1 TIMOTEO 3

1Kulia na tatayi kine a ’diri‚ adi: Ku le’de ŋutu ga’yu kita na kametani lo karuko kilo ku puso, lepe nyadru kita naga a na’bu. 2Kuwade kametanilo ti gbo’dini ’ba kulia na sosoyi sosoyi kine, ti lepe gbo’dini ku noka gele‚ a katiyuni lo mugu‚ ku kpinyi na’bu‚ laga lo teteminie, a karukoni lo komo, a katogoloni laga ku totore. 3Ka’bi lepe ku gbogbo’da a kamerani, kugbo a kabitoni lo ŋutulu, ’bo ku gbiyeri laga mada, ’ba ŋalapa, ’ba nyara na riye. 4Ti lepe ’dolaki ŋutulu laga kanye ’bani kilo kuwena soso, ti ŋazi ti lepe kilo sope so kulia ti lepe kine ku teminizo koru. 5’Bo ku le’de ŋutu aku deni ’dolakindra na ŋutulu laga kanye ’bani kilo kuwena, lepe itizu tomore na karuko ti Ŋun kilona adidinyo ya? 6Lepe ka’bi ku gbogbo’da a karukoni laga inga loludu, ka’bi lepe ku sisinga mugu, ka’bi kasosoyini lo kulialo ku ŋerakindra lepe kulia kine a naro. 7Ti ŋutulu laga kaŋo yu kilo yole lepe a lo’bu itro, ka’bi lepe ku ’data, ka’bi ku ’duki i biribiri lo kasosoyini lo kulialo katani. 8Kaloko kilo ti gbo’dini ku gbiyeri lo’bu itro. Ka’bi ko ku gbogbo’da a ti tamure, ka’bi ko ku gbogbo’da a lo mozu suwe ti konye ti zabibu kine koru, kugbo ku mago na galani riye. 9Ti ko ’depe kulia ti to’diri naga na mumuyi mumuyi ti rugo nasena kine ku teiliko laga a lokiye. 10Ti ko moroni moro a nze‚ ku ko laga arie ’ba kulia na sosoyi sosoyi‚ ti ko kondri kita na kalokona. 11Wate kine ti gbo’dini ku gbiyeri lo’bu itro. Ka’bi ku gbogbo’da a kasosoyi ti kuliata, ti ko gbo’dini a katiyu ti ’beri, ku teiliko ti to’diri i kuliata giri. 12Kaloko kilo ti gbo’dini ku wate gele gele, ti ko ’dolaki ŋazi kase kilo kuwena ku ŋutulu laga kase ’beŋitoni kilo soso. 13’Bo kaloko laga lo kondra kita soso kilo, ko irerekindro ’beri todruma, ko iroromoki i trugo na kulia kine ’ba kuze ku rugo naga ku Kristo Yesu katanina. 14Na wurokindro do kine kuliata de ma na yo’ini adi na iyeŋadru konu yu wuleŋa. 15’Bo ku na laga a ’duteki‚ do idedeni gbiyeri laga lo’bu i dridriŋi na ŋutulu ti ’ba lo Ŋun‚ laga a tomore na karuko na Ŋun laga zorulo‚ a ziki’di laga a lo ’biloni kadi ilo ku muko na kulia ti to’diri ilo. 16Kulia naga na mumuyi mumuyi ti teminizo nika na Ŋun kine a drumala koru. Ani romoki renyale. Lepe akpeza mugu i mugu na ŋutu, Yuka Nakiyena atemetakindra lepe a ŋutu laga mŋgbalo‚ malaika kilo amedra lepe‚ kulia ti lepe kine atrukozi ku zuro kilo i dridriŋi yu‚ ŋutu ti na ka de kilo arukundro lepe‚ ’bo lepe a’dukuzi ki i mo’yuna kata yu.

will be added

X\