1 TIMOTEO 6

1Ŋutulu giri laga a upi ku drumala kase i mukuzi kilo, ti rambi adi drumala kase kilo a lo zuzuki i sopo koru‚ ka’bi kari ti Ŋun kine ku togoleto kine ku ’data. 2Ŋutulu laga ku drumala laga a karuko kilo ka’bi ko ku gbogbo’da ’ba teminizo ku naga ma ko gbo’dini a luŋaseri ina. Alanguna ti ko konakindri ko kita a na’bu koru arodru, igbonaga ŋutulu laga ma ko logini ku kona na kita kilo a karuko lo nyanyara ina. Togole kine kulia de ku kukuzu itro. 3Kugbo le’de ŋutu laga atogo’yu ka’de‚ laga aku rugo kulia naga soso na ta Mata lika Yesu Kristo kine‚ ku togole lo zuki be lo teminioni Ŋun ilo‚ 4lepe lo be’ya mugu ku sisinga na mugu. Lepe aku de kulia. Lepe gbo ku puso na pipiyani piyesi naga a ’busa ’busa kine ku rerenyeta ku kulia na tatayi kine‚ kine kulia de a’deba lepe be tuwane. Ko azondra yuma‚ moro, ’dadru, ku rambu naro‚ 5ku ŋaŋalapa naga i dridriŋi na ŋutulu laga ku yoyolozu naga na mamaliniki‚ laga ’ba kulia ti to’diri kine. Ko arambu adi ’delaki na teili i teminizo na Ŋun ina igbo’da a kiko lo rieni rezema. 6A ’diri rezema laga a drumalo irie ku ’delaki na teili i teminizo na Ŋun‚ ku yi lo gbo ku nyola ku kapazi kaya kilo. 7’Bo yi aku zondra le’de ŋo i kani‚ yi ani romoki zonga le’de ŋo kaya lupodru naga kaŋo i kanina ’do. 8’Bo kugbo yi laga ku nyosuto ku bongola yi igbo’da ku teiliko ti tumada ku kapazi kaya kilo. 9’Bo ŋutulu lo nyadru gbo’da a korineko kilo‚ ko ’du’duki i luluka kata yu‚ i biribiri kata yu itro‚ i nyadru na kuliata ka’de ka’de naga ’ba logu kine kata yu‚ naga na konu ŋutulu kilo a loro kine‚ na ’diroroni ŋutulu i karaki ku i tiki kata kine. 10’Bo nyara na riyena a muko na kuliata naro kine giri. Ku ina nyadru de ku’de ŋutulu agira kaŋo i rugona katani‚ druga tyegu ’beri mimiye i teilikoni. 11’Bo do laga a ŋutu lo Ŋun ilo‚ wokike ku kine kulia de. Keporo bo na logbiye lo’bulo, ku ’delaki na teili i teminizo na Ŋun ina‚ ku rugona‚ ku nyadruna‚ ku teili lo rile ku teili lo mada. 12Moroni moro naga a na’bu na rugona. ’Depe ru naga ani lengana naga mo do luŋuni i riozu na lepena i luŋa laga mo do tazini rugo nonuna a na’bu ku ka’doto rodri ti bo na kulia kine i koŋo yu lu. 13Na takindra do kukuzu ku Ŋun laga lo tikindra ru ku kapazi giri ilo i koŋoni‚ ku Kristo Yesu i koŋoni itro‚ laga kazu atazu rugo nanyena a na’bu ku Pontio Pilato i koŋo yulo‚ 14adi kone kukuzuna, ’ba mundri‚ ’ba kulia na sosoyi sosoyi yeŋadru tozo i luŋa laga ma Mata lika Yesu Kristo kpezini mugu lu. 15Ku luŋalo laga aromoki, Ŋun laga a Kabuloni laga lo pura‚ laga gelelo‚ Mata lo mataki‚ Druma lo drumalalo lo itorumokindro kpeza na Yesuna. 16Lepe ka’delo laga ani tuwa‚ lepe lusaka i parara naga loŋutu ani romoki mizoroni nyogoŋana kata yu. Le’de ŋutu ’bayi laga amedra lepe, laga lo romoki medra lepe itro. Ti lepe soponi sopo, ti lepe gbo’dini ku teriŋi naga na paratra paratrana. Amena. 17Taki korineko ti ina baŋe de kilo kukuzu, ka’bi ko ku pupuru ’beri‚ ka’bi ko ku ’de’delaki teiliko i tokorine naga kulia ŋani kine aku denana kini‚ ’bo ku Ŋun kini, laga a korine‚ lo ’doga yi ku kapazi koru ma yi ku rumbi ko ku nyola. 18Ti ko kone a na’bu‚ tokorine nasikona ti gbo’dini a konesi naga a na’bu kine‚ ti ko ’dogini koru‚ ti ko kore tokorine nasikona ku puso. 19Kuwade ko i’delakindra ’beri muko naga a na’bu i mondru na luŋa lo kolele lu‚ ma ko ku ’debini ru naga a ru naga mŋgbana. 20Timoteo do‚ tine ti ŋo laga lo koloki dolo. Girani gira ku roroto laga a ’busa ’busa ti ŋutulu ti ina ka de laga ani teminizo Ŋun kilo‚ ku rerenyeta ti ’bureniko laga lo kulia adi se gbo ku dendrana kilo. 21’Bo ku’de ŋutulu laga arugo kulia ŋani kine kilo agira i merete ku kulia ti rugona kine. ’Busa na’buna ti gbo’dini ku ta.

will be added

X\