1 TIMOTEO 4

1’Bo Yuka Nakiyena nyena kulia gboŋa adi i baŋesi ti bo kunu‚ ku’de kilo ŋutulu ikokolokindro ina rugo de‚ i ’deba na kulia ti yukala naga ku tomboli kine ku togoleto ti dreria kilo. 2kine kulia de ŋiyu ku toŋulupa na kaleŋo ti to’bure kilo laga dendra naga kasiko i teiliko yuna akokoroyi be naga anyeta ku witi laga kamakana 3laga lo goza ŋutulu i lundra na wate, laga lo takindra ŋutulu kukuzu adi ti ko pane nyosuto naga ma Ŋun gbezini adi ka­ruko laga lo dendra kulia to to’diri kine ti nyosuni ku iyete kine kilo. 4’Bo kapazi giri laga ma Ŋun gbezini kilo a lo’bu. Le’de ŋo laga ma ŋutulo makundri ku iyetelo ka’bi ku reresale, 5igbonaga lepe atokela ku kulia ti Ŋun kine ku maguna itrona. 6Ku do laga ilo toyulukindro luŋaseri kilo kine kulia de‚ do igbogbo’da a kalokoni laga a lo’bu lo Kristo Yesu‚ laga lo wowoa ku kulia ti rugo kine ku togole laga a lo’bu laga do akipundro ilo. 7Girani gira ku likikirito loro ti ina ka de‚ laga ma wate naga modoŋa kine tazini kilo. Tozumuki mugu i ’delakindra na teili i teminizo na Ŋun. 8Tozumuki na rieni teriŋi na muguna gbo ku rezema ’baziŋa, ’bo ’delaki na teili i teminizo na Ŋun ina gbo ku rezema i kuliata giri‚ igbonaga lepe sarakindra ŋutulu i riozu na ru na tinadena ku yeŋo na kolelena itro. 9Kulia na tatayi kine a ’diri‚ na zuki ku ŋutulu giri i rugo. 10Ku kine kulia de‚ yi kilo trereka‚ yi kilo momorodru, igbonaga yi a’delakindra teiliko i yendru na Ŋun laga zorulo‚ lepe a Kariteni lo ŋutulu giri‚ alanguna lo ŋutulu laga a karuko kilo. 11Kukuki kine kulia de‚ togole ko itro. 12Le’de ŋutu ka’bi ku ’da’dari do ku kulia ti to’bula nonuna‚ ’bo gbo’di a kpiye lo karuko kilo i kulia naga na tatayi kine‚ ku konesi‚ ku nyadruna, ku rugona‚ ku kekelina. 13Ti inga ku na aku yeŋadru konu yu‚ ’delaki teili i kenakindra na ŋutulu kulia na wuwuro kine‚ i trukokindro na ko kulia na rudani teiliko, i togo’yu na ko itro. 14Ku boboŋo ’doke laga ku ’busa na’bu laga konu muguni‚ laga atiki do i naga ma kulia kine trukoni nu‚ ku naga ma temezi kilo tanyakindri kenisi konu ki yuna. 15Kone kine kulia de‚ tiki mugu nonuna giri i kondra na ko‚ ma ŋutulu kilo giri medri rosodru nonu naga ŋero yuna ’busa. 16Mete mugu go‚ ku togole lolulo itro. ’Depe kine kulia de. Ku do laga akondra de‚ do lepe iritundro mugu‚ ku ŋutulu lo yinga do kilo itro.

will be added

X\