added

X\