1 TIMOTEO 2

1Kuwade a kayona‚ na tikindra ŋutulu kilo kukuzu adi ti ko male ’beri ku magu na Ŋun‚ ku piyesi, ku tiyi na iyete ku ŋutulu giri‚ 2ku mataki‚ ku ka’dola ti kuweto kilo‚ ma yi ku gbo’da ku sakaye laga mada ku teili lo trotro lo teminioni Ŋun‚ ku gbiyeri laga a lo’bu itro. 3kine kulia de a na’bu naga aruko ku Ŋun Kariteni likalo i konyeni. 4Lepe nyadru adi ŋutulu giri ti riteni rite‚ ma ko ku gbo’dini ku dendra na kulia ti to’diri kine. 5’Bo Ŋun ilo gele, ’bo katomorani gele kata i dridriŋi nasi Ŋun kasi loŋutu‚ nye laga a ŋutu laga Kristo Yesu‚ 6laga lo tikindra mugu a daketa lo ŋutulu girilo‚ ’bo bo na kulia ŋani kine kazu a’doto i luŋa laga soso lu kata yu. 7Ku kine kulia de na a’delaki a katrukoni‚ a lososonyo itro‚ a katogoloni lo Monyazi kilo ma na ku trugi kulia ti rugona kine, ku kulia ti to’diri kine itro. Na kulia a ’diri‚ na ani lengu ’bure. 8Nyenaga na nyadru adi lalia kilo ti make Ŋun mu pirito‚ lalia laga ku teiliko lokiye kilo‚ ti ko suki kenisi kase kilo ki i maguni, ti ko gbo’dini ’ba ŋoma, ’ba ŋalapa itro. 9Ti wate kine zupe ’beri ku bongola naga soso kine‚ ti ko gbo’dini ku gbiyeri laga mada, ku kpinyi na’bu itro‚ agbo’da ku traka na kupini‚ kuwa ku drumo‚ kuwa ku zibia kuwa bongola naga ku gboresi naga ki kineni‚ 10’bo ku konesi naga a na’bu kine be naga ma zukini i wate naga na kpeza ’beri a ŋutu na teminizo Ŋun kine. 11Ti wate kine toyoŋe toyo ’beri i zuzumbuni ku sobu na kulia koru. 12Na ani rugo adi wate kine ti togole lalia kilo‚ kugbo adi ti ko gbo’dini a drumala ti lalia kilo‚ ’bo ti to toyoŋe toyo ’beri‚ 13igbonaga Adama lo gbeki a kayolo‚ i bo ŋanina Iva ina. 14Agbo’da Adama lo ’bo’boliani‚ ’bo nokana nyena ’bo’bolia, nyena yeŋundri lepe a kakoreyini na kukuzuna. 15’Bo wate kine iloloko kase ta’duni, kugbo ko naga saka ku rugo‚ ku nyadru‚ ku kekeli‚ ku gbiyeri laga mada.

will be added

X\